سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ۇكىمەت وتىرىسىندا ەلدىڭ وڭتۇستىك وڭىرلەرىندە قۇرعاقشىلىق قاۋپى بار ەكەنىن ەسكەرتتى, دەپ حابارلايدى Egemen.kz.
ءمينيستردىڭ ايتۋىنشا, سىرداريا وزەنىنىڭ جوعارعى اعىسىندا, كورشى مەملەكەتتەر اۋماعىنداعى سۋ قويمالارىنىڭ قازىرگى تولىمدىعى وتكەن جىلمەن سالىستىرعاندا 3,2 ملرد تەكشە مەترگە ازايعان.
«وڭتۇستىك وڭىرلەردەگى سۋ قويمالارىنىڭ تولىمدىعى وتكەن جىلمەن سالىستىرعاندا 1,9 ملرد تەكشە مەترگە كەمىگەن. بۇل – كۇز-قىس كەزەڭىندەگى جاۋىن-شاشىننىڭ ازايۋى, مۇزدىقتان كەلەتىن سۋ كولەمىنىڭ قىسقارۋى جانە كليماتتىڭ جالپى وزگەرىسى سياقتى وبەكتيۆتى فاكتورلارعا بايلانىستى. بۇل اسەرلەر ۇزاق مەرزىمدى سيپاتتا بولىپ, بىزدەن جۇيەلى بەيىمدەلۋدى تالاپ ەتەدى», دەدى ن. نۇرجىگىتوۆ.
ءمينيستردىڭ ايتۋىنشا, بارلىق شارالار قۇرعاقشىلىق تاۋەكەلىن ازايتۋعا, سۋ رەسۋرستارىن ءتيىمدى پايدالانۋدى ارتتىرۋعا جانە وڭتۇستىك وڭىرلەردىڭ اۋىل شارۋاشىلىعىن قورعاۋعا باعىتتالعان.
2028 جىلعا قاراي «اقىلدى» سۋ ەسەپتەۋ قۇرىلعىلارى ورناتىلادى
سونداي-اق ۆەدومستۆو وسى جىلدىڭ سۋارۋ ماۋسىمىنا دايىندىق جۇمىستارىن باستادى.
«سۋارۋ كانالدارى مەن گيدروتەحنيكالىق قۇرىلىستاردا جوندەۋ-قالپىنا كەلتىرۋ جۇمىستارى جۇرگىزىلىپ جاتىر. وڭىرلەردە اۋىل شارۋاشىلىعى ماماندارىمەن سۋ ۇنەمدەۋ قاجەتتىلىگى جانە سۋدى اسا قاجەت ەتپەيتىن داقىلدارعا كوشۋ تۋرالى ءتۇسىندىرۋ كەزدەسۋلەرى وتكىزىلەدى. 2025 جىلعى جەلتوقسان ايىنىڭ باسىندا پرەمەر-ءمينيستردىڭ ورىنباسارى قانات بوزىمباەۆتىڭ توراعالىعىمەن كىزىلوردا, تۇركىستان جانە جامبىل وبلىستارىنا ىسساپارلىق كەڭەستەر ۇيىمداستىرىلىپ, سۋ پايدالانۋ ليميتتەرىن قاتاڭ ساقتاۋ جانە سۋ ۇنەمدەيتىن تەحنولوگيالارعا تەز كوشۋ مىندەتى ناقتىلاندى», دەدى مينيستر.
سونىمەن قاتار مينيستر 2026 جىلى 540 مىڭ ادامدى قۇرايتىن 142 اۋىلدى ساپالى اۋىز سۋمەن قامتاماسىز ەتۋ جۇمىستارى باستالعانىن ايتتى.
مەملەكەت باسشىسىنىڭ حالىقتى 2025 جىلدىڭ سوڭىنا دەيىن اۋىز سۋمەن قامتاماسىز ەتۋ جونىندەگى تاپسىرماسى تولىق ورىندالىپ, ەلىمىزدەگى 90 قالا مەن 7,5 ملن تۇرعىنى بار 6087 اۋىل اۋىز سۋمەن تولىق قامتاماسىز ەتىلىپ وتىر.