گونكونگتا اتر 250 ءتۋرنيرى اياقتالدى. بۇل جارىستا ەلىمىزدىڭ ەڭ ۇزدىك تەننيسشىسى الەكساندر بۋبليك تابىستى ونەر كورسەتىپ, ءوز جانكۇيەرلەرىن تاعى ءبىر قۋانتتى.
العاشقى اينالىمدا بوس بولعان ەلىمىزدىڭ ءبىرىنشى راكەتكاسى ودان كەيىن نيدەرلاندتىق بوتيك ۆان دە زاندسحۋلپ (اتر №75) پەن قىتايلىق شان تسزيۋنچەنگە (№406) شاڭ قاپتىردى. بۇل باسەكەلەردىڭ ەكەۋى دە ەكى سەتتەن اسقان جوق. جارتىلاي فينالدا جەرلەسىمىزگە ءبىراز تەر توگۋىنە تۋرا كەلدى. ول العاشقى سەتتە امەريكالىق ماركوس گيرونعا (№64) ەسە جىبەرگەنىمەن, ودان كەيىنگى سەتتەردى ءوز پايداسىنا شەشتى – 3:6, 6:4, 6:2.
فينالدا بۋبليك الەمنىڭ جەتىنشى راكەتكاسى يتاليالىق لورەنتسو مۋزەتتيمەن كۇش سىناستى. 23 جاستاعى اپەنين تۇبەگىنىڭ وكىلى 2024–2025 جىلدار ارالىعىندا ۋيمبلدون مەن روللان گارروستا ۇزدىك ءتورت ويىنشىنىڭ قاتارىنا قوسىلعان. بىراق بۇل جولى وتە كەرەمەت ويناعان الەكساندر 7:6, 6:3 ەسەبىمەن جەڭىسكە جەتتى. بۇل – بۋبليكتىڭ سپورتتىق مانسابىنداعى توعىزىنشى تيتۋلى. وسى تابىسىنىڭ ارقاسىندا 250 ۇپاي جيىپ, 106 460 دوللار كولەمىندە سىياقى الدى. سونىمەن قاتار ا.بۋبليك ءوز مانسابىندا تۇڭعىش رەت الەمدىك رەيتينگتە توپ-10-دىققا ەندى. وعان دەيىن ەرلەر اراسىندا ەلىمىزدىڭ بىردە-ءبىر تەننيسشىسى ءدال وسىنداي بيىك بەلەسكە كوتەرىلگەن جوق ەدى.
* * *
ءۇندىستاننىڭ بانگالورىندا ۇيىمداستىرىلعان تۋرنيردە تيموفەي سكاتوۆتىڭ دا قارقىنى قۋانتتى. باستاپقى باسەكەلەردە نيك وبەرليايتنەر (اۋستريا), لەونگ ميتسۋكي ۆەي كان (مالايزيا), يوناش فورەيتەكتەن (چەحيا) باسىم تۇسكەن وتانداسىمىز جارتىلاي فينالدا ارولد مايونى (فرانتسيا) جولىنان ىعىستىردى. فينالدا سكاتوۆ پەدرو مارتينەسپەن (يسپانيا) كەزدەستى. اتر رەيتينگىندە وزىنەن 139 ساتى جوعارى تۇرعان تەننيسشىگە ونىڭ ءالى جەتپەدى – 6:7, 3:6. وسى مەجەگە جەتكەنىنىڭ ارقاسىندا تيموفەي ۇزدىكتەر تىزىمىندە بىردەن 40 ساتىعا جوعارىلاپ, قازىرگى كەزدە 195-ورىندا تۇر.
اۋستراليانىڭ بريسبەن قالاسىندا ۇيىمداستىرىلعان, جۇلدە قورى 1 691 602 دوللاردى قۇراعان تۋرنيرگە ەلىمىزدىڭ بىرنەشە ويىنشىسى قاتىسقانى بەلگىلى. سولاردىڭ اراسىنىنا ەڭ ۇزدىك كورسەتكىشكە اننا دانيلينا قول جەتكىزدى. سەربيالىق الەكساندرا كرۋنيچپەن جۇپتاسىپ ونەر كورسەتكەن ول جارتىلاي فينالعا دەيىن جەتتى. ەلەنا رىباكينا شيرەك فينالدا ءسۇرىندى. جارىستىڭ ايەلدەر سىنىندا ارينا سوبولەنكو (بەلارۋس) باس جۇلدەنى ولجالاسا, ەرلەر باسەكەسىندە دانيل مەدۆەدەۆتىڭ (رەسەي) مەرەيى ۇستەم بولدى.
جاسىل قۇرلىقتاعى ادەلايدا دەپ اتالاتىن ەڭ كورىكتى قالالاردىڭ بىرىندە WTA 500 دوداسى باستالدى. ونىڭ جۇلدە قورى 1 206 446 دوللاردى قۇرايدى. ىرىكتەۋ سىنىندا ەكى كەزدەسۋ وتكىزگەن يۋليا پۋتينتسەۆا توري راسسەل (اۋستراليا) مەن ماريا بوۋزكوۆادان (چەحيا) باسىم ءتۇسىپ, مىقتىلارمەن كۇش سىناسۋ قۇرمەتىنە يە بولدى.