قىتايدىڭ سىچۋان پروۆينتسياسىنا قاراستى لۋچجوۋ قالاسىندا ەرەسەكتەر اراسىندا ارالاس جەكپە-جەك ونەرى (AMMA) بويىنشا ازيانىڭ III چەمپيوناتى ءوتتى, دەپ جازادى Egemen.kz.
اۋقىمدى سپورتتىق دوداعا ازيانىڭ 21 ەلىنەن 343 سپورتشى قاتىسىپ, Traditional MMA جانە Modern MMA باعىتتارى بويىنشا باق سىنادى. تۋرنير الداعى ازيا ويىندارىنا ىرىكتەۋ كەزەڭى سانالادى.
جارىستىڭ ءۇشىنشى كۇنى قورىتىندىسى بويىنشا ءىىم ۇلتتىق ۇلانىنىڭ «BURKIT TEAM» كومانداسى جوعارى دايىندىق دەڭگەيى مەن جاۋىنگەرلىك شەبەرلىگىن ايقىن كورسەتە وتىرىپ, تابىستى ونەر كورسەتتى.
77 كەلىگە دەيىنگى سالماق دارەجەسىندە اسكەري قىزمەتشى ادىلبەك قايىرعالي (اتىراۋ ق.) بارلىق كەزەڭنەن سەنىمدى ءوتىپ, التىن مەدالعا قول جەتكىزدى.
96 كەلىگە دەيىنگى سالماق دارەجەسىندە الماتىلىق اسكەري قىزمەتشى ابىلاي شاكيربەكوۆ ازيا چەمپيونى اتانىپ, جەڭىس تۇعىرىنىڭ ەڭ جوعارى ساتىسىنا كوتەرىلدى.
وسى سالماق دارەجەسىندە تاعى ءبىر الماتىلىق اسكەري قىزمەتشى الي مۇساقۇلوۆ قولا مەدال يەلەنىپ, ۇلتتىق قۇرامانىڭ جۇلدە قورىن تولىقتىردى.
ۇلتتىق ۇلان سپورتشىلارىنىڭ ازيا چەمپيوناتىنداعى بۇل تابىستى ناتيجەسى جۇيەلى دايىندىقتىڭ, جوعارى ءتارتىپتىڭ جانە ەلىمىزدىڭ ابىرويىن حالىقارالىق سپورت ارەناسىندا لايىقتى قورعاۋعا دەگەن ۇمتىلىستىڭ ايقىن كورىنىسى بولدى.