Facebook پەن Instagram الەۋمەتتىك جەلىلەرىنە يەلىك ەتەتىن Meta كومپانياسى جاھاندىق قاۋىپسىزدىك پەن كونتەنتتى مودەراتسيالاۋ جۇيەسىندەگى قازاقستان نارىعىنا قاتىستى Market Specialist – Kazakhstan اتتى بوس جۇمىس ورنىن اشتى. بۇل تۋرالى كومپانيانىڭ رەسمي سايتىندا حابارلاندى, دەپ جازادى Egemen.kz.
مامان Meta-نىڭ داعدارىستىق جاعدايلارعا جەدەل ارەكەت ەتۋ, قاۋىپ-قاتەرلەردى انىقتاۋ, تەكسەرۋلەر جۇرگىزۋ جانە پلاتفورما ەرەجەلەرىنىڭ ساقتالۋىن باقىلاۋعا جاۋاپتى بولىمشەلەرىندە جۇمىس ىستەيدى.
ونىڭ مىندەتىنە قازاقستان باعىتىندا جۇمىس ىستەيتىن ەۋروپالىق كوماندا قۇرامىندا بولۋ, كەزەكشىلىككە قاتىسۋ, پايدالانۋشىلاردىڭ اككاۋنتتارعا قاتىستى وتىنىشتەرى مەن ار-نامىسقا تيەتىن نەمەسە زياندى كونتەنتكە (سۋرەتتەر, بەينەماتەريالدار مەن ماتىندەر) بايلانىستى تۇسكەن شاعىمدارىن وڭدەۋ كىرەدى. سونىمەن قاتار, مامان ايماقتاعى Meta-نىڭ جارنامالىق بيزنەسىنە قاتىستى تاۋەكەلدەردى انىقتاپ, جارناما بەرۋشىلەردى قورعاۋعا جانە جارنامانى ورنالاستىرۋ ۇدەرىسىن جەتىلدىرۋگە اتسالىسادى.
ايدا بالاەۆا Meta وكىلدەرىمەن اقپاراتتىق قاۋىپسىزدىك ماسەلەلەرىن تالقىلادى
ۇمىتكەردەن قازاق جانە ورىس تىلدەرىن ءبىلۋى, ەلدىڭ ساياسي, مادەني جانە الەۋمەتتىك ەرەكشەلىكتەرىن ءتۇسىنۋى, سونداي-اق اناليتيكامەن, تسيفرلىق قۇرالدارمەن جۇمىس ىستەي ءبىلۋى مەن ەسەپ دايىنداۋ تاجىريبەسى تالاپ ەتىلەدى. Excel, SQL جانە دەرەكتەردى ۆيزۋاليزاتسيالاۋ قۇرالدارىن ءبىلۋى قۇپتالادى. سونداي-اق مامان Meta كوماندالارىمەن جانە سەرىكتەس ۇيىمدارمەن بايلانىسا وتىرىپ, شەشىمدەر ازىرلەۋگە جانە ايماقتىق زاڭبۇزۋشىلىق تۇرلەرى بويىنشا ساراپتاما جاساۋعا دا قاتىسادى.
جۇمىس ورنى دۋبلين قالاسىندا ورنالاسقانىمەن, نەگىزگى قىزمەت قازاقستاندا جۇزەگە اسىرىلادى.
ايتا كەتەيىك, Meta كومپانياسى لگبت ناسيحاتى بار اككاۋنتتاردى بۇعاتتاۋعا بەلسەندى كىرىستى.
وتكەن جىلدىڭ قىركۇيەگىندە ەلىمىزگە Meta كومپانياسىنىڭ ۆيتسە-پرەزيدەنتى يانن لەكۋن كەلگەنىن حابارلاعانبىز.