پرەزيدەنتتىڭ الەۋمەتتىك ينفراقۇرىلىمدى دامىتۋ جونىندەگى تاپسىرمالارى شەڭبەرىندە ۇكىمەت مەديتسينالىق ينفراقۇرىلىمدى جاڭعىرتۋ جۇمىستارىن جۇرگىزىپ جاتىر. سونىڭ ىشىندە ەلگە قايتارىلعان اكتيۆتەر ەسەبىنەن جۇزەگە اسىپ جاتقان جوبالار دا بار. سولتۇستىك قازاقستان وبلىسىنىڭ تايىنشا كوپسالالى اۋدانارالىق اۋرۋحاناسىن كۇردەلى جوندەۋدى اياقتاۋعا ارناۋلى مەملەكەتتىك قوردان 1,3 ملرد تەڭگە ءبولىندى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
قازىرگى ۋاقىتتا تەحنيكالىق بازانى جانە ينجەنەرلىك جەلىلەردى جاڭعىرتۋ جۇمىستارى جۇرگىزىلىپ جاتىر. ونىڭ شەڭبەرىندە زەرتتەۋلەردى تىكەلەي اۋدان ورتالىعىندا جۇرگىزۋ ءۇشىن مرت اپپاراتىنا جانە زاماناۋي كلينيكالىق-دياگنوستيكالىق زەرتحاناعا ارنالعان مامانداندىرىلعان ءۇي-جايلار اشۋ قاراستىرىلىپ وتىر.
سونىمەن قاتار حالىقارالىق ترياج جۇيەسى بويىنشا قابىلداۋ بولمەسى ۇيىمداستىرىلماق. جوباعا سايكەس وندا پەرسونالدىڭ جەدەل مونيتورينگ جۇرگىزۋ ءۇشىن كەدەرگىسىز كىرۋ مۇمكىندىگى بار رەانيماتسيالىق توسەكتەر ورنالاستىرىلادى. بۇل مەديتسينالىق ارالاسۋدىڭ جەدەلدىگىن جانە مەديتسينالىق قىزمەتتەردىڭ جوعارى ساپاسىن قامتاماسىز ەتەدى.
پاۆلودار اۋەجايى قايتارىلعان اكتيۆتەر ەسەبىنەن جاڭارتىلادى
جالپى العاندا, جوبانى جۇزەگە اسىرۋ ناتيجەسىندە مەديتسينالىق مەكەمە شۇعىل جانە جوسپارلى كومەك كورسەتۋدىڭ زاماناۋي ستاندارتتارىنا سايكەس كەلتىرىلەدى.
قارجى مينيسترلىگىنىڭ دەرەكتەرىنە سايكەس, ارناۋلى مەملەكەتتىك قوردان 400-دەن استام الەۋمەتتىك جانە كوممۋنالدىق نىساندارعا, ونىڭ ىشىندە 183 مەديتسينالىق مەكەمەگە قاتىستى جوبالاردى جۇزەگە اسىرۋعا 482 ملرد تەڭگە بولىنگەن. بىرقاتار جوبا «اۋىلدىق دەنساۋلىق ساقتاۋ سالاسىن جاڭعىرتۋ» باعدارلاماسى شەڭبەرىندە قامتىلعان. ماسەلەن, العاشقى مەديتسينالىق-سانيتارلىق كومەك نىساندارىن, كوپسالالى اۋرۋحانالاردى, مامانداندىرىلعان مەديتسينالىق ورتالىقتاردى, شۇعىل مەديتسينالىق كومەك ينفراقۇرىلىمدارىن سالۋ جانە جاڭارتۋ جۇمىستارى جۇرگىزىلىپ جاتىر.
قايتارىلعان اكتيۆتەر: دۋبايداعى ۆيللالار مەن «دۋمان» قوناق ءۇيى ساتىلدى