شىمكەنت قالاسىندا مەرزىمدى اسكەري قىزمەت وتكەرىپ جۇرگەن سارباز قايتىس بولدى. بۇل تۋرالى ۇلتتىق ۇلاننىڭ ءباسپاسوز قىزمەتى حابارلادى, دەپ جازادى Egemen.kz.
رەسمي مالىمەتكە سايكەس, سارباز جامبىل وبلىسىنىڭ قورعانىس ىستەرى جونىندەگى دەپارتامەنتى ارقىلى, تاراز قالاسىنان اسكەرگە شاقىرىلعان. قىزمەت بارىسىندا ول بىرنەشە رەت مەديتسينالىق كومەككە جۇگىنىپ, دارىگەرلەردىڭ باقىلاۋىندا بولعان جانە قالاداعى ەمدەۋ مەكەمەلەرىندە تەكسەرۋدەن وتكەن.
6 قاڭتار كۇنى اسكەري قىزمەتشىنىڭ جۇرەگى كەنەتتەن توقتاعان. جۇرگىزىلگەن رەانيماتسيالىق شارالارعا قاراماستان, ول قالالىق اۋرۋحانالاردىڭ بىرىندە كوز جۇمدى. الدىن الا دياگنوز جەدەل لەيكوز دەپ كورسەتىلدى.
اتالعان فاكتى بويىنشا اسكەري-تەرگەۋ باسقارماسى قىلمىستىق ءىس قوزعادى. جاعداي ىشكى ىستەر ءمينيسترىنىڭ ورىنباسارى, ۇلتتىق ۇلاننىڭ باس قولباسشىسىنىڭ جەكە باقىلاۋىنا الىندى.
ەسكە سالايىق, بۇعان دەيىن ماڭعىستاۋ وبلىسىندا اسكەري قىزمەتشى دىنمۇحامەدتىڭ قازا تاپقانى تۋرالى اقپارات تاراعان ەدى. ول اسكەرگە ءوزىنىڭ ەگىز باۋىرىنان كەيىن بارعان. العاشىندا ولار ءبىر اسكەري بولىمدە قىزمەت ەتكەن, كەيىن ولاردىڭ ءبىرى باسقا بولىمگە اۋىستىرىلعان. وسى جىلدىڭ 17 قىركۇيەگىندە وتباسى دىنمۇحامەدتىڭ قايتىس بولعانى تۋرالى قارالى حابار العان. الدىن الا مالىمەت بويىنشا, سارباز ءوز-وزىنە قول جۇمسادى دەگەن بولجام ايتىلعان. الايدا مارقۇمنىڭ تۋىستارى بۇل نۇسقامەن كەلىسپەيتىنىن مالىمدەدى. كەيىنىرەك قورعانىس ءمينيسترىنىڭ ورىنباسارى سەرىك بورانباەۆ 19 جاستاعى دىنمۇحامەدتىڭ ولىمىنە قاتىستى تۇسىنىكتەمە بەرىپ, ەگىز باۋىرلار بىرگە قىزمەت ەتپەگەنىن, ولاردىڭ ءار ۋاقىتتا جانە ءارتۇرلى ەلدى مەكەندەردەن اسكەرگە شاقىرىلعانىن ايتتى.
قاپەرگە الايىق, مەمەلەكەت باسشىسىنىڭ «Turkistan» گازەتىنە بەرگەن سۇحباتىندا «ساربازداردىڭ جاراقات الۋى مەن قازا بولۋى وركەنيەتتى ەلگە جات ءۇردىس» دەپ ايتقان ەدى.