پرەزيدەنتتىڭ بيىلعى جولداۋىندا كوتەرىلگەن تۇيتكىلدى جايتتىڭ قاتارىندا سۋدى ۇنەمدەۋ ماسەلەسى دە بار. «سۋدى ەسەپكە الۋ تەحنولوگياسى ابدەن ەسكىرگەن. سۋدى ءبولىپ تاراتاتىن ورىنداردا قازىرگى زامانعا ساي قۇرىلعىلار جوق. شىن مانىندە, سۋ – ستراتەگيالىق ماڭىزى بار رەسۋرس, سۋسىز ءومىر جوق. سوندىقتان بۇل سالا ۇلتتىق تسيفرلىق جاڭعىرۋ جۇمىسىنداعى باستى باعىتتىڭ ءبىرى بولۋعا ءتيىس», دەدى مەملەكەت باسشىسى.
ماسەلەن, اتىراۋ ءوڭىرىنىڭ ورتالىعى مەن وعان تاياۋ ورنالاسقان ەلدى مەكەندەردەگى, ماقات اۋدانىنداعى تۇرعىنداردى سۋمەن قامتيتىن جەتەكشى مەكەمە – «اتىراۋ وبلىسى سۋ ارناسى» كمك. مۇنايلى شاھاردا ارنايى قۇرىلعىلارمەن تاۋلىگىنە شامامەن 120 مىڭ تەكشە مەتر سۋ تازارتىلادى. ونىڭ ىشىندە امانگەلدى جانە المالى اۋىلدارىنداعى سۋ تازارتاتىن قۇرىلعىلاردىڭ ونىمدىلىگى – تاۋلىگىنە 600 تەكشە مەتر. ماقات كەنتىندە تاۋلىگىنە 3 مىڭ تەكشە مەتر سۋدى تازارتۋعا ارنالعان قۇرىلعىلار بار.
اتىراۋ قالاسىندا سۋ جەتكىزەتىن قۇبىردىڭ ۇزىندىعى 1 441 شاقىرىمعا سوزىلادى. كۇندەلىكتى تۇتىناتىن سۋ شاھار ماڭىنداعى اۋىلدارعا 1 316, ماقات پەن دوسسور كەنتىدە 125 شاقىرىم قۇبىرمەن جەتكىزىلەدى. سۋ قىسىمى 53 سوراپ ستانساسىندا كوتەرىلەدى. بۇل كاسىپورىن 311 شاقىرىم كارىز قۇبىرىنا يەلىك ەتەدى.
«اتىراۋدا سۋمەن جابدىقتاۋ جانە سۋ بۇرۋ جۇيەسىنىڭ جۇمىسىن ءتيىمدى باسقارۋ ماقساتىندا ديسپەتچەرلىك پۋنكت جۇمىس ىستەپ تۇر. وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ تاپسىرىسىنا سايكەس «اتىراۋ وبلىسى سۋ ارناسى» مەكەمەسىندە ارنايى جۇيە ىسكە قوسىلدى. بۇل جۇيەنى كارىز سورعى ستانسالارىنا, سورعى كوتەرۋ ستانسالارىنا, سۋ جيناۋ قۇرىلعىلارىنا, جىلىتۋ بەكەتتەرىنە, سۋ جينايتىن رەزەرۆۋارلارعا, كوپقاباتتى تۇرعىن ۇيلەرگە سۋ ەسەپتەگىش جابدىقتى قوندىرۋ كوزدەلدى. قازىر 90-عا جۋىق كارىز سورعىسىنا, 36 سورعى كوتەرۋ ستانساسىنا, كوپقاباتتى 521 تۇرعىن ۇيگە سۋ ەسەپتەگىش قۇرىلعى قوندىرىلدى», دەيدى كاسىپورىن ديرەكتورى مەيىرىم قالاۋي.
كەيىنگى جىلدارى اتىراۋ قالاسىنىڭ وڭ جاعالاۋىندا ورنالاسقان №5 سۋ سۇزگى ستانساسى پايدالانۋعا بەرىلدى. بۇل جوبانىڭ ماقساتى – جايىق وزەنىنەن الىنعان سۋدى ساپالى تازارتىپ, قالا تۇرعىنداردى اۋىزسۋمەن قامتاماسىز ەتۋ. جاڭا ستانسادا تاۋلىگىنە 50 مىڭ تەكشە مەتر سۋ تازارتىلادى. جايىق وزەنىنەن قالقىمالى جانە جاعاداعى ءبىرىنشى كوتەرۋ سورعى ستانسالارى ارقىلى الىنادى. ستانسادا ارقايسىسى 10 مىڭ تەكشە مەتر بولاتىن ءۇش سۋ ساقتاۋ رەزەرۆۋارى ورناتىلعان.
«قالقىمالى ستانسا سۋ دەڭگەيى تومەندەگەن جاعدايدا دا ۇزدىكسىز جۇمىس ىستەي بەرەدى. سۋ تازارتۋ تۇندىرۋ, ءسۇزۋ جانە ناتري گيپوحلوريدىمەن زالالسىزداندىرۋ ارقىلى جۇرگىزىلەدى. بۇل رەاگەنت ستانسا جانىنداعى قوندىرعىدا اس تۇزىنان وندىرىلەدى. جۋ-شايۋ سۋلارىن قايتا پايدالاناتىن جۇيە سۋ ۇنەمدەۋگە مۇمكىندىك بەرەدى. تازارتىلعان سۋ ءۇش رەزەرۆۋاردا ساقتالىپ, ەكىنشى سورعى ستانساسى ارقىلى تۇرعىندارعا جەتكىزىلەدى», دەيدى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ وكىلى امانگۇل ايتباي.
«اتىراۋ سۋ ارناسى» كمك-نىڭ باس تەحنولوگى ءجاميلا يساعاليەۆانىڭ دەرەگىنە سۇيەنسەك, جايىق وزەنىنەن الىنعان تابيعي سۋدىڭ لايلىعى ماۋسىمعا جانە اۋا رايىنا بايلانىستى قۇبىلىپ تۇرادى. كەيدە 28–30 پايىز شاماسىندا بولسا, كەي مەزگىلدە 80 پايىزعا دەيىن جەتەدى.
«سۋدى تۇتىنۋشىلارعا جەتكىزبەستەن بۇرىن بىرنەشە كەزەڭنەن تۇراتىن مەحانيكالىق جانە حيميالىق تازارتۋ ۇدەرىسى جۇزەگە اسىرىلادى. بۇل جۇمىستىڭ ناتيجەسىندە اۋىزسۋ قۇرامى 0,5 پايىزعا دەيىنگى مولشەردە لايدان تازارتىلادى. وسىلايشا, سانيتارلىق تالاپتارعا تولىق سايكەس كەلەتىن دەڭگەيگە جەتكىزىلەدى. قازىر كاسىپورىندا ءتورت سۋ تازارتۋ ستانساسى جۇمىس ىستەپ تۇر. ءبىز سۋدى بىرنەشە ساتىلى سۇزگىدەن وتكىزىپ, زەرتحانالىق باقىلاۋمەن ساپاسىن تەكسەرىپ وتىرامىز», دەيدى ج.يساعاليەۆا.
اتىراۋ وبلىسى