پرەزيدەنتتىڭ جاساندى ينتەللەكتتى دامىتۋ جونىندەگى تاپسىرمالارىن ورىنداۋ اياسىندا اقمولا وبلىسىندا اۋىل شارۋاشىلىعا مينيسترلىگىمەن بىرلەسىپ اۋىل شارۋاشىلىعى مەن قوعامدىق قاۋىپسىزدىك جۇيەسىنە AI تەحنولوگيالارى ەنگىزىلۋدە. بۇل تۋرالى ۇكىمەت وتىرىسىندا ءوڭىر اكىمى مارات احمەتجانوۆ باياندادى, دەپ حابارلايدى Egemen.kz.
تسيفرلاندىرۋ جانە جاساندى ينتەللەكت جىلى اياسىندا وڭىرلىك IT-حابتى دامىتۋ وبلىستىڭ تەحنولوگيالىق ءوسىمىنىڭ نەگىزگى قوزعاۋشى كۇشىنە اينالۋدا. بيىل وبلىستا كرەاتيۆتى تەحنولوگيالار ورتالىعى – Tumo Center, سونداي-اق جاستاردىڭ تاجىريبەلىك ساباقتار وتۋىنە ارنالعان اقكول, قوسشى جانە جاقسى قالالارىندا ءۇش Tumo Classroom كامپۋسى اشىلادى. سونىمەن قاتار ش. ءۋاليحانوۆ اتىنداعى كوكشەتاۋ ۋنيۆەرسيتەتىنىڭ بازاسىندا Tumottow يننوۆاتسيالىق مەكتەبىن اشۋ جونىندە مەموراندۋمعا قول قويىلدى.
اگرارلىق سەكتوردىڭ تيىمدىلىگىن ارتتىرۋ ماقساتىندا وڭىردە «اقىلدى اوك» مودەلى ەنگىزىلۋدە. جاساندى ينتەللەكت جەردى ماقساتتى پايدالانۋىن باعالاۋدا قولدانىلىپ, مەملەكەتتىك قولداۋ شارالارىن ء«بىر تەرەزە» قاعيداتى بويىنشا اشىق ءارى جەدەل الۋعا مۇمكىندىك بەرەدى جانە سالانىڭ تابىستىلىعىن ارتتىرادى.
تاعى ءبىر باسىم باعىت – ەلدى مەكەندەردەگى قاۋىپسىزدىكتى كۇشەيتۋ. ىشكى ىستەر مينيسترلىگى مەن جەكە ينۆەستورلارمەن بىرلەسىپ, قوسشى قالاسىندا بەينەباقىلاۋ جۇيەسىن كەڭەيتۋ جوباسى جۇزەگە اسىرىلدى. قولدانىستاعى 500 كامەراعا قوسىمشا 1 000 جاڭا كامەرا ورناتىلىپ, ولار زاماناۋي جەدەل باسقارۋ ورتالىعىنا بىرىكتىرىلدى. جۇيە قوعامدىق ءتارتىپتى باقىلاۋمەن قاتار, اۆتوماتتى رەجيمدە كوممۋنالدىق ماسەلەلەردى, قاڭعىباس جانۋارلاردىڭ بار-جوعىن جانە جول جامىلعىسىنىڭ جاعدايىن انىقتايدى.
بىرىڭعاي دروندار ينفراقۇرىلىمى ارقىلى اۋىل شارۋاشىلىعى القاپتارى مەن ورمان ماسسيۆتەرىنە مونيتورينگ جۇرگىزىلىپ, زاڭسىز قوقىس ورىندارى مەن ءورت وشاقتارىن جەدەل انىقتاۋعا مۇمكىندىك بەرىلۋدە.
«2030 جىلعا دەيىنگى تسيفرلاندىرۋ ستراتەگياسى بەكىتىلدى. جۇرگىزىلگەن جۇمىستىڭ نەگىزگى ناتيجەسى – Digital Aqmola بىرىڭعاي ەكوجۇيەسىن قالىپتاستىرۋ بولدى. وعان پلاتفورمانىڭ ءوزى, جاعدايلىق ورتالىق, بىرىڭعاي بايلانىس ورتالىعى, ستارتاپتاردى سۇيەمەلدەۋ جانە قولداۋ جۇيەلەرى كىرەدى. سونىمەن قاتار ەكونوميكانىڭ بارلىق سالالارىنا جاساندى ينتەللەكتتى ەنگىزۋ جۇمىستارى قاتار جۇرگىزىلۋدە. ءبىز جاساندى ينتەللەكتتىڭ ناقتى ەكونوميكالىق پايدا اكەلۋىنە جانە ازاماتتاردىڭ ءومىر ءسۇرۋ ساپاسىن ارتتىرۋىنا باسىمدىق بەرىپ وتىرمىز», دەپ اتاپ ءوتتى مارات احمەتجانوۆ.