ينكليۋزيۆتى ءبىلىم بەرۋ بويىنشا قازاقستاندا العاش رەت وتكەن الەمدىك كونگرەسس – سالاداعى جاھاندىق ديالوگتىڭ جاڭا كەزەڭىن باستاۋعا جانە پەداگوگتەردىڭ كاسىبي قۇزىرەتتەرىن ارتتىرۋعا سەرپىن بەردى. ەلىمىزدە ينكليۋزيۆتى ءبىلىم بەرۋ ءۇشىن جاعداي جاسالعان ءبىلىم بەرۋ ۇيىمدارىنىڭ ۇلەسى 93,3%-دى قۇرايدى. ال ارنايى پسيحولوگيالىق-پەداگوگيكالىق قولداۋمەن قامتىلعان بالالار سانى 87%-عا جەتكەن, دەپ جازادى Egemen.kz.
سالانى دامىتۋدىڭ جاڭا كەزەڭى باستالدى
ينكليۋزيۆتى ءبىلىم بەرۋدى جۇيەلى دامىتۋ ماقساتىندا مەكتەپكە دەيىنگى ۇيىمداردا جانە كاسىبي-تەحنيكالىق ءبىلىم بەرۋ ۇيىمدارىندا پەداگوگ-اسسيستەنت شتاتتارى ەنگىزىلدى. بۇل باستاما ەرەكشە ءبىلىم بەرۋ قاجەتتىلىكتەرى بار بالالارعا جەكە قولداۋ كورسەتۋگە مۇمكىندىك بەردى. ەلىمىزدىڭ ءبىلىم بەرۋ ۇيىمدارىندا 3,8 مىڭ پەداگوگ-اسسيستەنت جانە 10 275 ارنايى پەداگوگ قىزمەت اتقارىپ ءجۇر.
جەكە كومەكشى لاۋازىمى
سونداي-اق مەكتەپتەردە مۇمكىندىگى شەكتەۋلى جانە ومىرلىك قيىن جاعدايعا تاپ بولعان بالالارعا جەكە كومەكشى لاۋازىمى ەنگىزىلدى. ناتيجەسىندە 129 ەرەكشە ءبىلىم بەرۋ قاجەتتىلىكتەرى بار بالاعا فيزيكالىق سۇيەمەلدەۋ كورسەتىلدى, ونىڭ ىشىندە بۇرىن ۇيدە وقىعان 45 بالا جالپى ءبىلىم بەرەتىن مەكتەپتەردە ءبىلىم الۋعا مۇمكىندىك الدى.
516 ارنايى ۇيىم
ەلىمىزدە ەرەكشە ءبىلىم بەرۋ قاجەتتىلىكتەرى بار بالالاردى قولداۋعا ارنالعان ينفراقۇرىلىم بەلسەندى دامىپ كەلەدى. بۇگىندە 516 ارنايى ۇيىم جۇمىس ىستەيدى. مەملەكەت باسشىسىنىڭ تاپسىرماسىنا سايكەس اۋتيزم ورتالىقتارىنىڭ جەلىسى كەڭەيتىلىپ جاتىر, سونداي-اق ەرتە جاستان باستاپ ماماندىق الۋعا دەيىنگى بالالاردى كەشەندى سۇيەمەلدەۋ تۇجىرىمداماسى بەكىتىلدى.