بۇگىن «Turkistan» گازەتىندە مەملەكەت باسشىسى قاسىم-جومارت توقاەۆتىڭ اۋقىمدى سۇحباتى جاريالاندى. سۇحباتتا پرەزيدەنت وتكەن جىلدى قورىتىندىلاپ, ەل كوكەيىندەگى ساۋالدارعا جاۋاپ بەردى, دەپ جازادى Egemen.kz.
«Turkistan» گازەتىنىڭ باس رەداكتورى بەلگىلى اقىن, پۋبليتسيست باۋىرجان باباجان ۇلى سۇحباتتا جاڭا سالىق كودەكسىنە قاتىستى سۇراق قويعان.
قاسىم-جومارت توقاەۆ ءوز كەزەگىندە سالىق رەفورماسى – وزەكتى ماسەلە ەكەنىن, دەسە دە ەل ىشىندە دۇربەلەڭ تۋعىزىپ, جۇرتتى دۇرلىكتىرۋدىڭ ەشقانداي ءجونى جوق ەكەنىن باسا ايتتى.
«مۇنداي رەفورما كوپتەگەن ەلدە جۇرگىزىلىپ جاتىر. مىسالى, رەسەيدە قوسىمشا قۇن سالىعى جۋىردا 22 پايىزعا دەيىن كوتەرىلدى. ءبىزدىڭ رەفورمامىز – قاتارداعى «فيسكالدىق ناۋقان» ەمەس, سالىق جۇيەسىن قايتا قۇرۋ دەگەن ءسوز. الدىمىزدا تۇرعان باستى مىندەت – ەكونوميكانىڭ تۇراقتى ءوسىمىن قامتاماسىز ەتۋ. ۇكىمەتكە اشىق ءارى ۇعىنىقتى سالىق كودەكسىن ازىرلەۋ تاپسىرىلدى. مينيسترلەر كابينەتىنىڭ بۇل تاپسىرمانى قانشالىقتى تابىستى ورىنداپ شىققانىن بيىل كورەتىن بولامىز.
بۇرىنعى ۇكىمەت قوسىمشا قۇن سالىعىن, ءتىپتى, 20 پايىزعا دەيىن كوتەرۋدى ۇسىندى. ولار فيسكالدىق ساياساتتا قاتەلىك جىبەرىلگەنىن ەسكەرە وتىرىپ, مۇنداي قادامنىڭ وتە قاجەت ەكەنىن مويىندادى. تالقىلاۋ بارىسىندا قازىرگى ۇكىمەت تە قوسىمشا قۇن سالىعىن 20 پايىزعا دەيىن كوتەرۋدى ۇسىندى. الايدا, مەن ۇكىمەتكە ونىڭ جوعارعى شەگىن 4 ساتىعا تومەندەتۋ تۋرالى تاپسىرما بەردىم», دەدى مەملەكەت باسشىسى.
سونداي-اق پرەزيدەنت جاڭا سالىق كودەكسىندە باقىلاۋ جاساۋعا ەمەس, ءوزارا سەرىكتەستىك ورناتۋعا باسا ءمان بەرىلەتىنىن اتاپ ءوتتى.
«وسى ۇدەرىسكە قاتىسۋشىلاردىڭ ءبارى – مەملەكەت تە, بيزنەس تە, ازاماتتار دا ءوز مىندەتىن ادال ورىنداۋعا ءتيىس. ءبىرىن-ءبىرى ءوزارا تولىقتىرىپ تۇراتىن مۇنداي جۇيەدە سالىق تولەۋ اۋىرتپالىق رەتىندە قابىلدانبايتىن بولادى. تۇپتەپ كەلگەندە, سالىق تولەۋ دەگەنىمىز – زاماناۋي قوعامدىق كەلىسىمشارت دەگەن ءسوز. سالىق تولەسەڭىز – قىزمەت كورسەتىلەدى, ينفراقۇرىلىم سالىنادى, قاۋىپسىز ورتا قالىپتاسادى, تىڭ مۇمكىندىكتەر پايدا بولادى. كەرەك دەسەڭىز, بۇل – ادىلدىك بولۋ ءۇشىن جۇكتەمەنى قايتا ءبولۋ قۇرالى, الەۋمەتتىك تۇرعىدان السىزدەردى قولداۋ جانە ەكونوميكالىق تۇرعىدان «بەلسەندى ورتانى» ودان ءارى دامىتۋ ءتاسىلى.
بۇكىل الەمدە فيسكالدىق ساياساتتىڭ تيىمدىلىگى ونى جۇرگىزۋدىڭ ساپاسىمەن, جۇرتتىڭ سالىق جونىندەگى ساۋاتىمەن جانە قوعامنىڭ سانا-سەزىمىمەن ولشەنەدى. سالىق تولەۋ مادەنيەتى ءدال وسىلاي قالىپتاسادى. سالىق تولەۋ بۇرىن مىندەت بولسا, ەندى وتانشىلدىقتىڭ وزىق ۇلگىسىنە اينالادى. مۇنى سىبايلاس جەمقورلىققا قارسى قوعام قۇرۋدىڭ توتە جولى دەۋگە بولادى. سەبەبى, سالىعىن ادال تولەيتىن ازاماتتار ءوز قارجىسىنىڭ الاياقتاردىڭ قالتاسىندا كەتكەنىن مۇلدەم ۇناتپاسى انىق», دەدى قاسىم-جومارت توقاەۆ.