وقۋ-اعارتۋ مينيسترلىگى ورنىقتى ءبىلىم بەرۋ جۇيەسىن قالىپتاستىرۋ بويىنشا جۇمىستار جۇرگىزۋدە. 2026 جىلداعى نەگىزگى باستامالار مەن جاڭاشىلدىقتار تۋرالى وقۋ-اعارتۋ ۆيتسە-ءمينيسترى شىنار اقپاروۆا ايتىپ بەردى, دەپ جازادى Egemen.kz.
«وقۋ-اعارتۋ مينيسترلىگى مەملەكەت باسشىسىنىڭ تاپسىرمالارىن ورىنداۋ ماقساتىندا ءبىلىم بەرۋ جۇيەسىندە اۋقىمدى شارالاردى جۇزەگە اسىرۋدى جوسپارلاپ وتىر. ونىڭ ىشىندە «پەداگوگ مارتەبەسى تۋرالى» زاڭعا وزگەرىستەر ەنگىزىلۋدە. بۇل وزگەرىستەر پەداگوگتەردى ارتىق قاعازباستىلىقتان قورعاۋعا, مەكتەپتەن تىس ۋاقىتتا بالالارعا قاتىستى جازاتايىم وقيعالار ءۇشىن اتا-انالاردىڭ دا جاۋاپكەرشىلىگىن ناقتىلاۋعا, سونداي-اق پەداگوگ قۇقىعىن قورعاۋدى كۇشەيتۋگە باعىتتالعان», دەپ اتاپ ءوتتى شىنار اقپاروۆا.
سونداي-اق 2026–2030 جىلدارعا ارنالعان «قازاقستان بالالارى» بىرىڭعاي باعدارلاماسىنىڭ تۇجىرىمداماسىن بەكىتۋ تۋرالى ۇكىمەتتىڭ قاۋلىسىنىڭ جوباسى ازىرلەندى. بۇل قۇجات بالالاردىڭ قۇقىقتارىن قورعاۋ, بالانىڭ قاۋىپسىزدىگى, ءبىلىم الۋ قۇقىعى, دەنساۋلىق ساقتاۋ قۇقىعى, الەۋمەتتىك قولداۋ سالاسىنداعى بارلىق قولدانىستاعى شارالاردى بىرىكتىرەدى. مامانداندىرىلعان ءبىلىم بەرۋ ۇيىمدارىن جاڭارتۋ جالعاسۋدا, سونىڭ ىشىندە اباي اتىنداعى مەكتەپ-ينتەرناتى اباي مەكتەبىنە ترانسفورماتسيالانىپ, جاڭا وقۋ مازمۇنمەن تولىقتىرىلدى.
سونىمەن بىرگە جەتىم بالالار مەن اتا-اناسىنىڭ قامقورلىعىنسىز قالعان بالالاردىڭ قۇقىن قورعاۋدى كۇشەيتۋ جانە ءبىلىم بەرۋ سالاسىنداعى ىنتالاندىرۋ تەتىكتەرىن جەتىلدىرۋ بويىنشا شارالار قابىلدانۋدا. ماسەلەن, حالىقارالىق عىلىمي جوبا كونكۋرستارىنىڭ جەڭىمپازدارىنا, سونداي-اق ولاردى دايارلاعان پەداگوگتەرگە بىرجولعى مەملەكەتتىك سىياقى قاراستىرىلعان. سونداي-اق «مۇمكىندىگى شەكتەۋلى بالالاردى كەشەندى قولداۋ تۋرالى» زاڭ جوباسى قارالۋدا.
بارلىق قابىلدانىپ جاتقان شارالار بالانىڭ مۇددەسىنە, پەداگوگتاردى قولداۋعا جانە ساپالى بىلىمگە تەڭ قول جەتكىزۋگە باعدارلانعان تۇتاس جانە ورنىقتى ءبىلىم بەرۋ جۇيەسىن قۇرۋعا باعىتتالعان.