الماتىنىڭ «قايرات» فۋتبول كلۋبى ءۇش اپتالىق دەمالىستان كەيىن وتەتىن حالىقارالىق وقۋ-جاتتىعۋ جيىنىنىڭ ورنىن جانە جوسپارلانعان جولداستىق كەزدەسۋلەرىن جاريالادى, دەپ حابارلايدى Egemen.kz.
كلۋبتىڭ ءباسپاسوز قىزمەتى Telegram-ارناسىندا حابارلاعانداي, 4 قاڭتار كۇنى تاڭەرتەڭ «قايرات» بىرىككەن اراب امىرلىكتەرىنە اتتانىپ, 15 قاڭتارعا دەيىن وقۋ-جاتتىعۋ جيىنىن وتكىزەدى.
«جيىننىڭ باستى ماقساتى فۋتبولشىلاردى وڭتايلى فيزيكالىق قالىپقا كەلتىرۋ جانە رەسمي ماتچتارعا ساپالى دايىندىق جۇرگىزۋ», دەلىنگەن كلۋب مالىمدەمەسىندە.
سونداي-اق الماتىلىق كلۋب ەكى جولداستىق كەزدەسۋ وتكىزەتىنىن مالىمدەدى. اتاپ ايتقاندا,
9 قاڭتاردا ازەربايجاننىڭ «نەفتچي» كلۋبىنا قارسى,
14 قاڭتاردا حورۆاتيانىڭ «ۆاراجدين» كومانداسىمەن وينايدى.
ايتا كەتەيىك, جۇما كۇنى كوماندا كلۋب بازاسىندا جينالىپ, باستاپقى مەديتسينالىق تەكسەرۋدەن ءوتۋدى جوسپارلاپ وتىر.
قازىرگى تاڭدا «قايرات» چەمپيوندار ليگاسىنىڭ تۋرنيرلىك كەستەسىندە 36-ورىندا تۇر. الماتىلىق كلۋبتىڭ ەنشىسىندە ءبىر عانا ۇپاي بار, ول كيپردىڭ پافوس كومانداسىمەن وتكەن ماتچتاعى تەڭ ويىن (0:0).
ال قالعان بەس كەزدەسۋدە قازاقستاندىق كلۋب جەڭىلىس تاپتى.
الدا «قايراتتى» 20 قاڭتاردا بەلگيانىڭ «بريۋگگە», سونداي-اق 28-نەن 29 قاڭتارعا قاراعان ءتۇنى لوندوننىڭ «ارسەنال» كلۋبتارىنا قارسى ماتچتار كۇتىپ تۇر.