قازاقستاندا بالالاردىڭ دەمالىسى مەن ساۋىقتىرۋ ورتالىقتارىنىڭ جۇمىسى جاڭا جۇيەگە كوشەدى. پرەزيدەنت قاسىم-جومارت توقاەۆ قول قويعان جاڭا زاڭ اياسىندا 2026 جىلدان باستاپ بۇل سالانىڭ قىزمەتىنە قاتىستى تالاپتار ايتارلىقتاي جاڭارتىلدى, دەپ حابارلايدى Egemen.kz.
مەملەكەت باسشىسى قاسىم-جومارت توقاەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تاريحي-مادەني مۇرا وبەكتىلەرىن قورعاۋ جانە ءبىلىم بەرۋ-ساۋىقتىرۋ قىزمەتتەرى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.
وقۋ-اعارتۋ مينيسترلىگىنىڭ مالىمەتىنشە, قابىلدانعان تۇزەتۋلەر بالالارعا ارنالعان قوسىمشا ءبىلىم بەرۋدى دامىتۋعا باعىتتالعان جانە ءبىلىم بەرۋ-ساۋىقتىرۋ قىزمەتتەرىن كورسەتەتىن جىل بويى جانە ماۋسىمدىق ستاتسيونارلىق بالالار لاگەرلەرىنىڭ قىزمەتىنە قاتىستى بولىپ وتىر.
جاڭا زاڭ اياسىندا 2026 جىلدان باستاپ قوسىمشا ءبىلىم بەرۋ ۇيىمدارى ەكى ساناتقا بولىنەدى:
ءبىرىنشى سانات – قىزمەتى ليتسەنزيالاۋعا جاتاتىن ءبىلىم بەرۋ-ساۋىقتىرۋ قىزمەتتەرىن كورسەتەتىن ۇيىمدار. ەكىنشى سانات – حابارلامالىق تارتىپپەن جۇمىس ىستەيتىن قوسىمشا ءبىلىم بەرۋ ۇيىمدارى.مينيسترلىك بۇل ءتاسىل سالانى رەتتەۋدى جەڭىلدەتۋگە, سونداي-اق كورسەتىلەتىن قىزمەتتەردىڭ ساپاسى مەن سەنىمدىلىگىن ارتتىرۋعا مۇمكىندىك بەرەتىنىن اتاپ ءوتتى. بالالاردىڭ قاۋىپسىزدىگى مەن قىزمەت ساپاسىن قامتاماسىز ەتۋ ماقساتىندا بالالار لاگەرلەرىنىڭ قىزمەتى 2026 جىلعى 1 ساۋىردەن باستاپ ليتسەنزيالاناتىن بولادى. بۇل بالالاردىڭ دەمالىسى, وقۋى جانە ساۋىقتىرۋى ءۇشىن قويىلاتىن بىرىڭعاي تالاپتاردى بەلگىلەۋگە مۇمكىندىك بەرەدى.
«ليتسەنزيانىڭ قولدانىلۋ مەرزىمى ءبىر جىلدان بەس جىلعا دەيىن ۇزارتىلدى. بۇل ۇيىمدارعا تۇسەتىن اكىمشىلىك جۇكتەمەنى ازايتىپ, قۇجاتتاردى جىل سايىن قايتا راسىمدەۋ قاجەتتىلىگىن بولدىرمايدى. ليتسەنزيانىڭ بەس جىلعا بەرىلۋى ۇيىمداردىڭ قىزمەتىنىڭ تۇراقتىلىعى مەن مەملەكەتتىك باقىلاۋدى جۇيەلى تۇردە جۇزەگە اسىرۋ اراسىنداعى تەپە-تەڭدىكتى قامتاماسىز ەتەدى», دەلىنگەن حابارلامادا.