اقش پرەزيدەنتى دونالد ترامپ يمپورتتىق تاۋارلارعا قاتىستى پروتەكتسيونيستىك ساياساتىن جۇمسارتىپ, جيھاز بەن يتاليالىق ماكارون ونىمدەرىنە سالىناتىن باج سالىعىن وزگەرتتى. بۇل شەشىم امەريكالىق تۇتىنۋشىلار اراسىندا باعانىڭ وسۋىنە قاتىستى نارازىلىقتار مەن ساۋدا سەرىكتەستەرىمەن جۇرگىزىلگەن كەلىسسوزدەردەن كەيىن قابىلداندى, دەپ حابارلايدى Egemen.kz.
اق ءۇي تاراتقان مالىمدەمەگە سايكەس, جيھازدىڭ كەيبىر تۇرلەرىنە (جۇمساق جيھاز, اس ءۇي شكافتارى) سالىناتىن جوعارى تاريفتەردىڭ ەنگىزىلۋى 2027 جىلدىڭ 1 قاڭتارىنا دەيىن شەگەرىلدى.
ەۋرووداق اقش ونىمدەرىنە 30% باج سالىعىن ەنگىزەدى
قازىرگى ۋاقىتتا بۇل تاۋارلارعا 25%-دىق تاريف ساقتالىپ تۇر. بۇعان دەيىن ۆاشينگتون جيھازعا سالىناتىن سالىقتى 30%-دان 50%-عا دەيىن كوتەرۋدى كوزدەگەن بولاتىن. دونالد ترامپ بۇل شەشىمىن ساۋدا سەرىكتەستەرىمەن (ونىڭ ىشىندە قىتاي مەن ۆەتنام) جۇرگىزىلىپ جاتقان ناتيجەلى كەلىسسوزدەرمەن ءتۇسىندىردى. بۇل قادام اقش-تاعى بولشەك ساۋدا باعالارىنىڭ كۇرت ءوسۋىن تەجەۋگە باعىتتالعان.
اقش-تىڭ ساۋدا مينيسترلىگى يتاليالىق ماكارون وندىرۋشىلەرىنە («La Molisana», «Garofalo» جانە ت.ب.) قاتىستى دەمپينگكە قارسى ايىپتاردى قايتا قاراپ, سالىق مولشەرلەمەسىن ايتارلىقتاي تومەندەتتى.
يتاليا اقش-قا ەكسپورتتالاتىن بارلىق ماكارون ونىمدەرىنىڭ 19%-ىن قامتاماسىز ەتەدى. سالىقتىڭ تومەندەۋى تانىمال برەندتەردىڭ امەريكالىق دۇكەن سورەلەرىنەن جوعالىپ كەتپەۋىنە كەپىل بولادى.