بۇگىننەن باستاپ قازاقستاننىڭ شەتەلدەگى مەكەمەلەرى شەتەل ازاماتتارىنا جەكە سايكەستەندىرۋ ءنومىرىن (جسن) بەرۋدى توقتاتتى. جسن بەرۋ بويىنشا پيلوتتىق جوبانىڭ مەرزىمى 2025 جىلعى 31 جەلتوقساندا اياقتالدى, دەپ حابارلايدى Egemen.kz.
ەلىمىزدىڭ رەسەيدەگى ەلشىلىگىنىڭ حابارلاۋىنشا, شەتەل ازاماتتارىنا قازاقستانعا كەلمەي-اق مەملەكەتتىك قىزمەتتەر مەن سەرۆيستەردى ونلاين تۇردە الۋعا مۇمكىندىك بەرەتىن eResidency باعدارلاماسى ەنگىزىلگەن. بۇل باعدارلاما ارقىلى جسن بار تسيفرلىق جەكە كۋالىك الۋعا بولادى.
eResidency باعدارلاماسى شەتەلدىكتەرگە قازاقستاننىڭ بيزنەس-مۇمكىندىكتەرى مەن ونلاين-سەرۆيستەرىنە قول جەتكىزۋگە مۇمكىندىك بەرەدى:
- جەكە سايكەستەندىرۋ ءنومىرى (جسن) بار تسيفرلىق ID-كارتا الۋ;- قور نارىعىنا, كريپتوبيرجالارعا, قازاقستاندىق ءنومىرى بار eSIM-گە قول جەتكىزۋ;- ەلەكتروندىق تسيفرلىق قولتاڭبا مەن ساقتاندىرۋ قىزمەتتەرىن راسىمدەۋ;- قازاقستاندىق كارتالاردى پايدالانا وتىرىپ, ونلاين بانك شوتتارىن اشۋ;- سالىق رەزيدەنتى مارتەبەسىن جانە تولەم جۇيەلەرى ارقىلى ەكۆايرينگ الۋ مۇمكىندىگى.
جسن الۋ ماسەلەلەرى بويىنشا شەتەل ازاماتتارىنا رەسمي سايتقا جۇگىنۋ ۇسىنىلادى, وندا تولىق اقپارات قولجەتىمدى.