باس كولىك پروكۋراتۋراسى ينتەرنەت-كەڭىستىكتەگى سۋىق قارۋدىڭ زاڭسىز اينالىمىنىڭ جولىن كەسۋ بويىنشا شارالار قابىلداۋدا, دەپ جازادى Egemen.kz.
جۇرگىزىلگەن تالداۋ كورسەتكەندەي, جەكەلەگەن ونلاين-پلاتفورمالار تىيىم سالىنعان زاتتاردى, سونىڭ ىشىندە بۇركەمەلەنگەن نەمەسە «تۇرمىستىق» تاۋارلار كەيپىندە ساتۋعا ءالى دە جول بەرىپ وتىر. مۇنداي تاجىريبە ازاماتتاردىڭ ءومىرى مەن دەنساۋلىعىنا تىكەلەي قاۋىپ توندىرەدى جانە ماركەتپلەيس يەلەرى تاراپىنان باقىلاۋدىڭ جەتكىلىكسىزدىگىن ايعاقتايدى.
سۋىق قارۋدىڭ كامەلەتكە تولماعاندار ءۇشىن قولجەتىمدىلىگى ەرەكشە الاڭداۋشىلىق تۋدىرادى. سۇزگىدەن وتكىزۋ مەن بۇعاتتاۋدىڭ ءتيىمدى تەتىكتەرىنىڭ جوقتىعى جاسوسپىرىمدەردىڭ زاڭسىز ارەكەتتەرگە تارتىلۋىنا جانە كەيىننەن ولاردىڭ قىلمىستىق جاۋاپكەرشىلىككە تارتىلۋىنا جاعداي جاسايدى.
بۇعان دەيىن مەملەكەتتىك ورگاندار مەن ماركەتپلەيس اكىمشىلىكتەرى اراسىندا تىيىم سالىنعان ونىمدەردى ورنالاستىرۋعا جانە ساتۋعا جول بەرمەۋ تۋرالى ۋاعدالاستىقتارعا قول جەتكىزىلگەنى اتاپ ءوتىلدى. سوعان قاراماستان, كەيبىر پلاتفورمالار وزدەرىنە العان مىندەتتەمەلەردى ەلەمەي كەلەدى, بۇل جول بەرىلمەيتىن جايت.
ماسەلەن, مادەنيەت جانە اقپارات مينيسترلىگىنىڭ اقپارات كوميتەتى «Satu.kz» ينتەرنەت-دۇكەنىن سۋىق قارۋدى جارنامالاعانى ءۇشىن اكىمشىلىك قۇقىق بۇزۋشىلىق تۋرالى كودەكستىڭ 455-بابى بويىنشا اكىمشىلىك جاۋاپكەرشىلىككە تارتتى.
وسىعان بايلانىستى ونلاين-الاڭ يەلەرىنىڭ جاۋاپكەرشىلىگىن كۇشەيتۋ, تىيىم سالىنعان تاۋارلاردى سۇزگىدەن وتكىزۋ مەن بۇعاتتاۋدىڭ ءتيىمدى تەتىكتەرىن ەنگىزۋ, سونداي-اق قوسىمشا پروفيلاكتيكالىق شارالار قابىلداۋ قاجەتتىلىگى باسا ايتىلدى.
باس كولىك پروكۋراتۋراسى ەسكەرتەدى: اڭشىلىق كاسىپشىلىكپەن بايلانىستى جاعدايلاردى قوسپاعاندا, سۋىق قارۋدى زاڭسىز الىپ ءجۇرۋ نەمەسە وتكىزۋ, سول سياقتى ءتيىستى رۇقساتى جوق ادامدارعا قارۋ مەن وق-دارىلەردى ساتۋ قىلمىستىق كودەكستىڭ 287-بابى بويىنشا قىلمىستىق جاۋاپكەرشىلىككە اكەپ سوعادى.
بۇل ماسەلە «اتامەكەن» استانا قالاسىنىڭ وڭىرلىك كاسىپكەرلەر پالاتاسىنىڭ الاڭىندا ەگجەي-تەگجەيلى تالقىلاندى. وندا مەملەكەتتىك جانە قۇقىق قورعاۋ ورگاندارىنىڭ, سونداي-اق ءىرى ماركەتپلەيستەردىڭ قاتىسۋىمەن ۆەدومستۆوارالىق كەڭەس ءوتتى.
جيىن قورىتىندىسى بويىنشا قاۋىپتى جانە تىيىم سالىنعان ونىمدەردى ونلاين-ساۋدادان شىعارۋ, سونداي-اق قوعامدىق قاۋىپسىزدىك ماسەلەلەرىندە بيزنەس پەن مەملەكەتتىڭ بىرىڭعاي ۇستانىمىن قالىپتاستىرۋ بويىنشا ناقتى ۇسىنىستار ازىرلەندى.