اقش-تا اۋا رايىنىڭ قولايسىزدىعىنا بايلانىستى 8 مىڭنان استام اۋە رەيسى كەشىكتىرىلدى. ەلدىڭ سولتۇستىك-شىعىس ءوڭىرىن قالىڭ قار باسقان, دەپ حابارلايدى Egemen.kz.
FlightAware پورتالىنىڭ دەرەگىنشە, 8104 رەيس كەشىكتىرىلىپ, تاعى 1422 رەيس مۇلدە توقتاتىلعان.
اقش-تىڭ سولتۇستىك-شىعىس ايماقتارىندا 26 جەلتوقساندا قارلى بوران كۇشەيگەن. اتاپ ايتقاندا, نيۋ-يورك شتاتىندا ءبىر تاۋلىكتە جاۋعان قاردىڭ قالىڭدىعى 15 سانتيمەترگە دەيىن جەتكەن.
سونىمەن قاتار رەسەي استاناسىنداعى اۋەجايلاردا دا اۋە قاتىناسى ۋاقىتشا شەكتەلدى. ماسكەۋدىڭ ۆنۋكوۆو اۋەجايى مەن شەرەمەتەۆو اۋەجايلارىندا ۇشىپ كەلۋ جانە ۇشىپ شىعۋ باعىتىنداعى 270-تەن استام رەيس كەشىكتىرىلگەن.
قاۋىپسىزدىككە تونگەن قاتەرگە بايلانىستى 69 اۋە كەمەسى بالاما اۋەجايلارعا باعىتتالسا, 42 رەيس تولىقتاي توقتاتىلعان.