قوناەۆتا «حان ءتاڭىرى», «سامعاۋ», «زاڭعار» سىيلىقتارىنىڭ جەڭىمپازدارى ماراپاتتالدى

ولاردىڭ بىرقاتارى الماتى وبلىسىنىڭ اكىمى تاعايىنداعان «حان ءتاڭىرى», «سامعاۋ» جانە «زاڭعار» سىيلىعىنىڭ جەڭىمپازدارى اتانىپ, مەرەيلەرى ۇستەم بولدى.

ماراپاتتاۋ راسىمىندە وبلىس تۇرعىندارىنىڭ كاسىبي جەتىستىكتەرى, الەۋمەتتىك-ەكونوميكالىق دامۋعا قوسقان ۇلەسى جانە ادام كاپيتالىنىڭ وسۋىنە ىقپال ەتكەن ەڭبەكتەرى ەرەكشە اتالدى.

«بۇگىن وسى زالدا وبلىسىمىزدىڭ دامۋىنا ۇلەس قوسىپ جۇرگەن ءارتۇرلى سالانىڭ ادامدارى جينالدى. سپورتشىلار جەڭىستەرى ارقىلى وبلىستىڭ بەدەلىن ارتتىرادى, جۋرناليستەر قوعام مەن بيلىك اراسىنداعى اشىق ءارى ادال ديالوگتى قامتاماسىز ەتەدى, ال جاستار جاڭا باستامالار مەن شەشىمدەردى ۇسىنۋعا تالپىنادى. سوندىقتان «حان ءتاڭىرى», «سامعاۋ» جانە «زاڭعار» سىيلىعى – كاسىبيلىك پەن تاباندىلىققا بەرىلگەن قۇرمەتتىڭ بەلگىسى. اتالعان سالالاردا ەڭبەك ەتىپ, تەر توگىپ جۇرگەن ازاماتتاردىڭ ارقايسىسىنىڭ ەڭبەگىن باعالايمىز جانە الداعى ۋاقىتتا دا قولداۋ كورسەتەمىز», دەدى الماتى وبلىسىنىڭ اكىمى مارات سۇلتانعازيەۆ.

سپورت سالاسىندا «حان ءتاڭىرى» پرەمياسى ءداستۇرلى تۇردە جوعارى جەتىستىكتەر مەن سپورتشىلارعا قولداۋ كورسەتكەن باپكەرلەر مەن مامانداردىڭ ەڭبەگىن مويىنداۋ ءارى قولداۋ رەتىندە تابىستالادى. جىل قورىتىندىسىندا 152 سپورتشى قارجىلاي سىيلىقپەن ماراپاتتالدى.

«دەنە شىنىقتىرۋ جانە سپورت سالاسى مەملەكەتتىك ساياساتتىڭ تۇراقتى نازارىندا. قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆتىڭ تاپسىرمالارى اياسىندا وڭىردە جوعارى دەڭگەيدەگى سپورتشىلاردى دايارلاۋعا دا, بولاشاق چەمپيونداردى تاربيەلەۋگە دە جۇيەلى جاعداي جاسالۋدا. وسى جىل الماتى وبلىسىنىڭ تاريحىنا ءىرى حالىقارالىق جەڭىستەر, اۋقىمدى جوبالار مەن سپورت سالاسىنىڭ جۇيەلى نىعايۋ كەزەڭى رەتىندە نىق ەندى. ءوڭىر سپورتشىلارى الەم چەمپيوناتتارىندا, سۋردوليمپيادا ويىندارىندا جانە بەدەلدى حالىقارالىق تۋرنيرلەردە جوعارى ناتيجە كورسەتىپ, دايىندىق دەڭگەيىنىڭ جوعارى ەكەنىن دالەلدەدى», دەدى وبلىس اكىمى.

جىل باسىنان بەرى الماتى وبلىسىنىڭ سپورتشىلارى 2140 مەدال جەڭىپ الدى. ونىڭ ىشىندە 778 التىن, 628 كۇمىس جانە 734 قولا مەدال بار.

سالتاناتتى شارا بارىسىندا بوكس بويىنشا الەم چەمپيوناتىنىڭ جۇلدەگەرى ەرتۋعان زەينۋلينوۆ ءوزىنىڭ قۋانىشىمەن ءبولىستى.

«بوكسقا 15 جىلىمدى ارنادىم. بۇل تەك باستاماسى عانا. الداعى ۋاقىتتا دا جوعارى ناتيجەلەرگە جەتىپ, التىن مەدال جەڭىپ الۋدى جوسپارلاپ وتىرمىن. الماتى وبلىسىنىڭ اكىمى مارات ەلەۋسىز ۇلىنا قولداۋى ءۇشىن العىس ايتامىن», دەدى ول.

بۇل كۇنى «جەگەنى جانتاق, ارقالاعانى التىن» دەيتىن جۋرناليستەر قاۋىمىنا دا ەرەكشە كوڭىل ءبولىندى. ءۇش جىلدان سوڭ ۇزىلگەن ءجىبى قايتا جالعانىپ, سالا ماماندارىنا ۇكىلى ءۇمىت سىيلاعان وبلىس اكىمىنىڭ «سامعاۋ» مەديا-سىيلىعىنىڭ جەڭىمپازدارى ماراپاتتالدى. ايماقتاعى باق ءرولىن قولداۋدىڭ ماڭىزدى بەلگىسى بولعان بۇل بايگەگە باسپا, ەلەكتروندى باق, تەلەارنا, تسيفرلىق پلاتفورمالار مەن بلوگەرلەر قاتىستى.

لاۋرەاتتار قاتارىندا «ولكە تىنىسى» جشس-نە قاراستى الماتى وبلىستىق «الاتاۋ ارايى», «وگني الاتاۋ» گازەتتەرىنىڭ قىزمەتكەرلەرى بار. اتاپ ايتساق, قوس باسىلىمنىڭ قالامى جۇيرىك, ويى ۇشقىر جۋرناليستەرى بولات ءماجيت, جانار مىقتىباەۆا «جىلدىڭ ۇزدىك ءجۋرناليسى» اتاندى.

«بۇل ماراپات – كوماندا ەڭبەگىنىڭ ناتيجەسى. ءار ماتەريالدىڭ ارتىندا ارىپتەستەردىڭ قولداۋى بار. «وگني الاتاۋ» گازەتى ماعان وقىرمان الدىنداعى زور جاۋاپكەرشىلىك پەن جۋرناليستيكانىڭ مىقتى مەكتەبىن قالىپتاستىرۋعا ىقپال ەتتى», دەيدى مەديا-سىيلىقتىڭ يەگەرى, ارىپتەسىمىز جانار مىقتىباەۆا.

سونداي-اق مەديا-سىيلىق يەگەرلەرى قاتارىندا «ولكە تىنىسى» جشس-ءنىڭ ديرەكتورى كادىربەك قۇنىپيا ۇلى, «حابار-24» تەلەۆيزياسىنىڭ مەنشىكتى ءتىلشىسى ارداق قىساەۆ, «كازاحستانسكايا پراۆدا» گازەتىنىڭ وسى وڭىردەگى مەنشىكتى ءتىلشىسى اسەت قالىموۆ, «ۇزدىك ءفوتوتىلشى» اتانعان اسلان قاجەكە, «ۇزدىك ديزاينەر» نوميناتسياسىنىڭ يەگەرى ادينا بايباك, باسقا دا جۇيرىك جۋرناليستەرمەن قاتار, Alatau News سايتى جانە «جەتىسۋ» تەلەارناسى دا بار.

ال جاستارعا ارنالعان «زاڭعار» پرەمياسى 14-تەن 35 جاسقا دەيىنگى بەلسەندى ازاماتتاردى قولداۋعا باعىتتالعان. جەڭىمپازدارعا ديپلومدار مەن 500 000 تەڭگەلىك سەرتيفيكاتتار تابىس ەتىلدى. «ۇزدىك جاس جۋرناليست» اتانعان Alataunews.kz اگەنتتىگىنىڭ ءتىلشىسى بالنۇر اسانوۆا بۇل ماراپات وبلىس اكىمى جۇرگىزىپ وتىرعان جاستاردى قولداۋ جانە كاسىبي الەۋەتىن دامىتۋ ساياساتىنىڭ جەمىسى ەكەنىن تىلگە تيەك ەتتى.

وڭىردەگى تالانتتى سپورتشىلار, قارىمدى جۋرناليستەر مەن جاس كوشباسشىلاردىڭ ەڭبەگىن باعالاۋدا ەرەكشە فورماتتا وتكەن سالتاناتتى شارا سوڭى اۋەزدى انگە ۇلاسىپ, كوتەرىڭكى كوڭىل-كۇي سىيلادى.