جاپونيانىڭ گۋمما پرەفەكتۋراسى اۋماعىندا جاپپاي جول-كولىك وقيعاسى تىركەلىپ, 56 اۆتوكولىك سوقتىعىستى, دەپ حابارلايدى Egemen.kz.
ريا نوۆوستي اگەنتتىگى جازعانداي, اپات كانەتسۋ اۆتوجولىندا, ميناكامي قالاسى ماڭىندا تۇنگى ۋاقىتتا بولعان. الدىن الا مالىمەت بويىنشا, اۋىر جۇك كولىگى جولدا تايعاناپ, قوزعالىسسىز قالعان. ونىڭ ارتىنان كەلە جاتقان جەڭىل اۆتوكولىكتەر بىرىنەن سوڭ ءبىرى سوقتىعىسىپ, سونىڭ سالدارىنان ءورت شىققان.
كۋاگەرلەردىڭ ايتۋىنشا, جولدىڭ ەڭىس ءارى بۇرىلىستى بولىگىندە بولعان اپاتتى ارتتان كەلە جاتقان جۇرگىزۋشىلەر دەر كەزىندە بايقاي الماعان. وسى سەبەپتى سوقتىعىس سانى ارتقان.
قازىرگى ۋاقىتتا اتالعان جول ۋچاسكەسىندە قوزعالىس ەكى باعىتتا دا تولىق توقتاتىلعان.
جاپون بۇقارالىق اقپارات قۇرالدارىنىڭ مالىمەتىنشە, جول اپاتى سالدارىنان 1 ادام قازا تاۋىپ, كەمىندە 26 ادام جاراقات العان. ونىڭ ىشىندە 5 ادام اۋىر حالدە اۋرۋحاناعا جەتكىزىلگەن, قالعاندارى جەڭىل جاراقات العان.
وقيعا كۋاگەرلەرىنىڭ ءبىرى جول جيەگىندە تۇرعان جەڭىل كولىكتەن الدىمەن ءتۇتىن شىعىپ, كەيىننەن وت تۇتانعانىن ايتقان.
— جول تومەن قاراي تۇسەتىن بۇرىلىستا ورنالاسقان. ادامدار نە بولىپ جاتقانىن تۇسىنبەي, بىرىنەن سوڭ ءبىرى سوقتىعىسىپ جاتتى, — دەدى ول.
اپاتتىڭ ناقتى سەبەپتەرى انىقتالىپ جاتىر.