بيىل اڭىزعا اينالعان قولباسشى باۋىرجان مومىش ۇلىنىڭ تۋعانىنا 115 جىل. قازىر ۇلتتىق ۇلان قاتارىندا باۋىرجان ەسىمدى 249 اسكەري قىزمەتشى وتان الدىنداعى بورىشىن وتەپ ءجۇر. بۇل ەسىم ەلىمىزدىڭ تاريحىندا دا, اسكەري داستۇردە دە ەرلىكتىڭ, ار-نامىستىڭ, سونداي-اق وتانعا قالتقىسىز قىزمەت ەتۋدىڭ نىشانىنا اينالعان.
باۋىرجان ەسىمى ەلىمىزدىڭ قارۋلى كۇشتەرىندە ايرىقشا ورىن الادى. بۇل, ەڭ الدىمەن, اتى اڭىزعا اينالعان قولباسشى, كەڭەس وداعىنىڭ باتىرى, جازۋشى ءارى ويشىل باۋىرجان مومىش ۇلىنىڭ ءومىر جولىمەن تىكەلەي بايلانىستى. ونىڭ تاعىلىمعا تولى عۇمىرى مەن مايدانداعى تاجىريبەسى وتان قورعاۋشىلاردىڭ تالاي بۋىنىنا رۋحاني باعدار بولدى. ال ءتارتىپ, جاۋاپكەرشىلىك پەن وتانسۇيگىشتىككە نەگىزدەلگەن قاعيداتتارى بۇگىنگى كۇنگە دەيىن وزەكتىلىگىن جوعالتقان جوق.
الماتى قالاسىنداعى ۇلتتىق ۇلاننىڭ 5571 اسكەري بولىمىنە كەڭەس وداعىنىڭ باتىرى, حالىق قاھارمانى, گۆارديا پولكوۆنيگى باۋىرجان مومىش ۇلىنىڭ ەسىمى بەرىلگەن. جەكە قۇرام ءۇشىن بۇل زور مارتەبە عانا ەمەس, سونىمەن قاتار اسكەري-قىزمەتتىك مىندەتتەردى ورىنداۋ بارىسىندا كاسىبيلىك, تاباندىلىق پەن ادالدىق تانىتىپ, ۇلى باتىردىڭ اتىنا لايىق بولۋ قاجەتتىگىن ەسكە سالاتىن جوعارى جاۋاپكەرشىلىك.
«باۋىرجان مومىش ۇلى مەن ءۇشىن ەرلىك پەن ءتارتىپتىڭ, شىنايى ءپاتريوتيزمنىڭ جارقىن بەينەسى. ونىڭ ەسىمى ماعان ەرەكشە جاۋاپكەرشىلىك جۇكتەيدى. بۇل مەنى اڭىزعا اينالعان باتىردىڭ داڭقتى جولىن لايىقتى جالعاستىرۋعا مىندەتتەيدى. ۇلتتىق ۇلان قاتارىندا قىزمەت ەتۋ – مەن ءۇشىن ۇلكەن ابىروي. نەگىزگى ماقساتىم – اسكەري انتقا ادال بولىپ, ەلىمىزدىڭ ازاماتتارىنىڭ تىنىشتىعى مەن قاۋىپسىزدىگىن قامتاماسىز ەتۋ», دەيدى 5517 اسكەري ءبولىمىنىڭ مەرزىمدى قىزمەتتەگى ساربازى قاتارداعى باۋىرجان تولەماعامەت.
اتى اڭىزعا اينالعان قولباسشىنىڭ تۋعانىنا 115 جىل تولۋىنا وراي ۇلتتىق ۇلان بولىمشەلەرىندە اسكەري-پاتريوتتىق رۋحتى نىعايتۋعا, تاريحي جادتى ساقتاۋعا, جاس اسكەري قىزمەتشىلەر اراسىندا قاھارماننىڭ ونەگەسىن كەڭىنەن ناسيحاتتاۋعا باعىتتالعان ەسكە الۋ, تاربيەلىك, اقپاراتتىق ءىس-شارالار ۇيىمداستىرىلدى. قازىر باۋىرجان مومىش ۇلىنىڭ «سوعىس پسيحولوگياسى» مەن «ۇشقان ۇيا» ەڭبەكتەرى قۇقىقتىق ءتارتىپ اسكەرلەرىندەگى مەملەكەتتىك-قۇقىقتىق, جاۋىنگەرلىك دايارلىقتىڭ رۋحاني-تاجىريبەلىك نەگىزىنە اينالدى. ال ۇلتتىق ۇلان ساپىندا باۋىرجان ەسىمدى جۇزدەگەن ۇلاندىقتىڭ قىزمەت ەتۋى – اسكەري داستۇرلەردىڭ ساباقتاستىعى مەن قازاق حالقىنىڭ جاۋىنگەرلىك داڭقى تاريحىندا ماڭگىلىك ورىن العان تۇلعا مۇراسىنىڭ ايقىن بەلگىسى رەتىندە قابىلدانادى.