وتكەن دۇيسەنبى پاريجدەگى 10-شى اۋدانداعى زەرگەرلىك بۇيىمدار دۇكەنىنە تاۋار تاسىمالداۋشىلارعا شابۋىل جاسالدى. قاراقشىلار قۇنى 150 مىڭ ەۋرو تۇراتىن جاقۇتتى قولدى ەتكەن, دەپ جازادى Egemen.kz.
قاسكويلەر كولىك تۇراعىندا تاسىمالداۋشىلاردى كۇتىپ تۇرىپ, مەكەنجايعا جەتكەندە قارۋمەن قورقىتىپ, شابارمانداردىڭ ءبىرىنىڭ باسىنان بالعامەن ۇرعان.
شابۋىلداۋشىلار كوزدەگەن دۇنيەسىن الىپ, بوي تاسالاعان.
پاريج پوليتسياسىنىڭ مالىمەتىنشە, كۇدىكتىلەر 5 بۋما زەرگەرلىك بۇيىم مەن التىنداردى ۇرلاعان. شابارماندار جەتكىزبەك بولعان تاۋاردىڭ ىشىندە ەرەكشە جاقۇت تاس تا بولعان.
ايتا كەتەيىك, بۇعان دەيىن لۋۆر مۋزەيىندە بۇرىن-سوڭدى بولماعان ۇرلىق جاسالعان ەدى.
وسى جىلى الەمگە ايگىلى مۋزەي كىتاپحاناسىنداعى 400-گە جۋىق قۇجاتقا دا زاقىم كەلگەن. عيماراتتا كارىز سۋى تاسىپ, مىسىر كونە جادىگەرلەر بولىمىندەگى قۇندى دۇنيەلەر زاقىمدانعان.
سونداي-اق بيىل بەلگيالىق ەكى بلوگەر لۋۆر كۇزەتشىلەرىن الداپ, مونا ليزا پورترەتىنىڭ جانىنا ءوز سۋرەتتەرىن ءىلىپ تاستاعان بولاتىن.
لۋۆرداعى ۇرلىقتان كەيىن قازاقستان مۋزەيلەرىندەگى قاۋىپسىزدىك دەڭگەيى دە تەكسەرىلدى.