ەلىمىزدە ەكولوگيالىق مادەنيەتتى قالىپتاستىرۋعا باعىتتالعان «تازا قازاقستان» تۇجىرىمداماسىن ىسكە اسىرۋ جۇيەلى تۇردە جالعاسىپ جاتىر. بۇل باستاما ۋاقىتشا ناۋقان ەمەس, قوعامنىڭ ويلاۋ جۇيەسىن وزگەرتۋگە باعىتتالعان ۇزاقمەرزىمدى ساياسات رەتىندە ورنىعىپ كەلەدى. قورشاعان ورتاعا جاۋاپكەرشىلىكپەن قاراۋ – بۇگىندە ءاربىر ازاماتتىڭ كۇندەلىكتى ادەتىنە اينالۋعا ءتيىس ماڭىزدى قۇندىلىق.
تۇجىرىمدامانى جۇزەگە اسىرۋ ورتالىق پەن جەرگىلىكتى اتقارۋشى ورگانداردىڭ ۇيلەسىمدى جۇمىسىنا نەگىزدەلگەن. ەكولوگيالىق داعدىلاردى قالىپتاستىرۋ, ءبىلىم, اعارتۋ باعىتتارىن قامتيتىن 60 ءىس-شارادان تۇراتىن جوسپار وسى ماقساتقا قىزمەت ەتەدى. بۇل – ەكولوگيا ماسەلەسىن تەك مەملەكەتتىك دەڭگەيدە ەمەس, قوعامدىق سانا ارقىلى شەشۋگە باعىتتالعان ءتاسىل.
«تازا قازاقستان» اياسىندا ەل كولەمىندە 1 294 ەكولوگيالىق ءىس-شارانىڭ وتكىزىلۋى قوعامدا ەكولوگيالىق سەرپىننىڭ بار ەكەنىن ايقىن كورسەتتى. بارشانى بىرىكتىرگەن باستاما بارىسىندا ءاربىر ءۇشىنشى تۇرعىننىڭ بوي كورسەتۋى – ازاماتتاردىڭ بەيجاي ەمەستىگىن بىلدىرەتىن ماڭىزدى كورسەتكىش. بۇل – دۇرىس باعىتتا كەلە جاتقانىمىزدىڭ دالەلى.
ەكولوگيالىق اكتسيالارعا 6,4 ملن-نان استام ادامنىڭ قاتىسۋى, ونىڭ ىشىندە 781 مىڭنان استام ەرىكتىنىڭ بولۋى قوعامدىق جاۋاپكەرشىلىكتىڭ جاڭا دەڭگەيگە كوتەرىلگەنىن اڭعارتادى. مۇنداي بەلسەندىلىك ەكولوگيالىق مادەنيەت بىرتىندەپ قالىپتاسىپ كەلە جاتقانىن كورسەتەدى.
844 مىڭ توننادان استام قالدىقتىڭ جينالۋى, 1,1 ملن گا اۋماقتىڭ تازارتىلۋى – اتقارىلعان جۇمىستىڭ ناقتى ناتيجەسى. بۇل دەرەكتەر ەكولوگيا سالاسىنداعى باستامالاردىڭ ءسوز جۇزىندە ەمەس, ءىس جۇزىندە جۇزەگە اسىپ جاتقانىن دالەلدەيدى.
رۇقسات ەتىلمەگەن قوقىس ورىندارىن جويۋ باعىتىندا قابىلدانىپ جاتقان شارالار دا نازار اۋدارارلىق. 1 300-دەن استام ءموبيلدى توپتىڭ 100 مىڭنان اسا رەيد جۇرگىزۋى – ەكولوگيا سالاسىنداعى ءتارتىپتىڭ كۇشەيگەنىن كورسەتەدى. عارىشتىق مونيتورينگ ارقىلى زاڭسىز قوقىس ورىندارىنىڭ 25%-عا ازايۋى باقىلاۋ مەن تالاپتىڭ ناتيجەسى بار ەكەنىن اڭعارتادى.
بۇل رەتتە تازالىق تەك باقىلاۋمەن عانا ەمەس, سانا ارقىلى ورنىعۋعا ءتيىس ەكەنى انىق. قوعامدا «تازالىق – بىرەۋدىڭ مىندەتى ەمەس, ءبارىمىزدىڭ ورتاق جاۋاپكەرشىلىگىمىز», دەگەن تۇسىنىك قالىپتاسقاندا عانا بۇل ماسەلە تۇبەگەيلى شەشىلەدى.
@TazaQazBot چات-بوتىنىڭ ىسكە قوسىلۋى مەن eGov ارقىلى ميلليونداعان ازاماتتى قامتىعان حابارلامالار حالىقپەن كەرى بايلانىستىڭ جاڭا دەڭگەيىن قالىپتاستىردى. 24 مىڭنان استام ءوتىنىشتىڭ ءتۇسۋى, ولاردىڭ باسىم بولىگىنىڭ ورىندالۋى – تسيفرلىق قۇرالداردىڭ تيىمدىلىگىنە ايقىن دالەل. بۇل مەملەكەتتىك ورگانداردىڭ حالىققا جاقىنداي تۇسكەنىن, ازاماتتاردىڭ ءوز اۋلاسى مەن كوشەسىنە بەيجاي قارامايتىنىن بىلدىرەدى.
بيىل 335,6 ملن اعاش وتىرعىزىلدى, بۇل – ەكولوگيالىق تەپە-تەڭدىكتى ساقتاۋعا باعىتتالعان اۋقىمدى جۇمىس. بۇل – تەك ستاتيستيكالىق كورسەتكىش ەمەس, بولاشاق ۇرپاققا قالدىرىلاتىن ناقتى ەكولوگيالىق كاپيتال.
قالدىقتاردى باسقارۋ سالاسىنداعى جوبالار, سۇرىپتاۋ مەن قايتا وڭدەۋدى دامىتۋ, قوقىس جاعۋ زاۋىتتارىن سالۋ ەكولوگيا ماسەلەسىنە كەشەندى كوزقاراستىڭ قالىپتاسقانىن كورسەتەدى. بۇل باعىتتاعى ينۆەستيتسيالار ەلىمىزدىڭ ەكولوگيالىق قاۋىپسىزدىگىنە سالىنعان ۇزاقمەرزىمدى ينۆەستيتسيا دەۋگە تولىق نەگىز بار.
«تازا قازاقستان» – ەكولوگيا تۋرالى عانا ەمەس, ءتارتىپ, مادەنيەت, جاۋاپكەرشىلىك تۋرالى تۇجىرىمداما. تابيعاتتى ايالاۋ, قورشاعان ورتانى قورعاۋ, تازالىقتى ساقتاۋ ۋاقىتشا ناۋقان ەمەس, ۇلتتىڭ ءومىر سالتىنا اينالۋعا ءتيىس قۇندىلىقتار. ورتاق ءۇيىمىز – ەلىمىزدىڭ تازالىعى ءار ازاماتتىڭ كۇندەلىكتى ىسىنەن باستالادى. مەملەكەت پەن قوعامنىڭ بىرلەسكەن ارەكەتى ەكولوگيالىق مادەنيەتى جوعارى ەل قالىپتاستىرۋدىڭ بەرىك نەگىزى بولادى.
تازا قازاقستان – تازا بولاشاق. سول بولاشاقتى قالىپتاستىرۋعا ۇلەس قوسۋ – ارقايسىمىزدىڭ ازاماتتىق پارىزىمىز. كوشەنىڭ تازالىعىنان باستاپ, اۋلانىڭ تارتىبىنە دەيىنگى ءاربىر ءىس ورتاق ءۇيىمىزدىڭ كەلبەتىن ايقىندايدى. مەملەكەت پەن قوعامنىڭ بىرلەسكەن قادامى عانا ەكولوگيالىق مادەنيەتى جوعارى, جاۋاپكەرشىلىگى بەرىك ەل قالىپتاستىرا الادى. بۇگىنگى ارەكەت – ەرتەڭگى ۇرپاققا قالاتىن مۇرا. وسى تۇرعىدا «تازا قازاقستان» ءار ازاماتتى بەيجاي قالدىرمايتىن, ەلدىك سانانى نىعايتاتىن ماڭىزدى باستاما.
ەرلان نىسانباەۆ,
ەكولوگيا جانە تابيعي رەسۋرستار ءمينيسترى