ۇلتتىق مۋزەيدە E-museum پورتالىنىڭ رەسمي تانىستىرىلىمى ءوتتى. جوبا ەلىمىزدەگى مۋزەيلەردىڭ بىرىڭعاي تسيفرلىق كەڭىستىگىن قالىپتاستىرۋ ماقساتىندا, مەملەكەت باسشىسى ايقىنداعان مىندەتتەر اياسىندا جۇزەگە اسىرىلىپ وتىر.
قازاقستان رەسپۋبليكاسى پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆا مۋزەي سالاسى ەلدىڭ مادەني-رۋحاني دامۋى مەن تاريحي مۇراسىن ساقتاۋ ءۇشىن ەرەكشە ماڭىزدى ەكەنىن اتاپ ءوتتى. ونىڭ ايتۋىنشا, بۇگىندە جاھاندانۋ مەن تسيفرلاندىرۋ ۇدەرىسى مادەنيەت سالاسىنا دا جاڭا تالاپتار جۇكتەپ وتىر. وسى ورايدا مەملەكەت باسشىسى مادەني مۇرانى تسيفرلاندىرۋعا ەرەكشە كوڭىل بولەتىنى دە ءسوز ەتىلدى.
«ۇلتتىق مۇرامىزدى ساقتاۋ, عىلىمي اينالىمعا ەنگىزۋ جانە كەڭ اۋديتورياعا قولجەتىمدى ەتۋ – مەملەكەتىمىزدىڭ مادەني ساياساتىنىڭ باسىم باعىتتارىنىڭ ءبىرى. مۋزەي سالاسىن تسيفرلاندىرۋ ونىڭ حالىقارالىق دەڭگەيدە تانىلۋىنا جانە ناسيحاتتالۋىنا ەرەكشە اسەر ەتەرى ءسوزسىز», دەدى ا.بالاەۆا.
بۇگىندە ەلىمىزدە 280-نەن استام رەسپۋبليكالىق, وڭىرلىك مۋزەي جانە مۋزەي-قورىق جۇمىس ىستەيدى. مۋزەي قورلارىندا 4,5 ميلليوننان استام ەكسپونات ساقتالعان. مۋزەيلەرگە جىل سايىن 6 ميلليوننان استام ادام كەلەدى.
ايتا كەتەيىك, E-museum پورتالى ەلىمىزدەگى مۋزەي قورلارىن بىرىڭعاي تسيفرلىق پلاتفورماعا بىرىكتىرەدى. اتالعان جوبا مادەني قۇندىلىقتاردى عىلىمي تۇرعىدا سيپاتتاپ, حالىقارالىق مادەني كەڭىستىكتە تانىستىرۋدى ماقسات ەتەدى. سونداي-اق شەتەلدىك مۋزەيلەرمەن, عىلىمي ورتالىقتارمەن, مادەني ۇيىمدارمەن اقپاراتتىق, عىلىمي ىنتىماقتاستىقتى دامىتۋعا ىقپال ەتەدى.
جوبا كەزەڭ-كەزەڭىمەن جۇزەگە اسىرىلىپ, ناقتى ناتيجە كورسەتتى. ماسەلەن, 2023 جىلى جۇيەگە 33 مۋزەي قوسىلدى. 15 مىڭنان استام مۋزەي ەكسپوناتى تسيفرلىق فورماتقا كوشىرىلىپ, 50 ۇشولشەمدى مودەل جاسالدى.
ال 2024 جانە 2025 جىلدار قورىتىندىسى بويىنشا جۇيەگە ەلىمىزدىڭ مەملەكەتتىك مۋزەيلەرى تولىق ەندى. جۇيەگە ەلىمىزدىڭ بارلىق وڭىرىنەن 252 مۋزەي قوسىلدى. تسيفرلىق كاتالوگكە 66 مىڭنان استام مۋزەي قورىنىڭ بىرلىگى ەندى. 750 ۇشولشەمدى مودەل ازىرلەندى. بۇدان بولەك كورەرمەنگە ارنالعان مۋزەي ەكسپوزيتسيالارىنان تۇراتىن 15 ۆيرتۋالدى تۋر بار.
جاڭا جوبا وڭىرلىك مۋزەيلەردىڭ الەۋەتىن ارتتىرىپ, قاشىقتىققا قاراماستان, مادەني مۇرانى قولجەتىمدى ەتۋگە مۇمكىندىك بەرەتىنى ءسوزسىز. E-museum جوباسىنىڭ دامۋى ەلىمىزدىڭ حالىقارالىق مادەني ءيميدجىن نىعايتۋعا سەپ بولادى.