جۋىردا ەلوردانىڭ س.سادۋاقاس ۇلى اتىنداعى №78 مەكتەپ-گيمنازياسىندا استانا قالاسى ءبىلىم باسقارماسى مەن ادىستەمەلىك ورتالىعىنىڭ قولداۋىمەن «سماعۇل سادۋاقاس ۇلى جانە زاماناۋي ءبىلىم بەرۋ قۇندىلىقتارى» اتتى حالىقارالىق عىلىمي-تاجىريبەلىك كونفەرەنتسيا ءوتتى. تاعىلىمدى جيىن كورنەكتى مەملەكەت جانە قوعام قايراتكەرى, الاش قوزعالىسىنىڭ وكىلى, ەكونوميست, جازۋشى ءارى جۋرناليست سماعۇل سادۋاقاس ۇلىنىڭ تۋعانىنا 125 جىل تولۋىنا ارنالدى.
عىلىمي جيىن باستالاردا زيالى قاۋىم مەكتەپ اۋلاسىندا ورناتىلعان قايراتكەردىڭ ءبيۋستىن (اۆتورى تالعات اناربەك) سالتاناتتى تۇردە اشىپ, گۇل شوقتارىن قويدى. كونفەرەنتسيانىڭ پلەنارلىق ماجىلىسىندە مەكتەپ-گيمنازيا ديرەكتورى قارلىعاش جانعازاقوۆا, «قاھارماندار» قوعامدىق قورىنىڭ پرەزيدەنتى, زاڭگەر-عالىم سابىر قاسىموۆ, «قازاق گازەتتەرى» سەرىكتەستىگىنىڭ باس ديرەكتورى, اكادەميك ديحان قامزابەك ۇلى, ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ باس عىلىمي قىزمەتكەرى, پروفەسسور گۇلنار مۇقانوۆا, ل.ن.گۋميلەۆ اتىنداعى ەۇۋ قازاق ادەبيەتى كافەدراسىنىڭ قاۋىمداستىرعان پروفەسسورى, الاشتانۋشى قايىربەك كەمەڭگەر, تاريحشى-عالىم, قاۋىمداستىرىلعان پروفەسسور كۇلپاش ءىلياسوۆا, رف ءسىبىر ءداستۇرلى قولونەر ينستيتۋتىنىڭ پروفەسسورى, پەداگوگيكا عىلىمدارىنىڭ دوكتورى قايىرتاي امىرعازين, تۇركيا ميمار سينان ونەر ۋنيۆەرسيتەتىنىڭ پروفەسسورى, تاريح دوكتورى ابدۋاقاپ قارا, قاجى بايرام ءۋالي ۋنيۆەرسيتەتىنىڭ پروفەسسورى, تاريح دوكتورى گۇلجانات قۇرمانعاليەۆا-ەرجيلاسۋن, موڭعوليانىڭ بايولكە ايماعى ءبىلىم باسقارماسى ءتىل-ادەبيەت اعا ادىسكەرى اسەمگۇل يبراگيمقىزى, قىرعىزستان ق.تىنىستانوۆ اتىنداعى ىستىقكول ۋنيۆەرسيتەتىنىڭ عىلىمي قىزمەتكەرى ازيز اۋباكيروۆ, ش.ءۋاليحانوۆ اتىنداعى تاريح جانە ەتنولوگيا ينستيتۋتى استانا فيليالى ديرەكتورىنىڭ ورىنباسارى سامات جۇماتاي ۇلى, اباي اتىنداعى قازۇپۋ اعا وقىتۋشىسى, PhD تالعات جانىسباي بايانداما جاسادى. عىلىمي جيىنعا استانا حالىقارالىق ۋنيۆەرسيتەتى ونەر جانە گۋمانيتارلىق عىلىمدار جوعارى مەكتەبىنىڭ دەكانى سايات ىبىراي مودەراتورلىق ەتتى.
حالىقارالىق كونفەرەنتسيانىڭ پەداگوگتەرگە ارنالعان ءبولىمى مىنا جۇيەدە عىلىمي-ادىستەمەلىك تالقىلاۋلار جۇرگىزدى: ءبىرىنشى باعىت – «سماعۇل سادۋاقاس ۇلىنىڭ قوعامدىق-ساياسي قىزمەتى جانە الاش ۇلتتىق يدەياسى» (توراعالارى – عاليا جارىمبەت, تاريح ماگيسترى, اقجول مەشىتحان, پەداگوگ-ساراپشى), ەكىنشى باعىت – «س.سادۋاقاس ۇلى مۇراسى جانە زاماناۋي ءبىلىمدى باسقارۋدىڭ جاڭا مودەلدەرى» (توراعالارى – ساۋلەش بايمۇحان, پەداگوگ-زەرتتەۋشى, ەرنار ورازتاي, پەداگوگ-مودەراتور), ءۇشىنشى باعىت – «الاش قايراتكەرلەرى ەڭبەگى جانە قازىرگى ورتا ءبىلىم ماسەلەلەرى» (توراعالارى – ماقپال توقتاسىن, پەداگوگ-ساراپشى, ماعجان عىلىمبەك, پەداگوگ-مودەراتور), ءتورتىنشى باعىت – «ادال ازامات» ءبىرتۇتاس تاربيە باعدارلاماسى جانە سماعۇل سادۋاقاس ۇلى ەڭبەكتەرىندەگى رۋحاني-مادەني تۇتاستىق يدەياسى» (توراعالارى – روزا بەيبىت, پەداگوگ-ساراپشى, ءمادينا قابدەن, مۇعالىم), بەسىنشى باعىت – «سماعۇلتانۋ» زەرتتەۋ ەڭبەكتەرىن ءبىلىم بەرۋ ۇدەرىسىنە ىقپالداستىرۋ: جي مۇمكىندىكتەرى» (توراعالارى – لەنا شامەن, پەداگوگ-زەرتتەۋشى, ۇلپان تۇرعىنبەك, مۇعالىم). مودەراتوردىڭ ءبارى – وسى مەكتەپتىڭ تاريح ءپانى مۇعالىمدەرى.
كونفەرەنتسيانىڭ ناتيجەسىندە سماعۇل سادۋاقاس ۇلىنىڭ اعارتۋشىلىق يدەيالارىنىڭ قازىرگى ءبىلىم بەرۋ جۇيەسىمەن ۇندەستىگى تالقىلانىپ, ۇلتتىق قۇندىلىقتارعا نەگىزدەلگەن ءبىلىم بەرۋدىڭ وزەكتى باعىتتارى ۇسىنىلدى. قاتىسۋشىلار زاماناۋي مەكتەپتە ۇلتتىق-رۋحاني قۇندىلىقتاردى وقىتۋ ادىستەرى, تسيفرلىق ءبىلىم بەرۋ مۇمكىندىكتەرى جانە پەداگوگتەردىڭ كاسىبي دايىندىعىن كۇشەيتۋ جولدارى جونىندە تاجىريبە الماستى.
«مەكتەبىمىزدىڭ س.سادۋاقاس ۇلى مۇراسىن جاڭعىرتۋىنا استانا قالاسى ءبىلىم باسقارماسىنىڭ باسشىسى قاسىمحان سەنعازى ۇلىنىڭ, تانىمال سماعۇلتانۋشىلاردىڭ, وسى ءبىلىم وشاعىنىڭ العاشقى جەتەكشىسى جانار ومىرحانقىزىنىڭ, ديرەكتورىمىز قارلىعاش ەسىمحانقىزىنىڭ ەڭبەگى زور. كونفەرەنتسيانىڭ الاش اماناتى مەن ءبىلىمنىڭ جاڭاشىل باسىمدىقتارىنا ارنالۋى – تاۋەلسىزدىك تالابى», دەيدى وسى مەكتەپ-گيمنازيا ديرەكتورىنىڭ عىلىمي-ادىستەمەلىك جۇمىس جونىندەگى ورىنباسارى جۇلدىز كوكي.
ەسكەرگەن يمانباي
استانا