جىل قورىتىندىلانار شاقتا جىلىساي اۋىلىنىڭ تۇرعىندارى قۋانىشقا كەنەلدى. ول – ەل اسىعا كۇتكەن ەڭسەلى مادەنيەت ءۇيىنىڭ پايدالانۋعا بەرىلۋى. جاڭا عيماراتتىڭ اۋىل ومىرىنە سەرپىن بەرىپ, مادەني شارالاردىڭ التىن ۇياسىنا اينالاتىنىنا سەنىم مول.
الاقانداي اۋىلدىڭ مادەني ءىس-شارالارىنىڭ ۇيىتقىسىنا اينالاتىن زاماناۋي ۇلگىدەگى بۇل نىساننىڭ قۇرىلىسى وتكەن جىلدىڭ كۇزىندە قالانا باستاعان. جالپى اۋماعى 1 500 شارشى مەتردى قۇرايتىن عيماراتتىڭ تالاپقا ساي بوي كوتەرۋىنە بيۋدجەتتەن 1 ملرد 25 ملن تەڭگە بولىنگەن.
سونادايدان كوز تارتارلىق مادەنيەت ۇيىندە كوركەمونەر, بوكس, شاحمات, كۇرەس, باسقا دا سپورتتىق ۇيىرمەلەرگە ارنالعان ارنايى بولمەلەر مەن كىتاپحانا جاساقتالعان. وندا جۇزدەن استام اۋىل بالاسىنىڭ ونەرىن ۇشتاپ, بيىككە سامعاۋىنا جان-جاقتى جاعداي جاسالعان. عيماراتتىڭ سالتاناتتى اشىلۋىنا وبلىستىق ءماسليحاتتىڭ توراعاسى قۋات بايعوجاەۆ, اۋدان اكىمى نۇرباقىت تەڭىزباەۆ, قوعام قايراتكەرى بەكسىرعا دانىشپانوۆ, سونداي-اق ونەر جاناشىرلارى مەن اۋىل تۇرعىندارى قاتىستى.
«بۇل مادەنيەت ءۇيى – اۋىل رۋحانياتىنىڭ جاڭا ورداسى, ونەر مەن شىعارماشىلىقتى وركەندەتەتىن, جاس ۇرپاقتىڭ تالانتىنا جول اشاتىن ماڭىزدى نىسان. ويتكەنى اۋىلدا قالاداعى سياقتى جەكە-جەكە سەكتسيالار اشۋعا مۇمكىندىك جوق. سوندىقتان ءبارى مادەنيەت ۇيىنە شوعىرلانعان. اۋداندا حالىق تەاترى جۇمىس ىستەيدى. اۋىلدارعا شىققان گاسترولدىك ساپارلاردا تەاتر ونەرىن تاماشالاۋعا وسىنداي عيماراتتىڭ جوقتىعى قيىندىق تۋدىراتىن ەدى. ەندى مىنە, اعايىننىڭ مادەني ءىس-شارالاردان شەت قالماۋىنا جاعداي جاسالىپ وتىر», دەيدى كەگەن اۋداندىق مادەنيەت ءۇيىنىڭ ديرەكتورى ەركەبۇلان نۇرباي ۇلى.
ونەرپازدار ونەرىن ۇسىنۋعا قولايلى ساحنا جاسالىپ, ول زاماناۋي قوندىرعىلارمەن جابدىقتالعان. سونىمەن قاتار ماماندارعا ارنالعان بىرنەشە قىزمەتتىك بولمە بار. ءتىپتى اشىق اسپان استىندا ءتۇرلى مادەني شارا وتكىزۋگە ارنالعان الاڭ دا جابدىقتالعان.
بيىل كەرەگە تاۋلى كەگەن اۋدانىندا 3 مادەنيەت ءۇيى پايدالانۋعا بەرىلدى. ال الداعى جىلى تاعى دا قوس عيماراتتىڭ قۇرىلىسىن باستاۋ جوسپارلانعان.
مادەنيەت ءۇيىنىڭ اشىلۋ سالتاناتى فولكلورلىق انسامبل مەن اۋدان ونەرپازدارىنىڭ كونتسەرت باعدارلاماسىنا ۇلاسىپ, تۇرعىنداردىڭ قۋانىشىن اسىردى.
الماتى وبلىسى,
كەگەن اۋدانى