تيىمدىلىگى جوعارى ستارتاپتار

باعدارلاماعا IT-قاۋىم­داستىق جوعارى قىزى­عۋشىلىق تانىتتى. بار­لىعى 160 ءوتىنىم قابىلدا­نىپ, ىرىكتەۋ ناتيجەسىندە 21 جوبا باعدارلاماعا وتكەن ەدى, ال 13 ستارتاپ «Demo Day» اياسىندا قالانىڭ ناقتى مىندەتتەرىنە بەيىمدەلگەن قاناتقاقتى جوبالارىن تانىستىردى. ناتيجەسىن­دە, الەۋەتى جوعارى 8 ستارتاپ SAFE كەلىسىمدەرى شەڭبەرىندە 5 ملن تەڭگەلىك قارجىلاي قول­­داۋعا يە بولدى. ولاردىڭ قاتا­رىندا «OTA», «OQ.AI», «Artisan Education», «Soyleseiyk», «Dronly», «Aman», «Ascle» جانە «U-Drone» ستارتاپتارى بار.

«مۇنداي باستامالار ەلوردا­نىڭ ناقتى ماسەلەلەرىن شەشىپ, تۇرعىنداردىڭ ءومىر ساپاسىن ارتتىرۋعا باعىتتالعان. بىلتىر اكسەلەراتوردىڭ العاشقى لەگى ستارتاپتاردىڭ جەمىستى ناتيجەسىن كورسەتىپ, بىرقاتار شەشىم قالا­لىق قىزمەتكە ەنگىزىلدى. بيىل جاساندى ينتەللەكتىنى قولدانۋعا ەرەكشە ءمان بەرىپ, قالانىڭ نەگىزگى باعىتتارىنىڭ تيىمدىلىگىن ارتتىرۋعا جاڭا قادام جاسادىق. ءبىز ىنتىماقتاستىققا اشىقپىز, ستارتاپتارعا قولداۋ كورسەتۋگە ارقاشان دايىنبىز», دەدى «استانا Innovations» اق باسقارما توراعا­سى عيزات امىرعالي.

تۇسىندىرە كەتەيىك, اكسەلەراتور دەگەنىمىز – ستارتاپتاردى قىسقا مەرزىمدە شيراتىپ, يدەياسىن ناقتى ونىمگە اينالدىرىپ, ونى پراكتيكادا سىناپ كورۋگە كومەكتەسەتىن ارنايى باعدارلاما. ەڭ باستىسى, ستارتاپ ءوز شەشىمىن قاعاز جۇزىندە عانا ەمەس, ناقتى ورتادا ىسكە قوسىپ, تيىمدىلىگىن دالەلدەسە, كەيىن نارىققا ەنگىزىلۋى مۇمكىن.

«Demo Day» ءىس-شاراسىنداعى ۇزدىك جوبالارعا توقتالساق, 13 ستار­تاپ قاۋىپسىزدىك, دەنساۋلىق ساقتاۋ, ءبىلىم, تۋريزم جانە قالا­لىق سەرۆيستەردى دامىتۋ سەكىلدى سالالاردى قامتىدى.

«U-Drone» ستارتاپى جول-كولىك وقيعالارىن درون ارقىلى جەدەل تىركەپ, كەپتەلىستى ازايتۋعا باعىتتالعان تسيفرلىق شەشىم ۇسىندى. ياعني اپات تۋرالى حابار تۇسكەن ساتتە درون وقيعا ورنى­نا جەدەل بارىپ, اۋماقتى اۋە­دەن تولىق تۇسىرەدى, دەرەكتەر 3D-سحەماعا اينالىپ, حاتتاما مەن قاجەتتى قۇجاتتار اۆتو­­ماتتى تۇردە قالىپتاسىپ, بىر­­دەن پوليتسيا جۇيەسىنە جىبەرى­لەدى. وسىلايشا, اپاتتاردى رەسىمدەۋ بىرنەشە ساعاتقا سوزىلماي, 20–30 مينۋتتا اياقتالىپ, كولىكتەردى جولدان دەر كەزىندە الىپ تاستاۋعا بولادى. جوبا «Astana Innovations Accelerator» اياسىندا استانا قالاسىنىڭ پوليتسيا دەپارتامەنتىمەن, سونداي-اق «Kazakhtelecom», «KazGIDromet» سەكىلدى ۇيىمدارمەن بىرلەسىپ سىناقتان ءوتىپ, 3D-سحەمالاردىڭ دالدىگى مەن تسيفرلىق فيكساتسيا­نىڭ تەحنيكالىق جانە قۇقىقتىق تۇرعىدا قولدانۋعا جارامدى ەكەنىن كورسەتكەن.

«AMAN» ستارتاپى بالالار قاۋىپسىزدىگىن تاۋلىك بويى باقىلاپ, بۋللينگ پەن پسيحولوگيالىق قىسىمدى ەرتە انىقتاۋعا باعىت­تالعان تسيفرلىق پلاتفورما ۇسىندى. قوسىمشا ارقىلى اتا-انا بالانىڭ قوزعالىسىن, قاۋىپ­تى ايماقتارعا كىرۋىن, مىنەز-قۇلقى مەن ەموتسيالىق كۇيىندەگى وزگەرىستەردى جانە جەدەل قاۋىپ تۋرالى حابارلامالاردى سمارتفوننان كورە الادى.

دەنساۋلىق ساقتاۋ سالاسىندا «Ascle» اتتى دارىگەردىڭ جاساندى ينتەللەكت نەگىزىندەگى كومەكشىسى قالالىق №4 ەمحانادا قاناتقاقتى رەجىمدە ەنگىزىلدى. جوبا اۆتورلارىنىڭ ايتۋىنشا, بۇگىندە دارىگەر ۋاقىتىنىڭ 40 پايىزدان استامى قۇجات تول­تىرۋعا كەتەدى, بۇل كاسىبي كۇيزە­لىسكە جانە پاتسيەنتتىڭ 1–2 اپتا كەزەك كۇتۋىنە الىپ كەلەدى. سون­دىقتان بۇل شەشىم كۇندەلىكتى ۇدەرىستىڭ بىرقاتارىن اۆتوماتتاندىرىپ, دارىگەردىڭ ۋاقىتىن ۇنەمدەيدى. سىناق بارىسىندا مىڭنان استام سەسسيا وتكىزىلىپ, شەشىمنىڭ مەديتسينالىق مەكەمە جاعدايىنداعى تيىمدىلىگى دالەلدەنگەن.

سول سەكىلدى «EmAI» ستارتاپى جي-تەلەمەديتسينا پلاتفورماسىن جاساپ, پاتسيەنتتىڭ شاعىمىن جاساندى ينتەللەكت ارقىلى تالداپ, سودان كەيىن عانا دارىگەرگە جولدايدى. وسىلايشا, دارىگەر قابىلداۋعا دەيىن دايىن دەرەكپەن الدىن الا تانىسىپ, ۋاقىتىن ءتيىمدى جۇمسايدى, ال ونلاين كونسۋلتاتسيا مەن ۇسىنىس جۇيەدە ساقتالادى.

«OQ.AI» ستارتاپى بولسا, وقۋشىلاردىڭ وقۋ ساۋاتتىلىعى مەن سىني ويلاۋىن دامىتۋعا ارنالعان جاساندى ينتەللەكت پلاتفورماسىن جاساپ شىعارعان. قوسىمشادا وقۋشى ءماتىندى نەمەسە كىتاپتى ىڭعايلى فورماتتا وقىپ, سوڭىنان جاساندى ينتەللەكت قوياتىن سۇراقتارعا جاۋاپ بەرەدى. سۇراقتار بالانىڭ ءتۇسىنۋ, تالداۋ, پايىمداۋ دەڭگەيىن ايقىن­­داپ, ءالسىز تۇستارىن كورسە­تىپ, سوعان ساي تاپسىرما ۇسىنادى. جوبا «Astana Innovations» قول­داۋى­مەن استانانىڭ ەكى اۋدا­نىن­دا قاناتقاقتى رەجىمدە ىسكە اسىرىلىپ, وقۋ ارقىلى ءتۇسىنۋ كورسەتكىشى بالالاردا 60 پايىزعا ارتقانى, مۇعالىمدەردىڭ تەكسەرۋ مەن تالداۋعا كەتەتىن ۋاقىتى الدەقايدا قىسقارعانى انىقتالعان.

ءبىلىم سالاسىنداعى تاعى ءبىر ستارتاپ – «BizoSchool». بۇل جوبا ءار وقۋشىعا بەيىمدەلگەن كونتەنت ارقىلى بالالاردىڭ نازارىن ۇستاپ وتىراتىن پلاتفورمانى ۇسىندى. جۇيە اۋديو, بەينەجازبا نەگىزىندە ساباقتاردى اۆتوماتتى تۇردە قۇراستىرىپ, پەداگوگ اۋىس­سا دا, مەكتەپتە جيناقتالعان ادىستەمەنىڭ جوعالماۋىنا كو­مەكتەسەدى.

ال «Soyleseiyk» ستارتاپى سويلەۋ قابىلەتى دامىماعان بالالارعا ءوز ويىن, ەموتسياسىن جەتكىزۋگە كومەكتەسەتىن بالاما كوممۋنيكاتسيا قوسىمشاسىن ازىرلەگەن. بالا پلانشەتتەن سۋرەتتەردى تاڭداپ, ءسوز تىركەسى نە سويلەم قۇراستىرىپ, دىبىس­تاۋ باتىرماسى ارقىلى ءوز ويىن سىرتقا شىعارادى. قوسىمشا 7 ۇيىم بازاسىندا سىناقتان ءوتىپ, 50-دەن استام بالا قاتىسقان تاجىريبە ناتيجەسىندە ولاردىڭ سوزدىك قورى 75 پايىزعا ارتقانى, سويلەم قۇراۋ جىلدامدىعى 57 پايىزعا وسكەنى انىقتالعان.

باعدارلاما اياسىندا ينجە­نەر­لىك جانە قولدانبالى داعدى­لاردى دامىتۋعا دا ەرەكشە نازار اۋدارىلدى. ماسەلەن, «DRONLY» ستارتاپى درونداردى  ۇشىرۋمەن عانا شەكتەلمەي, ولار­دى باعدارلامالاۋ ارقىلى وقۋ­شى­لاردىڭ ينجەنەرلىك ويلاۋىن دامىتاتىن ءبىلىم  ەكو­جۇيەسىن ۇسىندى. قاناتقاقتى جوباعا 35 وقۋشى مەن 5 پەداگوگ قاتىسقان. سونىمەن قاتار جوبا «NIS IB Astana» مەكتەپتەرى ءۇشىن كەشەندى شەشىم ۇسىنىپ, ورال قالاسىنداعى ەكى مەكتەپكە ەنگىزىلگەن.

ال «Artisan Education» ستارتاپى مەكتەپتەردەگى ينجەنەرلىك جانە روبوتتەحنيكالىق ساباق­تاردى جەڭىلدەتىپ, STEM-ءبىلىم­دى قولجەتىمدى ەتۋدى كوزدەي­تىن مو­دۋلدىك پلاتفورمانى ۇسىن­دى. قوسىمشانىڭ ارقاسىن­دا وقۋ­شىنىڭ نازارى قۇرال-جاب­دىققا ەمەس, ينجەنەرلىك وي­لاۋ­عا اۋادى. «Artisan Edu­cation» پلاتفورماسى استانا­نىڭ ءتورت مەملەكەتتىك مەكتە­بىندە «PiBody» اپپاراتتىق جيىن­تىق­تارىن پايدالانا وتىرىپ سىناق­تان ءوتتى. جوباعا 11 پەداگوگ پەن 7–10 سىنىپتاردان 234 وقۋ­شى قاتىسقان. الىنعان ناتيجە­لەر وقۋشىلاردىڭ جوعا­رى قىزىعۋشىلىعىن كورسەتسە, پەداگوگتەر ساباققا دايىندالۋ ۋاقىتىنىڭ قىسقارعانىن اتاپ ءوتتى.

«OTA» ستارتاپى بولسا «Astana Tourism» ءتۋريزمدى دامىتۋ ورتالىعىمەن بىرلەسىپ قاناتقاقتى جوبانى جۇزەگە اسىردى. جوبا اياسىندا قالا كارتاسى, مارشرۋتتار جانە نەگىزگى تۋريستىك نىسانداردى قامتيتىن ۆەب-ۆيدجەت ازىرلەندى. سىناق كەزەڭىندە بۇل قىزمەتتى 60-تان استام تۋريست پايدالانىپ, ونىڭ قولايلىلىعى مەن پراكتيكالىق تيىمدىلىگى جوعارى باعالاندى.

ال «WeGlobal» ستارتاپى مەكتەپ پسيحولوگتەرىنە كومەك­تەسەتىن جي-پلاتفورما جاساپ, وقۋشىلاردىڭ كۇيزەلىس دەڭگەيى مەن مىنەز-قۇلقىن ناقتى انىقتايدى. وقۋشىلار قو­سىمشا ارقىلى تەست تاپسىرىپ, ءوز جاعدايىن باقىلاپ, كاسىبي باعدار الادى. اتالعان جوبا ەلىمىزدەگى 930-دان استام مەكتەپتە قولدانىلىپ جاتىر.

«Smart Lighting» جوباسى بولسا كوشە شامدارىن قا­شىقتان باقىلاپ, باسقارۋعا جانە جارىق قۋاتىن اۆتوماتتى تۇردە تومەندەتە الاتىن جۇيە­نى ۇسىنىپ, ەلەكتر ەنەر­گيا­سى­نىڭ ارتىق شىعىنىن ازايتۋ­عا باعىتتالعان. استانانىڭ سارى­ارقا اۋدانىندا ەنگىزىلگەن وسى ءبىر جۇيە ەلەكتر ەنەرگياسىن 23 پايىزعا ۇنەمدەيدى.

وسىعان ۇقساس «Esep AI» ستارتاپى تۇرعىن ءۇي-كوممۋنالدىق شارۋاشىلىق تولەمدەرىن اشىق ءارى تۇسىنىكتى ەتۋگە ارنالعان بىرىڭعاي تسيفرلىق پلاتفورمانى ۇسىندى. ءموبيلدى قوسىمشا ارقىلى تۇرعىندار تولەمنىڭ قالاي ەسەپتەلگەنىن كورىپ وتىرادى, قاجەت بولسا, كونسۋلتانتتان ناقتى جاۋاپ الادى. جوبانىڭ يگىلىگىن قازىردىڭ وزىندە 2 مىڭ قولدانۋشى كورىپ وتىر.

ايتا كەتەيىك, «Astana Innova­tions Accelerator» باعدارلاماسىن «Astana Hub», استانا قالاسىنىڭ اكىمدىگى جانە «استانا Innovations» اق بىرلەسىپ جۇزەگە اسىردى.

«اكسەلەراتور جىل سايىن تيىمدىلىگىن ناقتى ناتيجەلەرمەن دالەلدەپ كەلەدى. وسىنداي ۇزدىك ستارتاپتاردى قارجىلاندىرۋ سول جوبالاردىڭ دامۋىن توقتاتپاي, ءارى قاراي وسۋىنە ۇلكەن سەرپىن بەرەدى. قالالىق ورتادا يننوۆاتسيالاردى دامىتۋ بۇگىندە اسا ماڭىزدى, بۇل رەتتە استانانىڭ تاجىريبەسى وزگە قالالارعا جارقىن مىسال بولا الادى», دەدى «Astana Hub» باسقارۋشى ديرەكتورى تاڭات وسكەمباەۆ.