1803 جىلى ۇلىبريتانيا استاناسى لوندون قالاسىندا «رەسەي يمپەرياسىنىڭ كيىم مادەنيەتى» اتتى كىتاپ ۆ.ميللەر جانە باسقا اۆتورلار تاراپىنان جارىق كوردى. بۇل – يمپەريا قۇرامىنداعى حالىقتاردىڭ كيىم-كەشەك مادەنيەتىن باتىس الەمىنە تانىستىرۋدى ماقسات ەتكەن بىردەن-ءبىر ەڭبەك. اعىلشىن جانە فرانتسۋز تىلىندە تۇسىندىرمە بەرىلىپ, ءار حالىقتىڭ كيىم ۇلگىسى تۋرالى اقپارات جەتكىزەتىن ەڭبەكتىڭ ءبىزدىڭ مادەنيەت ءۇشىن ماڭىزى جوعارى. تومەندە كىتاپتا جازىلعان تۇسىندىرمەنى قاز-قالپىندا اۋدارىپ بەرىپ وتىرمىز.
«قازاقتار بۇرىننان بەلگىلى حالىق بولسا دا, ەشقاشان اتاپ ايتىلماعان, ويتكەنى ولار كوشپەلى ومىردە بارىمتانى ءداستۇر ەتكەن.
ولار ءۇش ورداعا (جۇزگە) بولىنگەن, ونىڭ ىشىندە ەكى ءجۇزدىڭ قۇرامى عانا رەسەي وكىمەتىنىڭ قاراماعىندا. بۇلار ورال مەن ەمبى وزەندەرىنىڭ ارالىعىندا جاتقان تەرريتوريانى مەكەندەيدى; بىراق ولار ۇنەمى كوشىپ-قونىپ جۇرەدى جانە ەدىل مەن كاسپي جاعالاۋىندا بارىمتا ارەكەتتەرىن ءجيى جاسايدى.
ولاردىڭ ءجۇرىس-تۇرىسى مەن كەلبەتى تىم ەرەكشە قازاقتاردىڭ الپەتى باسقا تاتار تايپالارى سياقتى اشىق, كوزى كىشكەنتاي بولسا دا, ولار جيناقى كورىنەدى. ات ۇستىندەگى حالىقتىڭ ۇنەمى ءارتۇرلى وقيعالارىمەن الىس-جاقىنعا اتى شىققانىن بىرەۋ بىلسە, بىرەۋ بىلمەس. بۇل بولمىس ولاردىڭ ءومىر ءسۇرۋ داستۇرىنە جانە باتىلدىق پەن داڭق تۋرالى كوزقاراسىنا بايلانىستى بولۋى مۇمكىن. قازاقتاردىڭ ءۇيى تۋرالى ايتساق, تۇرمىسقا قولايلى كيىز ۇيلەردە تۇرادى. ولاردى تىزگىندەپ وتىرۋ ءۇشىن رەسەي وكىمەتى قازاق دالاسىندا كوپتەگەن اسكەري بەكەت سالدى».