مەرەكە قارساڭىندا كوپتەگەن كومپانيالار كورپوراتيۆتىك ءىس-شارالارعا قاتىستى جوسپارلارىن قايتا قاراپ جاتىر. سەبەبى بيىل قىزمەتكەرلەرگە ارنالعان كەشتىڭ قۇنى ءبىر ادامعا شاققاندا 50 مىڭ تەڭگەگە دەيىن قىمباتتاعان, دەپ جازادى Egemen.kz.
باعانىڭ ءوسۋى نارازىلىق تۋدىرىپ وتىر
كەيبىر كومپانيالار ءداستۇرلى كورپوراتيۆتەن مۇلدە باس تارتسا, ال مەرەكەلىك كوڭىل-كۇيدى ساقتاپ قالعىسى كەلەتىندەر شىعىندى قىسقارتۋعا تىرىسىپ جاتىر.
كورپوراتيۆتىڭ ستاندارتتى پاكەتى ادەتتە مىنالاردى قامتيدى:
- ىستىق تاعامدار مەن سالاتتار;
- سۋسىندار (الكوگولدى جانە الكوگولسىز);
- جۇرگىزۋشى مەن ديدجەي;
- فوتو جانە بەينەتۇسىرىلىم;
- شوۋ-باعدارلاما نەمەسە ويىن-ساۋىق بولىگى.
باعالار وڭىرگە جانە اپتانىڭ كۇنىنە بايلانىستى وزگەرىپ وتىرادى. جۇمىس كۇندەرى – 23 مىڭ تەڭگەدەن باستالسا, دەمالىس كۇندەرى – 25 مىڭ تەڭگەدەن باستالادى.
«بارلىعى قىمباتتاپ جاتىر, اسىرەسە اسحانا مەن ءونىم ساتىپ الۋ شىعىندارى, سوندىقتان ءمازىر باعاسى ءوسىپ وتىر», دەيدى مەيرامحانا وكىلدەرى.
رەكوردتىق سومالار
ەڭ جوعارى باعالار الماتىدا بايقالىپ وتىر: مۇندا ستاندارتتى كورپوراتيۆ 30-50 مىڭ تەڭگە ارالىعىندا, ال پرەميۋم نۇسقالارى 100 مىڭ تەڭگەدەن دە اسىپ كەتۋى مۇمكىن. استانادا باعالار 20-70 مىڭ تەڭگە ارالىعىندا قۇبىلىپ تۇر.
قازاقستاننىڭ كوپشىلىك وڭىرلەرىندە كورپوراتيۆ قۇنى 20-40 مىڭ تەڭگە دەڭگەيىندە ساقتالىپ وتىر. ال ەڭ قولجەتىمدى نۇسقالار سەمەي مەن اقتوبەدە انىقتالعان, مۇندا كورپوراتيۆتىك كەشتى ءبىر ادامعا نەبارى 10 مىڭ تەڭگەگە ۇيىمداستىرۋعا بولادى.
قىمباتتاۋدىڭ سەبەبى نەدە؟
ەكونوميستەر كورپوراتيۆ باعاسىنىڭ ءوسۋى ينفلياتسيامەن تىكەلەي بايلانىستى ەمەس ەكەنىن ايتادى. قارجىگەر راسۋل رىسمامبەتوۆتىڭ تۇسىندىرۋىنشە, باستى سەبەپ – سۇرانىستىڭ ارتۋى.
«بارلىعى جەلتوقسان ايىندا مەرەكە وتكىزگىسى كەلەدى, سول سەبەپتى جۇرگىزۋشىلەرگە, شەف-اسپازدارعا جانە مەيرامحانالارعا سۇرانىس ءۇشىن باسەكەلەستىك كۇشەيەدى», دەيدى ول.
وسىلايشا, ماۋسىمدىق باعا ءوسىمى كومپانيالاردىڭ مەرەكەلىك كەزەڭدە قىزمەتكەرلەرىنە جارقىن كەش ۇيىمداستىرۋعا دەگەن ۇمتىلىسىنان تۋىنداپ وتىر.
قاي تۇستاردان ۇنەمدەۋ كوزدەلىپ وتىر؟
كومپانيالار ساپانى تومەندەتپەي, شىعىندى ازايتۋدىڭ جولىن ىزدەپ وتىر. مىسالى, ۇنەمدەۋ ءۇشىن مىنالاردان باس تارتۋى مۇمكىن:
- ينتەراكتيۆتى باعدارلامالاردان;
- بي قويىلىمدارىنان;
- قوسىمشا ارتىستەردەن.
الايدا الكوگول جانە تاجىريبەلى جۇرگىزۋشى تۇرعىسىندا وزگەرىستەر بولا قويمايدى.
«تۇتىنۋشىلار كوبىنە ورتا دەڭگەيدەگى مەيرامحانانى تاڭدايدى, بىراق مىقتى جۇرگىزۋشىنى الادى. باعدارلامادان باس تارتۋى مۇمكىن, الايدا جۇرگىزۋشى مىندەتتى ەلەمەنت», دەيدى شوۋمەن الماس كالەموۆ.
31 ارنانىڭ حابارلاۋىنشا, 2026 جىلى مەرەكەلىك كەشتەردىڭ باعالارى قىمباتتاي تۇسەدى.