پرەزيدەنت قاسىم-جومارت توقاەۆتىڭ جاپونياعا مەملەكەتتىك ساپارى اياسىندا Eurasian Resources Group (ERG) جاپوندىق جەتەكشى كومپانيالارمەن بىرقاتار ستراتەگيالىق كەلىسىمگە قول قويدى. بۇل كەلىسىمدەر قازاقستاننىڭ سيرەك جانە اسا ماڭىزدى مينەرالدار نارىعىنداعى ورنىن نىعايتىپ, جوعارى تەحنولوگيالىق وندىرىستەردى دامىتۋعا سەرپىن بەرەدى, دەپ حابارلايدى Egemen.kz.
ساپار بارىسىندا ERG پەن Mitsubishi Corporation RtM Japan Ltd گاللي جەتكىزىلىمدەرىنە قاتىستى ۇزاقمەرزىمدى كەلىسىمشارت جاساستى. اتالعان جوبا ىسكە اسقان جاعدايدا, قازاقستان الەمدىك گاللي ءوندىرىسى بويىنشا ەكىنشى ورىنعا شىعۋ مۇمكىندىگىنە يە بولادى.
گاللي ءوندىرۋ تەحنولوگياسى «قازاقستان ءاليۋمينيى» اق پاۆلودار اليۋميني زاۋىتىنداعى وندىرىستىك ەرىتىندىلەر نەگىزىندە جۇزەگە اسىرىلادى. بۇل – ERG Research and Development كومپانياسى ازىرلەگەن بىرەگەي تەحنولوگيا. ول نەگىزگى ءونىم – گلينوزەمنىڭ ساپاسىن ارتتىرىپ قانا قويماي, ستراتەگيالىق تۇرعىدا اسا ماڭىزدى ءارى جوعارى ساپالى مەتالل الۋعا مۇمكىندىك بەرەدى.
گاللي وندىرەتىن جاڭا ۋچاسكەنىڭ قۇرىلىسىنا 12,5 ملرد تەڭگەدەن استام ينۆەستيتسيا قۇيىلىپ, 70 جاڭا جۇمىس ورنى اشىلادى. جاڭا ءوندىرىستىڭ جوبالىق قۋاتى – جىلىنا 15 توننا. العاشقى ءونىم 2026 جىلدىڭ ءبىرىنشى توقسانىندا الىنباق. جوبا تولىق ىسكە قوسىلعان سوڭ, قازاقستان گاللي ءوندىرۋ كولەمى بويىنشا الەمدىك كوشباسشىلار قاتارىنا قوسىلادى.
ERG ديرەكتورلار كەڭەسىنىڭ توراعاسى ءارى باس اتقارۋشى ديرەكتورى شۋحرات يبراگيموۆ بۇل جوبانىڭ ستراتەگيالىق ماڭىزىن اتاپ ءوتتى:
– مەملەكەت باسشىسى جولداۋىندا سيرەك كەزدەسەتىن مەتالدار مەن اسا ماڭىزدى مينەرالداردىڭ جاھاندىق ءوندىرىس جانە جەتكىزۋ تىزبەكتەرىندەگى ءرولىن كۇشەيتۋ قاجەتتىگىن ايقىندادى. گاللي – ەلەكترونيكا مەن زاماناۋي تەحنولوگيالار ءۇشىن اسا قاجەت مەتالل. Mitsubishi Corporation RtM Japan Ltd-مەن سەرىكتەستىك وتاندىق ءوندىرىستى دامىتىپ, قازاقستاننىڭ جوعارى تەحنولوگيالىق ماتەريالدار نارىعىنداعى پوزيتسياسىن نىعايتۋعا مۇمكىندىك بەرەدى, – دەدى ول.
سونىمەن قاتار, قازاقستان پرەزيدەنتى قاسىم-جومارت توقاەۆتىڭ جاپونياعا مەملەكەتتىك ساپارى اياسىندا ERG Hitachi جانە Mitsui & Co., Ltd. كومپانيالارىمەن ءوزارا سەرىكتەستىك تۋرالى مەموراندۋمدارعا قول قويدى. بۇل قۇجاتتار وزىق تەحنولوگيالاردى ەنگىزۋ, ءوندىرىستى جاڭعىرتۋ, دەكاربونيزاتسيا جانە «جاسىل» ەكونوميكانى دامىتۋ باعىتتارىن قامتيدى.
ERG پەن Mitsui & Co., Ltd. اراسىنداعى مەموراندۋم تاۋ-كەن بايىتۋ جانە مەتاللۋرگيالىق جابدىقتاردى جاڭعىرتۋ, اۋىر تاۋ-كەن تەحنيكاسىن ەلەكترلەندىرۋ, كۇيدىرۋ ماشينالارىن مودەرنيزاتسيالاۋ ارقىلى كومىرتەگى ءىزىن ازايتۋ جوبالارى اياسىنداعى ىنتىماقتاستىقتى كوزدەيدى.
ال Hitachi Construction Machinery كومپانياسىمەن جاسالعان مەموراندۋم كارەرلىك تەحنيكادا قولدانىلاتىن Hitachi EH4000 جۇك كولىكتەرىن گيبريدتى جۇيەگە كوشىرۋ, جاساندى ينتەللەكت پەن تسيفرلىق تەحنولوگيالاردى ەنگىزۋ ارقىلى تاۋ-كەن جابدىقتارىنىڭ تيىمدىلىگى مەن سەنىمدىلىگىن ارتتىرۋعا باعىتتالعان.
تاراپتار كومىرتەگى ءىزى تومەن ونىمدەردى حالىقارالىق نارىقتارعا جەتكىزۋ, لوگيستيكا مەن جەتكىزۋ تىزبەكتەرىن جەتىلدىرۋ, مينەرالدى رەسۋرستاردى ساتۋ, ساقتاۋ, كەدەندىك جانە كولىك ينفراقۇرىلىمىن دامىتۋ ماسەلەلەرىن بىرلەسە زەردەلەۋگە كەلىستى.
كەزدەسۋلەر قورىتىندىسى بويىنشا شۋحرات يبراگيموۆ سەرىكتەستىكتىڭ ماڭىزىن بىلاي دەپ اتاپ ءوتتى:
– جەتەكشى جاپون كومپانيالارىمەن جاسالعان كەلىسىمدەر ERG دامۋىنىڭ جاڭا كەزەڭىن باستايدى. بۇل ارىپتەستىك تەحنولوگيالىق جاڭعىرۋدى جەدەلدەتىپ, ەكولوگيالىق تازا شەشىمدەردى ەنگىزۋگە جانە قازاقستاندىق ونەركاسىپتىڭ الەۋەتىن كەڭەيتۋگە جول اشادى. قول قويىلعان مەموراندۋمدار مەملەكەت باسشىسىنىڭ ونەركاسىپتىك ەگەمەندىكتى نىعايتۋ جانە جوعارى تەحنولوگيالىق وندىرىستەرگە كوشۋ جونىندەگى تاپسىرمالارىنا تولىق ساي كەلەدى, — دەدى ول.
ERG الداعى ۋاقىتتا دا حالىقارالىق سەرىكتەستەرمەن بىرلەسە وتىرىپ, ءوندىرىس پروتسەستەرىن ترانسفورماتسيالاۋ, كومىرتەگى ءىزى تومەن ونىمدەر شىعارۋ جانە قازاقستاننىڭ ماڭىزدى رەسۋرستار نارىعىنداعى ورنىن نىعايتۋ باعىتىنداعى جۇمىستاردى جالعاستىرا بەرمەك.