قوناەۆ قالاسىندا تۇرعىندار مەن قوناقتارعا ەرەكشە جاڭا جىلدىق كوڭىل-كۇي سىيلاعان ءداستۇرلى مەرەكەلىك شارا ءوتتى. قىسقى كەشتىڭ شىرايىن كەلتىرگەن سالتاناتتى باسقوسۋعا بيىل 15 مىڭنان استام ادام جينالدى, دەپ حابارلايدى Egemen.kz.
مەرەكە بالالارعا ارنالعان ەرتەگىلىك قويىلىممەن باستالىپ, كىشكەنتاي كورەرمەندەرگە شاتتىق پەن قۋانىش سىيلادى. ساحنا تورىندە ونەر كورسەتكەن كەيىپكەرلەر مەن انيماتورلار بالاقايلاردىڭ كوڭىلىن كوتەرىپ, الاڭدى كۇلكى مەن شاتتىققا بولەدى. جينالعان كوپشىلىكتى قوناەۆ قالاسىنىڭ اكىمى اسحات بەردىحانوۆ قۇتتىقتاپ, قالا دامۋىنا ۇلەس قوسىپ جۇرگەن تۇرعىندارعا العىسىن ءبىلدىردى
«بارشاڭىزدى جاڭا جىلدىق شىرشانى جاعۋ مەرەكەسىمەن شىن جۇرەكتەن قۇتتىقتايمىن! ءوتىپ بارا جاتقان جىلدا بىرلەسە اتقارعان ەڭبەگىمىزدىڭ ارقاسىندا قالامىزدى دامىتۋعا باعىتتالعان ماڭىزدى جۇمىستار جۇزەگە استى. الداعى جاڭا جىل ءار شاڭىراققا قۋانىش, جاڭا مۇمكىندىكتەر مەن يگى باستامالار اكەلسىن!» – دەدى شاھار باسشىسى.
قالا اكىمى بالالار ءۇيىنىڭ تاربيەلەنۋشىلەرىمەن بىرگە جاڭا جىلدىق شىرشانىڭ شامىن جاعىپ, ءداستۇرلى راسىمگە قاتىسۋشىلارعا ەرەكشە اسەر سىيلادى. وسى ساتتە اسپاندى جارقىراتا وتشاشۋ اتىلىپ, مەرەكەنىڭ ءسانىن اشا ءتۇستى.
كەش بارىسىندا ساحنادا جەرگىلىكتى ونەرپازدارمەن قاتار تانىمال انشىلەر – سىرىم يساباەۆ, دانا كەنتاي جانە Atlantis Live Band ونەر كورسەتتى. بالالار انيماتورلارمەن بىرگە ويىن ويناپ, مەرەكەنىڭ قىزىعىنا كەنەلدى. تۇرعىندار جارقىراعان شامدارمەن كومكەرىلگەن شىرشالار, اسەم اركالار مەن ءتۇرلى ويىنشىقتارمەن سۋرەتكە ءتۇستى.
قوناەۆ قالاسىندا ورناتىلعان بيىلعى باستى شىرشانىڭ بيىكتىگى 20 مەتردى قۇرايدى. قالاداعى ورتالىق الاڭ, ساياباقتار مەن نەگىزگى كوشەلەر جاڭا جىلدىق ناقىشتا بەزەندىرىلۋدە.
الماتى وبلىسى.