شىعارماشىلىق جانە تىلدىك ماماندىقتار بويىنشا دوكتورانتۋراعا ءتۇسۋ تالاپتارى وزگەرتىلدى. بۇل تۋرالى دەپۋتات اسحات ايماعامبەتوۆ حابارلادى. ونىڭ مالىمدەۋىنشە, وسىعان دەيىن جولداعان دەپۋتاتتىق ساۋالىندا دوكتورانتۋراعا تۇسۋشىلەرگە قويىلاتىن تالاپتاردى قايتا قاراۋ ماسەلەسىن كوتەرگەن, دەپ جازادى Egemen.kz.
قازىرگى تالاپ بويىنشا ماماندىعىنا قاراماستان, بارلىعىنا اعىلشىن ءتىلىن بىلەتىنىن راستايتىن سەرتيفيكات (IELTS جانە ت.ب.) مىندەتتى. بىراق ەندى مىنا ءبىلىم بەرۋ باعدارلامالارىنىڭ توپتارى بويىنشا وقۋعا ءتۇسۋ ءۇشىن شەت ءتىلىن مەڭگەرگەنىن راستايتىن سەرتيفيكات تالاپ ەتىلمەيدى:
D005 – دەنە شىنىقتىرۋ پەداگوگتەرىن دايارلاۋ; D006 – مۋزىكا پەداگوگتەرىن دايارلاۋ; D017 – قازاق ءتىلى مەن ادەبيەتىنىڭ پەداگوگتەرىن دايارلاۋ; D018 – ورىس ءتىلى مەن ادەبيەتىنىڭ پەداگوگتەرىن دايارلاۋ.وزگەرىس جونىندە جازعان جازباسىندا ا.ايماعامبەتوۆ: «ارينە, عىلىمدا اعىلشىن ءتىلىنىڭ ماڭىزى زور. دەگەنمەن, قازاق فيلولوگياسى نەمەسە مۋزىكا سالاسىنداعى تالانتتى زەرتتەۋشىلەردىڭ عىلىمي ەڭبەكتەرى اعىلشىن ءتىلىن تەرەڭ مەڭگەرۋدى تالاپ ەتپەسە دە, تەك شەت ءتىلى سەرتيفيكاتىنىڭ جوقتىعىنان دوكتورانتۋراعا تۇسە الماي جۇرگەن جاعدايلاردى كوردىك. GPT مەن Gemini سياقتى قۇرالدار شىققانعا دەيىن بۇل تالاپتار ورىندى بولسا, قازىر جاعداي وزگەردى. ساۋالىمدا بۇل ماسەلەگە سارالانعان (ديففەرەنتسيالدى) ءتاسىل قولدانۋدى ۇسىندىم. قانداي ناتيجەگە قول جەتكىزدىك؟ عىلىم جانە جوعارى ءبىلىم مينيسترلىگى بۇل باستامانى قولدادى. ءمينيستردىڭ №490 بۇيرىعىمەن ۇلگىلىك ەرەجەلەرگە وزگەرىستەر ەنگىزىلدى», دەپ جازعان.
بۇعان دەيىن دەپۋتات ءوز ساۋالىندا ۇمىتكەردىڭ شىنايى عىلىمي الەۋەتىن باعالاۋ ءۇشىن ءتۇسۋ كەزىندە ەسسە جازۋدىڭ ورنىنا Research Proposal (زەرتتەۋ جوسپارى) دايىنداۋدى ەنگىزۋدى ۇسىنعان ەدى. مينيسترلىك بۇل ۇسىنىستىڭ قابىلداپتى. Research Proposal ەنگىزۋ جانە تاۋەلسىز ساراپشىلاردى تارتۋ نورماسى 2026-2027 وقۋ جىلىنان باستاپ ىسكە قوسۋ جوسپارلانعان.