استانانىڭ سارىارقا اۋدانىندا مەكتەپ وقۋشىلارى اراسىندا «زاڭ جانە ءتارتىپ» قاعيداتى اياسىندا «العىرلار – 2025: يدەيادان بولاشاققا» اتتى وقۋشىلار جوبالارىنىڭ بايقاۋى ۇيىمداستىرىلدى, دەپ حابارلايدى ەلوردا اكىمدىگىنىڭ رەسمي سايتى.
بايقاۋدىڭ ماقساتى – جاسوسپىرىمدەر اراسىندا قۇقىقتىق مادەنيەتتى قالىپتاستىرۋ, ازاماتتىق جاۋاپكەرشىلىكتى ارتتىرۋ جانە قۇقىقبۇزۋشىلىقتىڭ الدىن الۋ.
«بايقاۋعا اۋدانىمىزداعى 33 مەكتەپتىڭ وقۋشىلارى قاتىسىپ وتىر. ءار قاتىسۋشى ءوز جوباسىن ۆيدەو-ەسسە فورماتىندا ۇسىندى. وقۋشىلار مەكتەپتەگى بۋللينگ پەن كيبەربۋللينگ, ينتەرنەت-الاياقتىق جانە كامەلەتكە تولماعاندار اراسىنداعى وزگە دە قۇقىقبۇزۋشىلىقتاردىڭ الدىن الۋ بويىنشا ءوز يدەيالارى مەن ۇسىنىستارىن ورتاعا سالدى. جوبالاردى بەدەلدى قازىلار القاسى باعالايدى. ەڭ باستىسى – بۇل جاي عانا بايقاۋ ەمەس, ءتيىمدى ءارى تىڭ باستامالار الداعى ۋاقىتتا تاجىريبەدە قولدانىلاتىن بولادى», دەدى سارىارقا اۋدانى پروكۋراتۋراسىنىڭ ءبولىم پروكۋرورى قاسىمجومارت بەيسەنباي.