ەقىۇ-نىڭ ءىس باسىنداعى توراعاسى, قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ رەسەي سىرتقى ىستەر ءمينيسترى سەرگەي لاۆروۆپەن, ەقىۇ “ۇشتىگىنە” كىرەتىن ليتۆا سىرتقى ىستەر ءمينيسترى اۋدورنيۋس اجۋباليسپەن جانە قىرعىزستاندىق ارىپتەسى رۋسلان قازاقباەۆپەن تەلەفون ارقىلى سويلەستى, دەپ حابارلادى قر ءسىم-ءىنىڭ ءباسپاسوز قىزمەتى.
اڭگىمەلەسۋشىلەر قىرعىزستاندا 27 ماۋسىمدا وتكەن رەفەرەندۋمنان كەيىنگى جاعداي تۋرالى جانە ونداعى تۇراقتىلىقتى نىعايتۋعا باعىتتالعان ۇيلەسىمدى ءىس-ارەكەتتەر جونىندە پىكىر الماستى. ق.ساۋداباەۆ اتاپ ءوتكەندەي, قازاقستان پرەزيدەنتى ن.نازارباەۆتىڭ پىكىرىنشە, قىرعىز رەسپۋبليكاسىنىڭ ۇزاق مەرزىمدى تۇراقتىلىق پەن بىرقالىپتى ساياسي دامۋى مەملەكەتتىڭ ەكونوميكالىق دامۋ ستراتەگيالىق باعدارلاماسىنسىز مۇمكىن ەمەس, ال قازاقستان مۇنداي ەكونوميكالىق ستراتەگيانى جاساپ شىعۋعا جانە ءىس جۇزىندە جۇزەگە اسىرۋعا ءوز كومەگىن كورسەتۋگە دايىن.