قوناەۆ قالاسىندا توتەنشە جاعداي رەجيمى جاريالاندى. بۇل تۋرالى الماتى وبلىسى اكىمدىگىنىڭ ءباسپاسوز قىزمەتى حابارلادى, دەپ جازادى Egemen.kz.
اكىمدىكتىڭ ايتۋىنشا, قالانىڭ كوممۋنالدىق قىزمەتتەرى كۇشەيتىلگەن رەجيمدە جۇمىس ىستەپ جاتىر. قازىرگى تاڭدا قوناەۆتاعى جاعداي تۇراقتى: ەلەكتر ەنەرگياسى, سۋ جانە جىلۋمەن قامتۋ شتاتتىق رەجيمدە جۇزەگە اسىرىلىپ جاتىر.
اكىمدىك قوناەۆ قالاسىندا 12 جەلتوقسانعا قاراعان ءتۇنى قاتتى جەلدىڭ سالدارىنان (جەلدىڭ ەكپىنى سەكۋندىنا 25 مەتردەن اسقان) بىرقاتار تۇرعىن ءۇي مەن عيمارات شاتىرلارى زاقىمدالىپ, كوشەدەگى جارىقتاندىرۋ باعانالارى ىستەن شىققان.
«قازاقستان رەسپۋبليكاسىنىڭ قولدانىستاعى زاڭناماسىنا («ازاماتتىق قورعاۋ تۋرالى», «جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى» زاڭدار) سايكەس قوناەۆ قالاسىنىڭ اكىمى جەرگىلىكتى اۋقىمداعى تابيعي سيپاتتاعى توتەنشە جاعداي جاريالاۋ تۋرالى شەشىم قابىلدادى. 17 جەلتوقساننان باستاپ جەرگىلىكتى دەڭگەيدەگى توتەنشە جاعداي رەسمي تۇردە جاريالاندى», دەلىنگەن حابارلامادا.
زاقىمدانعان نىسانداردى جوندەۋ جۇمىستارى توتەنشە جاعداي رەزەرۆى قاراجاتى ەسەبىنەن جۇرگىزىلەدى.
ايتا كەتەيىك, قوناەۆ قالاسىندا قاتتى جەلدىڭ سالدارىنان قالاداعى ەلەكتر قۋاتى ءوشىپ, شاتىرلار ۇشىپ, اعاشتار قۇلاعان, ينجەنەرلىك جەلىلەر زاقىمدالىپ, جىلۋمەن قامتۋ جۇيەسىندە ىركىلىستەر بولعان. سونىمەن قاتار جەكە تۇرعىن ۇيدە ءورت شىعىپ, ساياجاي القاپتارىندا ءتۇرلى اپاتتار بولعان.