تۇركىستان وبلىسىندا «بايدىبەك-اتا» جانە «قاراقۋىس» سۋ قويمالارىنىڭ قۇرىلىسى جالعاسىپ جاتىر. كولەمى 68 ملن تەكشە مەتر بولاتىن «بايدىبەك-اتا» سۋ قويماسى تۇركىستان وبلىسىنىڭ بايدىبەك اۋدانىندا, بالابوگەن مەن ۇلكەن بوگەن وزەندەرىنىڭ قوسىلاتىن جەرىندە ورنالاسقان, دەپ جازادى Egemen.kz.
«بايدىبەك-اتا» سۋ قويماسى بوگەتىنىڭ ۇزىندىعى – 1,75 شاقىرىم, بيىكتىگى – 26 مەتر.
بۇل نىسان تاسقىن سۋىن جيناپ, ۆەگەتاتسيا كەزەڭىندە قوسىمشا سۋ كولەمىن بوگەن سۋ قويماسىنا ءتيىمدى باعىتتاۋعا مۇمكىندىك بەرەدى. قازىرگى تاڭدا جوبا بويىنشا قۇرىلىس جۇمىستارىنىڭ 75 پايىزى اياقتالعان.
«بايدىبەك-اتا» سۋ قويماسىنان بوگەن سۋ قويماسىنا سۋ بەرۋ ءۇشىن «سارقىراما» كانالى سالىنىپ جاتىر. ۇزىندىعى 21,7 شاقىرىم بولاتىن بۇل كانال سەكۋندىنا 12 تەكشە مەترگە دەيىن سۋ وتكىزە الادى جانە 2,5 مىڭ گەكتار سۋارمالى القاپتى سۋمەن قامتاماسىز ەتەدى. بۇگىندە ۇزىندىعى شامامەن 21 شاقىرىم بولاتىن ۋچاسكەدە جۇمىستار تولىق اياقتالعان.
ال كولەمى 1,2 ملن تەكشە مەتردى قۇرايتىن «قاراقۋىس» سۋ قويماسى تۇركىستان وبلىسىنىڭ تولەبي اۋدانىندا سالىنىپ جاتىر. قازىرگى ۋاقىتتا قۇرىلىس-مونتاج جۇمىستارى 90 پايىزعا اياقتالعان. بۇل نىسان 500 گەكتار سۋارمالى جەردى سۋمەن قامتۋعا مۇمكىندىك بەرەدى.
«بارلىق جۇمىس زاماناۋي ساپا ستاندارتتارىنا ساي جۇرگىزىلىپ جاتىر. جاڭا سۋ قويمالارى تاسقىن جانە ەرىگەن قار سۋىن ءتيىمدى پايدالانۋعا جول اشادى. بۇل – سۋ رەسۋرستارى ازايىپ جاتقان جاعدايدا اسا ماڭىزدى. قوسىمشا سۋارمالى القاپتاردى يگەرۋگە, سونداي-اق بوگەن سۋ قويماسىنداعى سۋ دەڭگەيىن قاۋىپسىز رەتتەۋگە مۇمكىندىك تۋادى. اۋىل شارۋاشىلىعى, بالىق شارۋاشىلىعى, مال شارۋاشىلىعى مەن ءتۋريزمدى دامىتۋعا قولايلى جاعداي جاسالادى. گيدرولوگيالىق ەسەپتەۋلەرگە سايكەس بوگەن وزەنى ارقىلى ورتاشا جىلدىق سۋ اعىنى 165 ملن تەكشە مەترگە جەتەدى. سوندىقتان بۇل سۋدى جيناپ, ازاماتتاردىڭ قاجەتتىلىگىنە باعىتتاۋ كەرەك», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.