ەلىمىزدە كولىك قىزمەتتەرى نارىعى 20,3%-عا ۇلعايىپ, ەكونوميكانىڭ باستى قوزعاۋشى كۇشتەرىنىڭ بىرىنە اينالدى. 11 ايدىڭ قورىتىندىسى بويىنشا جولاۋشىلار اعىنى 11,9%-عا ءوسىپ, 1,76 ملرد ادامدى قۇرادى, دەپ حابارلايدى Egemen.kz.
پرەزيدەنتتىڭ ينفراقۇرىلىمدى دامىتۋ جانە ترانزيتتىك الەۋەتتى ارتتىرۋ جونىندەگى تاپسىرمالارى اياسىندا كولىك سەكتورى جوعارى كورسەتكىشتەرگە قول جەتكىزدى. كولىك ۆيتسە-ءمينيسترى ماقسات قالياقپاروۆتىڭ مالىمدەۋىنشە, بۇل وسىمگە تاۋ-كەن, مۇناي-گاز جانە اگرارلىق سەكتورلاردىڭ قارقىندى دامۋى تىكەلەي اسەر ەتكەن.
وڭىرلەر اراسىندا استانا قالاسى ۇزدىك ناتيجە كورسەتىپ, تاسىمال مەن قويما قىزمەتتەرى بويىنشا 154,1%-عا ءوستى. سونداي-اق جەتىسۋ (136,6%) جانە قوستاناي وبلىستارى (133,8%) دا جوعارى دامۋ قارقىنىن يەلەندى.
«تاسىمال كولەمى ەكونوميكانىڭ جاعدايىن كورسەتەدى جانە نەگىزگى كورسەتكىشتەردىڭ باسىم بولىگى بويىنشا ءوسىم بايقالادى. جۇك تاسىمالى كولەمىنىڭ ارتۋى ەكونوميكانىڭ بازالىق سالالارىنىڭ دامۋى ەسەبىنەن قامتاماسىز ەتىلدى», دەدى ۆيتسە-مينيستر.