باتىس قازاقستان وبلىسىندا اۋا رايىنىڭ قولايسىزدىعىنان ءۇش ادامدى ۇسىك شالىپ, كوز جۇمدى. ءتۇرلى اۋداننىڭ تۇرعىندارى ءىز-ءتۇزسىز جوعالىپ كەتكەن, دەپ حابارلايدى Egemen.kz «موي گورود»-قا سىلتەمە جاساپ.
باتىس قازاقستان وبلىسى پوليتسيا دەپارتامەنتىنىڭ ءباسپاسوز قىزمەتىنىڭ مالىمەتىنشە, 15 جەلتوقساندا اۋا رايىنىڭ قولايسىزدىعىنان جوعالىپ كەتكەن ءۇش ادامنىڭ ءمايىتى تابىلدى. ولار – جانىبەك اۋدانىنىڭ 57 جاستاعى تۇرعىنى, بوكەيوردا اۋدانىنىڭ 25 جاستاعى تۇرعىنى جانە كازتالوۆ اۋدانىنىڭ 35 جاستاعى تۇرعىنى. بارلىعى ۇسىك شالىپ, كوز جۇمعان.
اقجايىق اۋدانىنىڭ تاعى ءبىر 54 جاستاعى تۇرعىنى امان-ەسەن تابىلدى, بىراق اياق-قولدارى ءۇسىپ قالعان. ول ورالعا جەتكىزىلدى.
سونىمەن قاتار جانىبەك اۋدانىنىڭ 59 جاستاعى تۇرعىنى دا جوعالىپ كەتكەن. ول 13 جەلتوقساندا ساعات 21:00 شاماسىندا بۇقار قىستاعىنان شىعىپ كەتكەن.
ونى قۇتقارۋشىلار, اسكەري قىزمەتكەرلەر, پوليتسيا قىزمەتكەرلەرى جانە جەرگىلىكتى اكىمدىك قىزمەتكەرلەرى ىزدەستىرىپ جاتىر.