قازاقستاننىڭ دايىن ءونىم ەكسپورتى وزبەكستانمەن سالىستىرعاندا بىرنەشە ەسە جوعارى. بۇل تۋرالى وزبەك ەكونوميسى, ەكونوميكالىق دامۋعا جاردەمدەسۋ ورتالىعىنىڭ ديرەكتورى يۋلي يۋسۋپوۆ «Seredin» پودكاستىندا ايتتى, دەپ حابارلايدى Egemen.kz.
ەكونوميست قازاقستان مەن وزبەكستان ەكونوميكالارىن ءجيى سالىستىرۋ ماسەلەسىنە توقتالىپ, ەكسپورت قۇرىلىمى مەن دايىن ءونىم ءوندىرىسىنىڭ كولەمىنە نازار اۋداردى. ونىڭ ايتۋىنشا, قازاقستاندا ەل ەكونوميكاسى مەن مەملەكەتتىك شىعىستارعا قاتىستى سىن ءجيى ايتىلعانىمەن, وبەكتيۆتى كورسەتكىشتەر ەلدىڭ الدەقايدا تۇراقتى پوزيتسيادا ەكەنىن كورسەتەدى.
«ەگەر ساۋدا اينالىمىنا قاراساڭىز, قازاقستاننان وزبەكستانعا ەكسپورت كولەمى بىزدەن قازاقستانعا باراتىن ەكسپورتتان ايتارلىقتاي جوعارى. دەمەك, قازاقستاندىقتاردىڭ ساتاتىن ءونىمى بار», دەدى يۋلي يۋسۋپوۆ.
ەكونوميست بۇل ايىرماشىلىقتار كوبىنە تابيعي رەسۋرستارعا بايلانىستى ەكەنىن اتاپ ءوتتى. الايدا سوعان قاراماستان, قازاقستان وڭدەلگەن, دايىن ءونىم ەكسپورتى بويىنشا ءابسوليۋتتى كورسەتكىشتەردە جوعارى ناتيجە كورسەتىپ وتىر.
«ەكسپورت قۇرىلىمىن سالىستىرساق, قازاقستاندا تابيعي رەسۋرستاردىڭ ۇلەسى جوعارى ەكەنى انىق. بىراق سوعان قاراماستان, ەگەر دايىن ءونىم ەكسپورتىن ءابسوليۋتتى ماندە, ياعني ميللياردتاعان دوللارمەن ەسەپتەسەك, قازاقستاننىڭ دايىن ءونىم ەكسپورتى وزبەكستاننان ايتارلىقتاي, بىرنەشە ەسە ارتىق», دەدى ول.
يۋسۋپوۆتىڭ ايتۋىنشا, بۇل جاعداي قازاقستاننىڭ شيكىزات ەكسپورتىنا تاۋەلدىلىگى جوعارى بولعانىنا جانە وزبەكستان حالقىنىڭ سانى قازاقستانعا قاراعاندا شامامەن ەكى ەسە كوپ ەكەنىنە قاراماستان جۇزەگە اسىپ وتىر.
ء«بىز قازاقستانعا قاراعاندا شيكىزات ەكسپورتىنا ونشا تاۋەلدى ەمەسپىز. سوعان قاراماستان, قازاقستان دايىن ءونىمدى بىرنەشە ەسە كوپ وندىرەدى», دەپ تۇيىندەدى ەكونوميست.
پودكاست بارىسىندا سونداي-اق قوعامداعى ەكونوميكالىق جاعدايعا قاتىستى قابىلداۋ ناقتى ماكروەكونوميكالىق كورسەتكىشتەرمەن ءاردايىم سايكەس كەلە بەرمەيتىنى, اسىرەسە ورتالىق ازيا ەلدەرىن سالىستىرۋ كەزىندە بۇل انىق بايقالاتىنى ايتىلدى.