قالالىق ءماسليحات دەپۋتاتى تالعات ەرعاليەۆ Instagram پاراقشاسىندا جازبا جاريالاپ, بۇعان دەيىن ايتقان اقپاراتىنىڭ دۇرىس ەمەس ەكەنىن مويىنداعان. ول ەلورداداعى قىلمىس دەڭگەيى جوعارى دەگەن بۇرىنعى مالىمدەمەسى ءۇشىن كەشىرىم سۇرادى, دەپ حابارلايدى Egemen.kz.
«وكىنىشكە وراي, بۇل اقپارات كومەكشىم تاراپىنان قۇزىرلى ورگاندارعا جۇگىنبەي دايىندالعان. ىشكى ىستەر مينيسترلىگىنىڭ رەسمي دەرەكتەرىنە سايكەس, استانا – قىلمىس دەڭگەيى تومەن, قاۋىپسىزدىگى جوعارى قالا», دەپ جازدى ت. ەرعاليەۆ.
ونىڭ ايتۋىنشا, ءماسليحات سەسسياسىندا كوتەرگەن ساۋالىنىڭ نەگىزگى ماقساتى – ءوزى دەپۋتات بولىپ تابىلاتىن 16-شى وكرۋگ تۇرعىندارىنىڭ ءومىر ءسۇرۋ جاعدايىن جانە ينفراقۇرىلىمدى جاقسارتۋ بولعان.
ء«ماسليحات دەپۋتاتى رەتىندە ەلوردا اكىمدىگىمەن جانە پوليتسيا دەپارتامەنتىمەن بىرلەسە وتىرىپ, ىشكى ىستەر ورگاندارىنىڭ ينفراقۇرىلىمىن دامىتۋ, ماتەريالدىق-تەحنيكالىق بازانى نىعايتۋ, قىزمەتكەرلەردىڭ الەۋمەتتىك قورعالۋىن ارتتىرۋ جانە پوليتسەيلەردىڭ بەدەلىن كوتەرۋ باعىتىنداعى جۇمىستى جالعاستىرامىز», دەدى دەپۋتات.
تالعات ەرعاليەۆ بۇعان دەيىن استانا ءماسليحاتى سەسسياسىندا ءسوز سويلەپ, باس شاھاردا قىلمىس دەڭگەيى جوعارى ەكەنىن مالىمدەگەن.
ال قالالىق پوليتسيا دەپارتامەنتى ەلورداداعى قىلمىس دەڭگەيى دەپۋتات ايتقان كورسەتكىشتەردەن ەداۋىر تومەن ەكەنىن حابارلادى.