الماتى قالاسىنىڭ پوليتسياسى تۋريستىك قىزمەت كورسەتۋمەن اينالىساتىن Abylai tours كومپانياسىنا قاتىستى قىلمىستىق ءىس قوزعادى. بۇل تۋرالى ۆەدومستۆونىڭ ءباسپاسوز قىزمەتى ايتتى, دەپ حابارلايدى Egemen.kz.
الەۋمەتتىك جەلىدە الماتى تۇرعىنى اتالعان تۋرفيرماعا شەتەلگە ساياحات ءۇشىن 1,2 ملن تەڭگە تولەگەنىن, الايدا كورسەتىلۋى ءتيىس قىزمەت – جولداما دا, اقشانىڭ قايتا قايتارىلۋى دا ورىندالماعانىن جازعان. ونىڭ شاعىمىنان كەيىن باسقا ازاماتتار دا تۋراگەنتتىككە قاتىستى نارازىلىقتارىن بىلدىرگەن.
پوليتسيا دەپارتامەنتى 10-نان استام ادامنان Abylai tours تۋرالى ارىز تۇسكەنىن راستادى. قازىرگى تاڭدا كومپانيانىڭ ارەكەتىنە قاتىستى تەرگەۋ باستالدى.
– اۋەزوۆ اۋداندىق پوليتسيا باسقارماسىندا قر قىلمىستىق كودەكسىنىڭ 190-بابى – الاياقتىق – بويىنشا ءىس تىركەلدى. قازىر تەرگەۋ امالدارى ءجۇرىپ جاتىر. ونىڭ ناتيجەسى بويىنشا پروتسەسسۋالدىق شەشىم قابىلدانادى, – دەپ حابارلادى الماتى قالالىق پوليتسيا دەپارتامەنتى.
تۇرعىندارعا قانداي دا ءبىر تۋريستىك كومپانيانىڭ قىزمەتىن پايدالانباس بۇرىن, ونىڭ ليتسەنزياسى مەن بەدەلىن مۇقيات تەكسەرۋ ۇسىنىلادى.