«سيللەنو» جشس-ءنىڭ ءباسپاسوز قىزمەتىنەن ءمالىم ەتكەندەي, ءىرى گاباريتتى باعانالاردى دايىنداۋ ءۇشىن جەرگىلىكتى زاۋىتپەن كەلىسىمشارت جاسالعان. قازىر «اتىراۋمۇنايماش» جشس-ءنىڭ قىزمەتكەرلەرى تەحنيكالىق كۇردەلىلىگى جوعارى ءىرى گاباريتتى ەكى باعانانى قۇراستىرىپ جاتىر, دەپ حابارلايدى Egemen.kz.
«جابدىقتىڭ ءبىرى – ەتيلەندى ءبولۋ باعاناسى (Ethylene Fractionator). ونىڭ سالماعى – 1 470 توننا, بيىكتىگى – 101 مەتر. وسى كەزگە دەيىن بۇل باعانانى قۇراستىرۋ جۇمىسى 78 پايىزعا ورىندالدى. ەكىنشىسى – سۋىتۋ باعاناسى (Quench Tower). اتالعان جابدىقتىڭ سالماعى – 700 توننا, بيىكتىگى – 51 مەتر. دايىندىق دەڭگەيى 55 پايىزدى قۇرايدى», دەپ حاباردار ەتتى كومپانيانىڭ ءباسپاسوز قىزمەتى.
بۇل باعانالار پيروليز قوندىرعىسىنىڭ قۇرامىنا كىرەدى. ءدال وسى قوندىرعىدا ەتان پوليەتيلەن ءوندىرىسىنىڭ نەگىزگى ءونىمى – ەتيلەنگە اينالادى. قوندىرعىلاردى مونتاجداۋ 2026 جىلعا جوسپارلانىپ وتىر.
«اتىراۋداعى اتالعان كاسىپورىن سۋ دايىنداۋ جۇيەسىندە ەرىگەن گازداردى جويۋعا ارنالعان تاعى ءبىر ماڭىزدى ەلەمەنت – دەاەراتور جابدىعىن ازىرلەۋگە تاپسىرىس الدى. «اتىراۋمۇنايماش» جشس-مەن ىنتىماقتاستىقتىڭ بىرنەشە سەبەبى بار. بىرىنشىدەن, وتاندىق وندىرۋشىلەر قازاقستانداعى ءىرى مۇناي-گاز حيمياسى جوبالارىنىڭ ءبىرىن ىسكە اسىرۋعا قاتىسادى. ەكىنشىدەن, جەرگىلىكتى قامتۋ ۇلەسىن ارتتىرۋعا ىقپال ەتەدى», دەپ مالىمدەدى ءباسپاسوز قىزمەتىنەن.