الماتى-2 تەمىرجول بەكەتىندە تابيعي گازدان ۋلانۋ دەرەگى تىركەلىپ, جەدەل جاردەم قىزمەتى شۇعىل تۇردە وقيعا ورنىنا جەتتى. قوعامدىق دەنساۋلىق ساقتاۋ باسقارماسىنىڭ مالىمەتىنشە, بارلىعى 52 ادامعا مەديتسينالىق كومەك كورسەتىلدى. جاپا شەككەندەردىڭ اراسىندا ەكى بالا بار, ولار قازىر جانساقتاۋ بولىمىندە جاتىر, دەپ حابارلايدى Egemen.kz.
وقيعا بولعان ۆاگوندار «جولاۋشىلار تاسىمالى» اق-نا تيەسىلى ەمەس ەكەنى انىقتالدى. ولار جەكە مەنشىك تاسىمالداۋشىنىڭ مەنشىگىندە بولىپ, كينوستۋدياعا ءتۇسىرىلىم جاساۋ ماقساتىندا ۋاقىتشا بەرىلگەن. قازىر بارلىق جاعدايدى ءتيىستى ورگاندار جان-جاقتى تەكسەرىپ جاتىر.
دارىگەرلەر 10 بالانى ستاتسيونارعا جاتقىزعان. ولاردىڭ ەكەۋى اۋىر حالدە جانساقتاۋ بولىمىندە, قالعاندارى بەيىندى بولىمشەلەردە ەم قابىلداپ جاتىر. باسقا ازاماتتارعا العاشقى كومەك كورسەتىلىپ, امبۋلاتورلىق باقىلاۋعا جىبەرىلگەن.
قوعامدىق دەنساۋلىق ساقتاۋ باسقارماسى قاجەتتى مەديتسينالىق كومەكتىڭ تولىق كورسەتىلىپ جاتقانىن حابارلادى.