ءماجىلىس دەپۋتاتى ءابۋتالىپ ءمۇتالى پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆكە رەسمي ساۋال جولداپ, ەلىمىزدىڭ تولىق تسيفرلانۋى ءۇشىن ۇلتتىق چيپتەر ديزاينىن دامىتۋ قاجەتتىگىن ايتتى, دەپ حابارلايدى Egemen.kz.
ونىڭ ايتۋىنشا, مەملەكەت باسشىسى قويعان جاساندى ينتەللەكت پەن تولىق تسيفرلاندىرۋ مىندەتتەرى ميكروسحەمالاردى جوبالاۋ سالاسىنسىز ورىندالمايدى.
دەپۋتات قازىرگى ميكروسحەمالاردىڭ ماڭىزىنا توقتالىپ, ولاردىڭ تۇرمىستىق تەحنيكادان باستاپ قاۋىپسىزدىك جۇيەلەرى, كولىك جانە مەملەكەتتىك قىزمەتتەرگە دەيىنگى بۇكىل تسيفرلىق ينفراقۇرىلىمنىڭ نەگىزى ەكەنىن ايتتى.
«بۇل باعىتتى جەتىلدىرمەي, شىنايى تسيفرلىق ەگەمەندىك تۋرالى ايتۋ قيىن. حالىقارالىق تاجىريبەگە سۇيەنسەك, چيپتەر ديزاينى يندۋسترياسىن دامىتۋ ءۇشىن مىندەتتى تۇردە ءوز فابريكالارىمىزدىڭ بولۋى شارت ەمەس. مىسالى, وندىرىستىك بازاسى بولماعانىنا قاراماستان بريتاندىق ARM كومپانياسى بۇگىندە الەمدەگى سمارتفونداردىڭ 95%-نىڭ ارحيتەكتۋرالىق نەگىزىن قالىپتاستىرىپ وتىر. سول سياقتى, نارىقتىق كاپيتاليزاتسياسى 4 تريلليون دوللاردان اسقان NVIDIA كومپانياسىنىڭ دا ءوز ءوندىرىس ورىندارى جوق, بىراق الەمدەگى ەڭ ءىرى ميكروسحەما ءوندىرۋشىسى. قازاقستاننان وسىنداي نارىقتارعا جاڭا ويىنشىلاردى شىعارۋ – ستراتەگيالىق ماڭىزى زور مىندەت», دەدى ول.
ازىرگە قازاقستاندا ميكروسحەمالاردى جوبالاۋ جانە سىناقتان وتكىزۋگە ارنالعان زەرتحانا, ينفراقۇرىلىم, ءبىلىم بەرۋ باعدارلامالارى مەن ينجەنەرلىك كادرلار جەتكىلىكسىز. ۋنيۆەرسيتەتتەر مەن ءوندىرىس اراسىنداعى بايلانىس تا ءالسىز. سونىڭ سالدارىنان ەلىمىز دايىن ميكروسحەمالاردى يمپورتتاۋعا تاۋەلدى بولىپ وتىر جانە جاھاندىق جارتىلاي وتكىزگىشتەر نارىعىنان شەت قالىپ كەلەدى.
دەپۋتاتتىڭ ايتۋىنشا, بۇل نارىقتىڭ كولەمى قازىر جۇزدەگەن ميلليارد دوللارمەن ولشەنەدى, ال 2030 جىلدارى ونىڭ مولشەرى 1-2 تريلليون دوللارعا دەيىن وسەدى دەپ كۇتىلەدى.
ول ۇكىمەتكە چيپتەر ديزاينى بويىنشا كەشەندى مەملەكەتتىك ساياسات ازىرلەۋدى ۇسىندى.
«كەشەندى مەملەكەتتىك ساياسات اياسىندا ۋنيۆەرسيتەتتەر مەن كوللەدجدەردە زەرتحانالار اشۋ, ميكروسحەمالاردىڭ ۇلتتىق ديزاين-ورتالىعىن قۇرۋ, جوبالاۋ جانە تەستىلەۋ ينفراقۇرىلىمىن دامىتۋ, عىلىمي جوبالار مەن ستارتاپتاردى قولداۋ, سونداي-اق ميكروسحەمالاردى جوبالاۋ بويىنشا وقۋ باعدارلامالارىن ەنگىزۋ كوزدەلۋى ءتيىس. ءدال وسى بازالىق ينفراقۇرىلىمدى قۇرۋ ەلىمىزدىڭ شىنايى ءارى تۇراقتى تسيفرلاندىرۋىن قامتاماسىز ەتەدى», دەپ تۇيىندەدى دەپۋتات.