استانا – تاۋەلسىز ەلىمىزدىڭ بويتۇمارى, حالقىمىزدىڭ ماقتانىشى. سوندىقتان دا جىل سايىن قازاقستاندىقتار ونىڭ شىلدە ايىنداعى مەرەيلى مەرەكەسىن جارقىن كوڭىل-كۇيمەن اتاپ ءوتتى. ءوز بولاشاقتارىن ارۋ شاھاردىڭ ەرتەڭىمەن, ونىڭ گۇلدەنىپ, كوركەيۋىمەن بايلانىستىرادى. وسىنىڭ دالەلىندەي, اقىندار مەن باتىرلاردىڭ مەكەنى سانالاتىن جامبىل اۋدانىنىڭ جۇرتشىلىعى “استانا – وتانىمىزدىڭ جۇرەگى, تاۋەلسىزدىگىمىزدىڭ تىرەگى” اتتى تاقىرىپتا سالتانات شىرايىن شالقىتتى.
قاراساي باتىر اتىنداعى ورتالىق الاڭدا وتكەن مەرەكەگە ۇلكەن-كىشى جينالىپ, ەگەمەن ەلىمىزدىڭ مەملەكەتتىك رامىزدەرىن كوككە كوتەردى. استانامەن قۇرداس 70 بالعىن, وسىنشا دومبىراشىلار مەن ءانشى-بيشىلەر توبى جينالعان جۇرتشىلىق الدىندا ونەر كورسەتىپ, كوپشىلىك كورەرمەننىڭ زور ءىلتيپاتىنا بولەندى. الاڭدا جىر الىبى ءسۇيىنباي مەن جامبىلدىڭ, ۇمبەتالىنىڭ, ءباھادۇر باتىرلار قاراساي, ناۋرىزباي, سۇرانشىنىڭ بەينەلەرى اسقاقتاپ, “وتانىڭ – بىرەۋ, جۇرەگىڭ – بىرەۋ, تۋ – بىرەۋ”, “ارمان قالا, اق قالا, كوركەيە بەر, استانا”, “بار الەمدى قاراتقان, دوستىعىمىز جاراسقان”, تاعى باسقا ايشىقتى بەزەندىرۋلەر مەرەكەنىڭ ءمان-ماڭىزىن اشا ءتۇستى.
“بىرلىگىمىز جاراسقان” اكتسياسى اياسىندا وتكەن مەرەكەدە جامبىل اۋدانىنىڭ اكىمى ماحاببات بيگەلديەۆ ەلباسىنىڭ بيىلعى جولداۋىنداعى ايتىلعان تاپسىرمالاردىڭ تياناقتى ورىندالعانىنا توقتالدى. اۋداندا ورتا جانە شاعىن كاسىپكەرلىكتى دامىتۋ ارقىلى جۇمىسسىزدىقتىڭ الدىن الۋ, حالىققا قىزمەت كورسەتەتىن نىسانداردىڭ قاتارىن كوبەيتۋ جانە باسقا شارالار اۋقىمى ويداعىداي ورىندالىپ جاتىر دەۋگە بولادى. بۇگىندە ايماقتا مىڭداعان كاسىپكەر اۋدان ەكونوميكاسىنىڭ نىعايۋىنا وزىندىك ۇلەسىن قوسۋدا. وسىلايشا استانا كۇنىنە لايىقتى تارتۋ ازىرلەگەن جامبىلدىقتاردىڭ مەرەيى ۇستەم شىقتى.
استانانىڭ قارىشتاپ دامۋى, ءسان-سالتاناتىنىڭ جاراسىمى بىزگە دە ونەگە. ماسەلەن, ىرگەتاسى سوناۋ 1903 جىلى قالانعان اۋداندىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ كونە عيماراتى ورنىنا جاڭادان ساۋلەتتى قۇرىلىس بوي كوتەرىپ, ەل يگىلىگىنە بەرىلگەنىن ايتساق بولادى. سونداي-اق, جامبىل اۋداندىق ورتالىق كىتاپحاناسى دا كۇردەلى جوندەۋدەن ءوتتى.
بۇدان كەيىن اۋدان ورتالىعىنداعى اباي, س.بەردىقۇلوۆ, ش.ءۋاليحانوۆ, ت.رىسقۇلوۆ, ناۋرىزباي قۇتتىمبەت ۇلى اتىنداعى ورتا مەكتەپتەردىڭ وقۋشىلارى ارۋ قالا استانانىڭ تاريحىن بەينەلەيتىن “ساۋلەتتى شاھاردىڭ قۇرداستارى”, “بەيبىتشىلىك پەن كەلىسىم سارايىنىڭ سالتاناتى”, “جاسىل جەلەكتى جاس قالا” اتتى تاقىرىپتار بويىنشا بەينەكورىنىستەردى جۇرتشىلىقتىڭ نازارىنا ۇسىندى. بۇلدىرشىندەر جينالعان قاۋىمدى “استانادان تارايدى ەلگە باقىت شۋاعى”, “استانا – بەيبىتشىلىك پەن دوستىق قالاسى”, “استانا – جاستىق جالىنى”, “تۋعان كۇنىڭمەن, ەڭسەلى, ەلوردا!” دەگەن ۇرانمەن رۋحتاندىردى.
كۇمىسجان بايجان, الماتى وبلىسى.
سۋرەتتە: استانا كۇنىنىڭ ءوتۋ سالتاناتىنان كورىنىس.
كوڭىل كوككە شارىقتاعان كۇن
قىزىلجار وڭىرىندە استانا كۇنى كەڭىنەن اتالىپ ءوتتى. ونىڭ ۇستىنە پەتروپاۆل قالاسىنىڭ تۋعان كۇنى وسىناۋ ايشىقتى مەرەكەمەن تۇسپا-تۇس كەلىپ, پەتروپاۆلدىقتاردىڭ كوتەرىڭكى كوڭىل-كۇيىندە شەك بولعان جوق. مەرەكەلىك شارا “جاڭا ءداۋىردىڭ جاڭا استاناسى” اتتى باعدارلامامەن اشىلىپ, ول تاعىلىمدى شارالارعا, شىعارماشىلىق ۇجىمدار مەن انشىلەردىڭ كونتسەرتتىك باعدارلاماسىنا جالعاستى. استاناعا جانە وتباسىنا سىيلىق, اتالىمدار بويىنشا ماراپاتتاۋ, استانا كۇنى ءسابي تۋعان وتباسىلار مەن وتاۋ تىككەن جاس جۇبايلاردى قۇرمەتتەۋ, قالىڭدىقتار شەرۋى, تاعى باسقا جاراسىمدى ءراسىمدەر كەڭىنەن كورىنىس تاپتى. كوشەلەر كوزدىڭ جاۋىن الارداي بەزەندىرىلىپ, ادامدار بارىنشا اسەم كيىنىپ, ەلورداعا دەگەن قۇرمەت بارىنشا اسقاقتالدى.
“كوكتوبە” ساۋدا ءۇيىنىڭ الدىندا شاعىن باقتىڭ تۇساۋى كەسىلسە, قالالىق مادەنيەت جانە دەمالىس ساياباعىندا “دوستىق سۋبۇرقاعىنىڭ سالتاناتتى اشىلۋى بولدى. مۇندا “دۋسلىك” تاتار-باشقۇرت قوعامىنىڭ “سابانتوي مەيمانداردى قارسى الادى” ويىن-ساۋىعى جالعاسسا, وبلىستىق اسسامبلەيا عيماراتى الدىندا ەتنومادەني بىرلەستىكتەردىڭ حالىق شىعارماشىلىعى قولدانبالى ونەر بۇيىمدارىنىڭ كورمەسى ءوتتى. مەرەكەلىك الاڭداردى اۆيترالدى بەزەندىرۋ جونىندەگى جەكە كاسىپكەرلەردىڭ “شار” فەستيۆالى, ءوڭدەۋ كاسىپورىندارى ونىمدەرىنىڭ ساۋداسى دا قىزىپ سالا بەردى. تاريحي-ولكەتانۋ مۇراجايىندا وتكەن “استاناعا ارنالعان سۋرەتتەر” بالالار سۋرەتى كونكۋرسىن, جاس سۋرەتشىلەر ۆەرنيساجىن, تەاترلاندىرىلعان قويىلىمدار باعدارلاماسىن, سپورتتىق جارىستاردى تاماشالاۋشىلار دا كوپ بولدى. “گۇلدەنە بەر, استانام” اكتسياسى, “ول كۇندەردىڭ داڭقى وشپەيدى” ادەبي-سازدى كومپوزيتسيا, “سالانگ”, “العىس” اسكەري-پاتريوتتىق كلۋبتاردىڭ كورمە ەكسپوزيتسياسى دا تارتىمدىلىعىمەن ەرەكشەلەندى.
قازاقستاننىڭ ەسترادا جۇلدىزدارى ماقپال يسابەكوۆانىڭ جانە “101” توبىنىڭ قاتىسۋىمەن وتكەن كونتسەرتتىك باعدارلامانىڭ سوڭى مەرەكەلىك وتشاشۋعا ۇلاستى.
ءومىر ەسقالي, سولتۇستىك قازاقستان وبلىسى.
اقجايىقتا الاۋلاعان التى كۇن
باتىس قازاقستان وبلىسىنىڭ ورتالىعىندا ەلباسى جۇلدەسى ساراپقا سالىندى
ورال قالاسىندا ەلباسى – ەلىمىزدىڭ تۇڭعىش پرەزيدەنتى نۇرسۇلتان نازارباەۆتىڭ جۇلدەسى ءۇشىن وتكىزىلگەن ءىV حالىقتىق سپورت ويىندارى مارەگە جەتتى. 1-6 شىلدە ارالىعىندا ەلىمىزدىڭ باتىسىنداعى قازاقستاننىڭ كونە دە جاڭا قالاسى ورالدى مەرەكەلىك كوڭىل-كۇي اۋانى كەرنەپ تۇردى.
جارىستىڭ اشىلۋ سالتاناتى كىشىگىرىم وليمپياداعا پارا-پار بولعانداي كۇي كەشتىك. ەلىمىزدىڭ بارلىق وبلىستارىنان, استانا مەن الماتى قالاسىنان كەلگەن سپورتشىلاردىڭ سالتاناتتى شاراداعى كيىم ۇلگىلەرى مەرەكەنىڭ شىرايىن كەلتىرە ءتۇستى. ءتورت جىلدا ءبىر وتەتىن حالىقتىق ويىندار ءباسەكەسىن تۇرعىندار ساعىنىپ-اق قالعان ەكەن. اعايىن-تۋىسى, جاقىنى مەن جۇراعاتىنا جانكۇيەر بولىپ كەلگەن جۇرتتا ەسەپ بولمادى. حالىقتىق سپورت ويىندارى سونىسىمەن ەرەكشە, سونىسىمەن ىستىق.
– ءدۇبىرلى دودانىڭ ءتورتىنشى رەت وتكىزىلۋ قۇرمەتى ءبىزدىڭ وبلىسىمىزعا بۇيىردى. ويتكەنى, ولكەمىزدە سپورتتىڭ بۇقارالىق سيپاتىن ارتتىرۋعا, باسەكەگە قابىلەتتى رەزەرۆ دايارلاۋعا, سپورت ينفراقۇرىلىمىن جەتىلدىرۋگە مەملەكەتتىك تۇرعىدان ۇلكەن كوڭىل بولىنگەن. حالىقتىق سپورت ويىندارى – بۇل سالاماتتىلىق پەن پاراساتتىلىقتى كوتەرۋ, دەنساۋلىقتى نىعايتۋ مەن ءومىر جاسىن ۇزارتۋ, جالپى العاندا ۇلت ساۋلىعىنىڭ كەپىلى. ەلىمىزدىڭ سپورتتىق الەۋەتىن نىعايتۋ ارقىلى جاستاردى پاتريوتتىق رۋحتا تاربيەلەۋگە قول جەتكىزەمىز. وتباسى ىنتىماقتاستىعىن ناسيحاتتاۋ دا وسى جارىستىڭ ەنشىسىنە ءتيىپ وتىر.
ەلىمىزدىڭ اتاق-ابىرويىن قورعاپ جۇرگەن ەركىن كۇرەس شەبەرى, بەيجىڭدە وتكەن وليمپيادا ويىندارىنىڭ كۇمىس جۇلدەگەرى تايمۇراز تيگيەۆ, سامبو كۇرەسىنەن ەكى مارتە الەم چەمپيونى ەربولات بايباتىروۆ, گرەك-ريم كۇرەسىنەن الەم چەمپيونى ارتۋر ۇمبەتقاليەۆ, ەركىن كۇرەستەن ازيا چەمپيونى گۋزەل مانيۋروۆا, شاحماتتان حالىقارالىق گروسسمەيستەر مۇرتاس قاجىعاليەۆ سىندى سپورت ساڭلاقتارى تەك باتىسقازاقستاندىقتاردىڭ عانا ەمەس, بۇكىل قازاق ەلىنىڭ ماقتانىشى. وسىنداي سپورتشىلارى بار ولكەگە قوش كەلدىڭىزدەر! ەلباسى جۇلدەسى ءۇشىن وتەتىن جارىستىڭ باستالۋىمەن شىن جۇرەكتەن قۇتتىقتايمىن! – دەدى باتىس قازاقستان وبلىسى اكىمىنىڭ ورىنباسارى سەرىك سۇلەيمەن جارىستىڭ اشىلۋ سالتاناتىندا.
الدىمەن جارىسقا قاتىسۋشى ءار وبلىس پەن قالا كوماندالارى شەرۋ جاساپ ءوتتى. “بىرلىگىمىز جاراسقان!” جالپى ۇلتتىق اكتسياسى اياسىندا وتكەن جارىستىڭ استانا كۇنىمەن تۇسپا تۇس كەلگەنى كوپشىلىككە ءمالىم. ءسوز الۋشىلار وسى ايتۋلى داتامەن قۇتتىقتاۋدى دا ۇمىتپادى. جارىسقا قاتىسۋشى كوماندالارعا ۇيىمداستىرۋ كوميتەتى اتىنان ەستەلىك كادەسىيلار تابىس ەتىلدى.
– ەلباسىمىز بيىلعى جولداۋىندا 2020 جىلعا دەيىن ەلىمىزدىڭ تۇرعىندارىنىڭ 30 پايىزىن سپورتقا تارتۋ جونىندە تاپسىرما بەرگەن بولاتىن. سوندىقتان وسىنداي بۇقارالىق سپورت تۇرلەرىن كوبەيتۋدىڭ ءمانى زور. حالىقتىق سپورت ويىندارى ءتورت جىلدا ءبىر ءوتكىزىلسە, كەلەسى جىلى ۇلتتىق سپورت فەستيۆالى ۇيىمداستىرىلادى. بۇل فەستيۆال دا ەڭ اۋەلى اۋىلدىق جەرلەردەن باستاۋ الادى. اۋداندىق, وبلىستىق, ەڭ سوڭىندا رەسپۋبليكالىق جارىس وتكىزىلەدى. وسىلايشا جىلما جىل قالىڭ بۇقارا اراسىنان سپورتقا تارتىلاتىنداردىڭ قاتارى كوبەيەدى. مەن ءوز كەزەگىمدە جارىستى جوعارى دەڭگەيدە ۇيىمداستىرا بىلگەن باتىس قازاقستان وبلىسى اكىمدىگىنە, تۋريزم, دەنە شىنىقتىرۋ جانە سپورت باسقارماسىنا راحمەت ايتامىن. ولاردىڭ مۇنداي ءىرى جارىستاردى وتكىزۋگە جيناقتاعان ءتاجىريبەسى مول. ورالدا الەم كۋبوگى, الەم چەمپيوناتى, تاعى بىرنەشە ءىرى حالىقارالىق جارىستار وتكەن بولاتىن. سوندىقتان حالىقتىق سپورت ويىندارىنىڭ رەسپۋبليكالىق جارىسىن وسىندا وتكىزۋ ءجونىندە شەشىم قابىلدانعان ەدى. ۇيىمداستىرىلۋ دەڭگەيى كوڭىلىمىزدەن شىقتى. بارلىق كوماندالارعا تابىس تىلەيمىن! – دەدى تۋريزم جانە سپورت مينيسترلىگى سپورت كوميتەتىنىڭ توراعاسى ەلسيار قاناعاتوۆ.
جارىستىڭ الاۋىن جاعۋ جانە تۋىن كوتەرۋ قۇرمەتى سامبو كۇرەسىنەن ەكى مارتە الەم چەمپيونى ەربولات بايباتىروۆقا بۇيىردى. سالتاناتتى شارانىڭ سوڭى مەرەكەلىك وتشاشۋعا ۇلاستى.
سونىمەن, 14 سپورت تۇرىنەن مىقتىلاردى انىقتاۋ باسەكەسى باستالدى. قازاق كۇرەسىنەن قىزىلوردا وبلىسىنان كەلگەن بالۋاندار بابىندا ەكەن. ءاپ-دەگەننەن جارىستىڭ جالاۋىن قولدان بەرمەيتىنىن بىردەن بايقاتتى. ءسويتىپ, جەڭىس تۇعىرىنا كوتەرىلدى. ال امانگەلدى ساتىبالديەۆ, دارحان ورىكباەۆ, قۋانىش مۇراتوۆ سىندى بالۋانداردىڭ ارقاسىندا شىعىس قازاقستان وبلىسى جالپى كوماندالىق ەسەپتە ەكىنشى ورىندى يەلەندى. ءۇشىنشى ورىن قاراعاندى وبلىسىنىڭ ەنشىسىنە ءتيدى. سامبو كۇرەسىنەن باتىس قازاقستان وبلىسىندا مىقتى مەكتەپ بارىن وزگە وبلىس مويىنداپ بولعالى قاشان. بۇل جولى دا اقجايىقتىڭ سايىپقىراندارى وسى بيىگىنەن كورىندى. مەدەت وڭداعانوۆ, اسحات شايحيەۆ, باعدات جارىلعاسوۆ, قىزداردان ايجارقىن ەسلياموۆا, گۇلسەزىم اۋباكىروۆا, الماگۇل ورىنعاليەۆا سياقتى بالۋاندارىمىز جالپىكوماندالىق ەسەپتە باتىس قازاقستان وبلىسىن العا شىعاردى. ەكىنشى ورىن وڭتۇستىك قازاقستان وبلىسى, ءۇشىنشى ورىن اقتوبە وبلىسىنا بۇيىردى.
كىر تاسىن كوتەرۋدە قوستاناي, قول كۇرەسىندە جامبىل, بيلياردتان پاۆلودار, توعىزقۇمالاقتان الماتى, ۇستەل تەننيسىنەن الماتى قالاسى, شاعىن فۋتبول, دويبى جانە وتباسىلار اراسىنداعى جارىستا باتىس قازاقستان, جازعى پرەزيدەنتتىك كوپسايىستا قوستاناي وبلىسى ءبىرىنشى ورىندى يەلەنگەنىن ايتا كەتكەن ورىندى. وسىلايشا جالپى كوماندالىق ەسەپتە باتىس قازاقستان وبلىسى ءبىرىنشى ورىندى جەڭىپ السا, ەكىنشى ورىن قوستاناي, ءۇشىنشى ورىندى شىعىس قازاقستان وبلىسى يەلەندى.
“تويدىڭ بولعانىنان بولادىسى قىزىق” دەگەندەي, كوپ قىرلى, سان-سالالى ۇيىمداستىرۋ جۇمىستارىن جۇرگىزۋدى قاجەت ەتكەن بايراقتى باسەكە ءبىر كۇنگىدەي بولماي وتە شىقتى. رەسپۋبليكانىڭ ءار قيىرىنان كەلىپ اقجايىق توپىراعىندا باس قوسقان سپورتشىلار ورالداعى قوناقجايلىلىق پەن قۇرمەتكە ريزاشىلىقتارىن ءبىلدىردى. ولار اتتانار الدىندا باتىس قازاقستان وبلىسى اكىمدىگىنە, وعان قاراستى تۋريزم, دەنە شىنىقتىرۋ جانە سپورت باسقارماسىنىڭ باستىعى ءمۇسىلىم وڭداعانوۆقا ەلباسى جۇلدەسى ءۇشىن وتكىزىلگەن سايىستى ۇيىمداستىرۋداعى ىلكىمدىلىگىنە, الىمدىلىعى مەن شالىمدىلىعىنا وڭ باعا بەردى. بۇل جارىستىڭ جوعارى دەڭگەيدە وتكەنىنىڭ بىردەن ءبىر دالەلى بولسا كەرەك. از كۇندە تۋىس-باۋىرداي جاقىنداسىپ كەتكەن سپورتشىلار ءبىر بىرىمەن قيماي قوشتاستى.
نۇرسۇلتان ءابىش ۇلى نازارباەۆ ۇلت سپورتىنىڭ ۇلكەن جاناشىرى, قولداۋشىسى عانا ەمەس, سونىمەن بىرگە ءوزى دە جاقسى سپورتشى ەكەنى بەلگىلى. مۇنىڭ ءوزى ەلباسى جۇلدەسى ءۇشىن وتكىزىلگەن رەسپۋبليكالىق سايىستىڭ ءمانى مەن مازمۇنىن, ەلباسى ونەگەسىنىڭ بارشا قازاقستاندىقتارعا تيگىزەتىن ىقپالدى اسەرىن ودان ءارى تەرەڭدەتە تۇسكەنى انىق.
تەمىر قۇسايىن, ورال.
سۋرەتتەردە: ەلباسى جۇلدەسى ءۇشىن وتكىزىلگەن سايىستاردان كورىنىستەر.
سۋرەتتەردى تۇسىرگەن سايلاۋ مايلىباەۆ.
اۆتوكەرۋەن شەرۋى
سولتۇستىك قازاقستان وبلىستىق ىسكەر ايەلدەر اسسوتسياتسياسى ءتۇرلى قوعامدىق-ساياسي شارالارعا بەلسەنە قاتىسۋدى داستۇرگە اينالدىرعان. بۇل جولى “بىرلىگىمىز جاراسقان!” اكتسياسى اياسىندا “ايەلدەر ەل قۋاتىن ەسەلەي تۇسەدى” اتتى شارانى باستاماشىلدىقپەن قولعا الىپ, جۇرتشىلىقتىڭ ۇلكەن قولداۋىنا يە بولدى. اسسوتسياتسيانىڭ ءتورايىمى, وبلىس اكىمى جانىنداعى ىسكەر ايەلدەر جانە وتباسى-دەموگرافيالىق ساياسات ۇلتتىق كوميسسيانىڭ مۇشەسى باقىتجان ساميەۆانىڭ ايتىنا قاراعاندا, وسىنداي يگى ىستەردىڭ ءوز دارەجەسىندە وتۋىنە ءتۇرلى سالالاردا جۇمىس ىستەيتىن ءوڭىردىڭ قىز-كەلىنشەكتەرىنىڭ ۇلەسى زور. ولاردىڭ قاتارىندا ن. پيروجكوۆا, ج. مەيرەمباەۆا, ت. چەپۋحينا سەكىلدى بەلسەندى ايەلدەر بار.
“پەتروپاۆل – بەسكول – سميرنوۆو” باعىتى بويىنشا اۋىلداردى ارالاۋعا شىققان اۆتوكەرۋەن اكادەميك م. قوزىباەۆ اتىنداعى ءسولتۇستىك قازاقستان مەملەكەتتىك ۋنيۆەرسيتەتى جانىنان مارە الدى. اكتسيانى تاماشالاۋعا كەلگەن ستۋدەنت-جاستار, قالا جۇرتشىلىعى الدىندا وبلىس اكىمىنىڭ ورىنباسارى الەكساندر چجەن ءسوز الىپ, مۇنداي اۋقىمدى شارالار ەلىمىزدىڭ قوعامدىق-ساياسي ومىرىندەگى ايەلدەردىڭ ءرولىن ارتتىرۋعا باعىتتالاتىنىن اتاپ كورسەتسە, باقىتجان ماعجانقىزى ەلباسىنىڭ گەندەرلىك ساياساتىنىڭ ءمان-ماڭىزىن ءتۇسىندىرىپ بەردى. بۇدان كەيىن اسەم بەزەندىرىلگەن ءارتۇرلى ماركالى 15 جەڭىل كولىك ساپ تۇزەگەن كۇيى جولعا شىقتى. كوشتى وڭىرىمىزگە بەلگىلى ديقان, قازاقستاننىڭ ەڭبەك ەرى گەننادي زەنچەنكونىڭ كەلىنى ۆالەنتينا نيكولاەۆنا باستاپ ءجۇردى.
بەسكول كەنتىندە اۆتوكەرۋەن شەرۋىن قىزىلجار اۋدانىنىڭ اكىمى قايرات پىشەنباەۆ باستاعان كوپشىلىك ءان-جىرمەن قارسى الدى. جەرگىلىكتى اسسوتسياتسيانىڭ بەلسەندى ءمۇشەسى كۇلشارا اسقارقىزى باستاعان كولىك جۇرگىزۋشىلەرى اۆتوكەرۋەنگە قوسىلىپ, اققايىڭ اۋدانىن بەتكە الىپ ءجۇرىپ كەتتى. جولاي ولاردى استراحان اۋىلىنىڭ تۇرعىندارى توسىپ الىپ, ءوز قۇرمەتتەرىن كورسەتتى. مۇندا اۆتوكەرۋەنگە 5 كولىك قوسىلدى. وسىلايشا سميرنوۆ كەنتىنە دە كەلىپ جەتتى.اۋدان اكىمى رۇستەم ەلۋباەۆ جۇرتشىلىقتىڭ قاتىسۋىمەن وتكەن ميتينگىدە ء“بىرلىگىمىز جاراسقان” اكتسياسى اياسىندا شارالاردىڭ كوپ جۇرگىزىلىپ جاتقانىن, ونىڭ تۇپكى ماقساتى ادامداردىڭ قوعامدىق بەلسەندىلىگىن ارتتىرۋ, سالاماتتى ءومىر سالتىن, حالىقتار اراسىنداعى دوستىقتى ناسيحاتتاۋ, جاسامپاز ىستەردى جان-جاقتى تانىتۋ بولىپ تابىلاتىنىن اتاپ كورسەتتى. جەرگىلىكتى ءانشى داۋلەت بالتاباەۆ بىرنەشە ءان ورىنداپ بەردى.
– ىسكەر ايەلدەر اسسوتسياتسياسىنىڭ جۇمىس اۋقىمى كەڭ. قۇرامىمىزعا كاسىپكەر ايەلدەر دە تارتىلعاندىقتان, كوپ بالالى, تۇرمىسى تومەن وتباسىلارعا, از قامتىلعان جاندارعا, قارت ادامدارعا ماتەريالدىق كومەك كورسەتۋدى مۇرات تۇتامىز. وسىعان وراي “ايەلدەر ەل قۋاتىن ەسەلەي تۇسەدى” شاراسى بويىنشا قايىرىمدىلىق اكتسياسىن وتكىزگەلى وتىرمىز, – دەدى ب. ساميەۆا ءسوزىنىڭ سوڭىندا.
ءومىر ەسقالي, سولتۇستىك قازاقستان وبلىسى.
ءبىلىم مەن ەڭبەك ءبارىن دە جەڭبەك
جامبىل وبلىسىنىڭ اكىمى ق. بوزىمباەۆ 70 تالاپكەرگە ءبىلىم گرانتىن تاپسىردى
“بىرلىگىمىز جاراسقان!” اتتى رەسپۋبليكالىق الەۋمەتتىك اكتسيانى قولداۋ ودان ارى جالعاسۋدا. جاقىندا جامبىل وبلىستىق قازاق دراما تەاترىندا وسى وڭىردەگى جوو بىلىمگەرلەرى, كوللەدج, مەكتەپ وقۋشىلارى مەن ءتۇلەكتەرى, قالا مەن وبلىس تۇرعىندارى, سوعىس جانە ەڭبەك ارداگەرلەرى, جاستار مەن ۇكىمەتتىك ەمەس قوعامدىق ۇيىمداردىڭ, ۇلتتىق-مادەني ورتالىقتاردىڭ وكىلدەرى تاعىلىمدى ءىس-شارانىڭ كۋاسى بولدى.
وبلىس اكىمى قانات بوزىمباەۆ تۇرمىسى تومەن وتباسىلاردان شىققان دارىندى جاستاردى قولداۋ ماقساتىمەن 2010 جىلعى مەكتەپ تۇلەكتەرىنە جامبىل گۋمانيتارلىق-تەحنيكالىق ۋنيۆەرسيتەتىندە وقۋ ءۇشىن ءوزى بولگەن ءبىلىم گرانتتارىن تاپسىردى.
– مەكتەپ بىتىرۋشىلەر اراسىندا ۇلتتىق بىرىڭعاي تەستىلەۋدەن وتە جوعارى بالل الماسا دا, جاقسى وقىعان, كوپ بالالى جانە از قامتاماسىز ەتىلگەن وتباسىلاردان شىققان 70 تۇلەككە جامبىل گۋمانيتارلىق-تەحنيكالىق ۋنيۆەرسيتەتىندە وقۋعا وبلىس اكىمىنىڭ ءبىلىم گرانتتارىن تاپسىرعالى وتىرمىن. ءبىلىم گرانتتارى وبلىستىڭ ەڭبەك رىنوگىنا قاجەتتى ماماندىقتارعا وقىتۋ ءۇشىن بەرىلەدى. ياعني, بۇل گرانتتار بولاشاعى زور جاستارعا قولداۋ رەتىندە بەرىلىپ وتىر. ەندەشە, بارشاڭىزدى ەلوردا كۇنىمەن جانە وبلىستاعى بۇكىل جوعارى جانە ورتا وقۋ ورىندارىنىڭ تۇلەكتەرىن ءومىردىڭ ۇلكەن جولىنا تۇسۋلەرىمەن شىن جۇرەكتەن قۇتتىقتايمىن! – دەدى وبلىس اكىمى.
بۇگىندە وبلىستا 6 جوعارى وقۋ ورنى بار. وندا 26 195 ستۋدەنت 60-تان استام ماماندىق بويىنشا ءبىلىم الۋدا. جوعارى بىلىكتى ماماندار دايارلاۋ ماقساتىندا وبلىستىق بيۋدجەت ەسەبىنەن ورتا-كاسىبي ءبىلىم الۋعا جىل سايىن مەملەكەتتىك وقۋ گرانتتارى بولىنۋدە. سوعان سايكەس بۇگىندە 39 مىڭعا جۋىق جاستار كاسىبي جانە تەحنيكالىق ءبىلىم الۋ ۇستىندە دەسەك, بيىل ونىڭ 7.756-سى ديپلوم الىپ وتىر.
جامبىل گۋمانيتارلىق-تەحنيكالىق ۋنيۆەرسيەتى – وبلىستاعى بەلگىلى التى جوو-نىڭ ءبىرى. ۋنيۆەرسيەت رەكتورى, پروفەسسور جومارت قوشقاروۆ ستۋدەنتتەرگە ءبىلىم بەرۋدىڭ الەمدىك بيىك دەڭگەيىنە ۇمتىلىپ جۇرگەن بىلىكتى باسشىلاردىڭ بىرىنەن سانالادى.
البەتتە, جاستاردى قولداۋ گرانتتار بولۋمەن شەكتەلمەيتىنى بەلگىلى. جاس مامانداردى اۋىلدىق جەرلەرگە تارتۋ, ولارعا قولداۋ كورسەتۋ دە مەملەكەت تاراپىنان جاسالىپ وتىرعان يگى شارالاردىڭ ءبىرى. بۇگىندە ەلباسىنىڭ باستاماسىمەن “ديپلوممەن اۋىلعا” جوباسى ءوز ناتيجەسىن بەرە باستادى. قازىر اۋىلدىق جەرلەردەگى جۇمىسقا جاس ماماندار كوپتەپ تارتىلۋدا. وتكەن جىلى 200 مامان اۋىلدىق جەرلەرگە جۇمىسقا ورنالاسسا, بيىلعى جىلى 140 دارىگەر, 84 مۇعالىم, 11 مادەنيەت قىزمەتكەرلەرىن تارتۋ بويىنشا جۇمىستار جۇرگىزىلۋدە. بۇل ەلباسىنىڭ جاستارعا دەگەن قامقورلىعى.
وبلىس باسشىسىنىڭ ءوز قولىنان ءبىلىم گرانتتارى مەن اۋىلدىق جەرلەرگە بارىپ ەڭبەك ەتۋگە جولداما العان جاستار ەگەمەن ەلىنىڭ ەرتەڭى ءۇشىن وقۋ مەن ەڭبەكتە ءۇلكەن تابىستارعا جەتەتىندەرىنە جينالعانداردى نىق سەندىردى.
كوسەمالى ساتتىباي ۇلى, جامبىل وبلىسى.
سۋرەتتە: وبلىس اكىمى ق.بوزىمباەۆ پەن جگتۋ رەكتورى ج.قوشقاروۆ ءبىلىم گرانتتارىنا يە بولعان ءبىر توپ تۇلەكتەرمەن بىرگە.