استانادا «ادام قۇقىقتارى جانە پەنيتەنتسيارلىق جۇيەنىڭ دامۋى: ۇلتتىق باسىمدىقتار مەن حالىقارالىق ستاندارتتار» اتتى كەڭ كولەمدى حالىقارالىق كونفەرەنتسيا ءوتىپ جاتىر, دەپ حابارلايدى Egemen.kz.
كونفەرەنتسيا بيىل 1948 جىلى بۇۇ باس اسسامبلەياسى قابىلداعان ادام قۇقىقتارى جونىندەگى جالپىعا بىردەي دەكلاراتسيانىڭ 77 جىلدىعىنا ارنالىپ ۇيىمداستىرىلدى. بۇل تاريحي قۇجات بۇگىنگە دەيىن الەم ەلدەرىندە ادام قۇقىقتارىن قورعاۋدىڭ قۇقىقتىق ىرگەتاسى سانالادى.
جيىننىڭ باستى ماقساتى – تۇزەۋ مەكەمەلەرىندە قۇقىقتىق ءتارتىپتى ساقتاۋ, سوتتالعانداردىڭ قۇقىقتارىن قورعاۋ جانە پەنيتەنتسيارلىق جۇيەنى حالىقارالىق تالاپتارعا بەيىمدەۋ ماسەلەلەرىن تالقىلاۋ. ءىس-شارا مەملەكەتتىك قۇرىلىمدار, حالىقارالىق ۇيىمدار جانە ادام قۇقىقتارى سالاسىنىڭ ساراپشىلارى اراسىنداعى ارىپتەستىكتى كۇشەيتۋدى كوزدەيدى.
كونفەرەنتسيانى قازاقستانداعى ادام قۇقىقتارى جونىندەگى ۇلتتىق ورتالىق بىرىككەن ۇلتتار ۇيىمىنىڭ دامۋ باعدارلاماسى, ەۋروپا كەڭەسى, ەقىۇ-نىڭ استاناداعى كەڭسەسى جانە قر ءىىم-مەن بىرلەسىپ وتكىزىپ جاتىر.
جيىندى اشقان قازاقستاننىڭ ادام قۇقىقتارى جونىندەگى ۋاكىلى ارتۋر لاستاەۆ ادام قۇقىقتارى تۇزەتۋ مەكەمەلەرىنىڭ قابىرعاسىندا اياقتالماۋى كەرەك ەكەنىن اتاپ ءوتتى.
«قازاقستان ازاپتاۋ ورىندارىنداعى ادامداردىڭ قۇقىقتارىن قورعاۋ مەحانيزمدەرىن جۇيەلى تۇردە كۇشەيتۋدە. قوعامدىق باقىلاۋ مۇمكىندىكتەرى كەڭەيىپ, سوتتالعاندارعا قاتىستى حالىقارالىق ستاندارتتار ەنگىزىلىپ جاتىر. قىلمىستىق-اتقارۋ جۇيەسىن كەزەڭ-كەزەڭمەن رەفورمالاۋ تۇرمەدەگى تۇتقىندار سانىن ايتارلىقتاي ازايتۋعا مۇمكىندىك بەردى, وعان قىلمىستىق ساياساتتى گۋمانيزاتسيالاۋ ۇلكەن ىقپال ەتتى», دەدى ومبۋدسمەن.
بۇۇ دامۋ باعدارلاماسىنىڭ قازاقستانداعى كەڭسەسى دە ەلدىڭ بۇل باعىتتاعى قادامدارىن جوعارى باعالاپ وتىر.
«پروون قازاقستاننىڭ جابىق مەكەمەلەردەگى ادام قۇقىقتارىن قامتاماسىز ەتۋگە باعىتتالعان كۇش-جىگەرىن, ازاپتاۋعا قارسى بۇۇ كونۆەنتسياسىنىڭ فاكۋلتاتيۆتىك حاتتاماسىنا قوسىلۋىن جانە ۇلتتىق الدىن الۋ تەتىك قۇرۋىن قۇپتايدى. سونىمەن قاتار پەنيتەنتسيارلىق جۇيەدەگى ۇات تيىمدىلىگىن ارتتىرۋ ءۇشىن بۇۇ-نىڭ ازاپتاۋعا قارسى كىشى كوميتەتىنىڭ جانە جالپى ۋاقىتشا شولۋدىڭ ۇسىنىمدارىنا كوڭىل ءبولۋ قاجەت. پروون ۇلتتىق قۇقىق قورعاۋ مەكەمەسىنە جانە ۇات قاتىسۋشىلارىنا وسى باعىتتا تەحنيكالىق جانە ساراپتامالىق قولداۋ كورسەتۋدى جالعاستىرادى», دەدى قازاقستانداعى بۇۇ دامۋ باعدارلاماسىنىڭ تۇراقتى وكىلدىگىنىڭ ورىنباسارى سۋحروب حودجيماتوۆ ءوز قۇتتىقتاۋ سوزىندە.
كونفەرەنتسياعا مەملەكەتتىك ورگاندار, ۇكىمەتتىك ەمەس ۇيىمدار, قۇقىق قورعاۋشىلار, حالىقارالىق قۇرىلىمدار جانە سالانىڭ جەتەكشى عىلىمي ساراپشىلارى قاتىسىپ وتىر.