تۇركىستان وبلىسىنىڭ اكىمى نۇرالحان كوشەروۆ قازاقستان تاريحى تۋرالى 100 ملن تەڭگەگە تۇسىرىلەتىن ۆيدەوروليككە قاتىستى تۇسىنىكتەمە بەردى. ونىڭ ايتۋىنشا, « ۇلى دالا ەلى» ورتالىعىندا كورسەتىلەتىن 3D-فورماتتاعى روليكتىڭ ءوندىرىسى وسىنداي قارجىلاندىرۋدى قاجەت ەتەدى, دەپ جازادى Egemen.kz.
اكىمنىڭ ايتۋىنشا, كولەمدى تاريحي بەينەروليك ەلىمىزدىڭ تۋريستىك الەۋەتىن ارتتىرۋعا باعىتتالعان جانە كۇردەلى تەحنيكالىق شەشىمدەردى تالاپ ەتەدى.
«بۇل – 3D-ەففەكتى بار روليك. تۋريستىك الەۋەتىمىزدى كوتەرۋ ءۇشىن ارنايى ستسەناري جازىلادى. ءبىز وزگە ەلدەرمەن سالىستىردىق: شەتەلدە وسىنداي روليكتى جاساۋ قۇنى 200-300 مىڭ دوللارعا دەيىن جەتەدى. اقش-تاعى Universal پاركىندە گارري پوتتەر, ترانسفورمەرلەر بويىنشا جاسالعان شوۋ دا وتە قىمبات. بۇل جاي ۆيدەوروليك ەمەس ەكەنىن ءتۇسىنۋ قاجەت. جوبانىڭ ماقساتى – ءتۋريزمدى دامىتۋ. وكىنىشكە قاراي, تۇسىنبەۋشىلىك رەزونانس تۋدىردى», دەدى كوشەروۆ بريفينگىدە.
اكىمنىڭ ايتۋىنشا, ۆيدەوروليكتى دايىنداۋعا مەردىگەر تابۋ دا قيىن بولعان.
«كونكۋرستى ءۇش رەت وتكىزدىك. تەك ءبىر كومپانيا – G7 Exclusive جاۋاپ بەردى. مۇندا كوممەرتسيالىق تۇرعىدان قاراساق, ءبىر جىلدا سول قاراجاتتى قايتارىپ, ءارى قاراي تابىس تابۋعا بولاتىن ەدى», دەپ تۇيىندەدى ول.
بۇعان دەيىن وبلىس اكىمى « ۇلى دالا ەلى ورتالىعى» مەن «G7 Exclusive» كومپانياسى اراسىندا جاسالعان كەلىسىمشارتتىڭ زاڭدىلىعىن تەكسەرۋدى تاپسىرعان. قۇجاتقا سايكەس, ۆيدەوروليك قازاقستان تاريحىن ەجەلگى داۋىردەن بۇگىنگە دەيىنگى ونەر تۇرلەرى ارقىلى كورسەتۋى ءتيىس. ول ارنايى گولوگرافيالىق شوۋ-زالدا كورسەتىلەدى.
28 قاراشادا جاسالعان كەلىسىمشارت بويىنشا جوبانىڭ قۇنى – 100 800 000 تەڭگە (ققس-پەن), ال جۇمىس 2025 جىلدىڭ سوڭىنا دەيىن اياقتالۋى ءتيىس.