ۇلتتىق ينجەنەرلىك اكادەميا وتكىزگەن X مەرەيتويلىق رەسپۋبليكالىق كونكۋرستىڭ قورىتىندىسى بويىنشا راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ اسكەري راديوتەحنيكا جانە ەلەكترونيكا نەگىزدەرى كافەدراسى باستىعىنىڭ ورىنباسارى پودپولكوۆنيك نۇرجان زىكىرياەۆ «قازاقستاننىڭ ۇزدىك ينجەنەرى – 2025» اتاعىنا يە بولدى, دەپ جازادى Egemen.kz.
ءۇش بىرەگەي قورعانىس جۇيەسىنىڭ اۆتورى
PhD دوكتورى پودپولكوۆنيك نۇرجان زىكىرياەۆ راديوتەحنيكا جانە ەلەكترونيكا سالاسىنداعى جەتەكشى ينجەنەر-كونسترۋكتور. قارۋلى كۇشتەر قاتارىندا جيىرما ءۇش جىلدىق قىزمەتىندە ول وتاندىق ارميا قارۋلانۋىنا قابىلدانعان ءۇش بىرەگەي قورعانىس جۇيەسىنىڭ اۆتورى اتاندى. ونىڭ ازىرلەمەلەرى قازىرگى زامانعى اسكەري تەحنيكا باعىتتارىنىڭ نەگىزگى سپەكترىن قامتيدى – وپتيكالىق-ەلەكتروندىق كەشەندەردەن باستاپ راديوەلەكتروندىق كۇرەس پەن ۇشقىشسىز اۆياتسياعا دەيىن جانە ونداعان بىتىراڭقى قۇرىلعىلار امبەباپ مودۋلدەرمەن الماستىرىلىپ, سەنىمدىلىك, ۇنەمدىلىك جانە ورنالاستىرۋ جىلدامدىعى ارتادى.
جوبالارى – جاۋىنگەرلىك مۇمكىندىكتەردى ارتتىرادى
ەڭ ماڭىزدى جەتىستىكتەرىنىڭ ءبىرى – اسكەري تەحنيكا ءۇشىن كورىنۋدى ارتتىرۋعا ارنالعان وپتيكالىق-ەلەكتروندىق ءمودۋلدى ازىرلەۋ جانە ەنگىزۋ. ول تۇنگى ۋاقىتتا باقىلاۋدى جانە قوزعالىس قاۋىپسىزدىگىن ايتارلىقتاي جاقسارتادى, بۇل سىناق ناتيجەلەرىمەن دالەلدەنگەن.
ونىڭ جۇمىسىندا باعدارلامالىق تۇردە انىقتالاتىن راديو (SDR) تەحنولوگيالارىن دامىتۋ ماڭىزدى ورىن الادى. پودپولكوۆنيك ن.زىكىرياەۆ ارنايى SDR كەشەنىن جاساپ, سونداي-اق ءارتۇرلى ماماندىقتاردىڭ كۋرسانتتارىنا ارنالعان «SDR نەگىزدەرى» وقۋ قۇرالىن جانە وقۋ كۋرسىن دايىندادى.
ونىڭ باسشىلىعىمەن Wing Loong-1 ۇشقىشسىز ۇشۋ اپپاراتتارىنىڭ اسپا توراپتارىن جاڭعىرتۋ جۇزەگە اسىرىلىپ, جاڭا قارۋ-جاراق تۇرلەرىن ينتەگراتسيالاۋعا جانە كەشەننىڭ جاۋىنگەرلىك مۇمكىندىكتەرىن ايتارلىقتاي كەڭەيتۋگە مۇمكىندىك بەردى.
ارمياداعى تسيفرلىق ترانسفورماتسيا
«رەسپۋبليكالىق دەڭگەيدەگى بۇل ماراپات ءارى قاراي جۇمىستى جالعاستىرۋعا ۇلكەن سەرپىن. بارلىق جوبالار اسكەردىڭ جاۋىنگەرلىك مۇمكىندىكتەرىن ارتتىرۋعا جانە پراكتيكالىق قولدانۋعا باعىتتالدى. باستى مىندەت – جيناقتالعان تاجىريبەنى كۋرسانتتارعا جەتكىزۋ جانە جاڭا بۋىن اسكەري ينجەنەرلەرىن دايارلاۋ», دەدى پودپولكوۆنيك ن.زىكىرياەۆ.
ايتا كەتكەن ءجون, ونىڭ ءار ازىرلەمەسى – ارميانى تسيفرلىق ترانسفورماتسيالاۋ باعىتىنداعى ستراتەگيالىق قادام. پودپولكوۆنيك ن.زىكىرياەۆتىڭ جۇمىسى وتاندىق ينجەنەرلىك مەكتەپتىڭ الەۋەتىن جانە ەلدىڭ قورعانىس قابىلەتىن بۇگىنگى كۇنى-اق كۇشەيتەتىن تەحنولوگيالار جاساۋعا قابىلەتتى ەكەنىن ايقىن كورسەتەدى.