وتكەن اپتانىڭ جۇماسى استانا تورىندە كورنەكتى اقىن, مەملەكەتتىك سىيلىقتىڭ لاۋرەاتى نەسىپبەك ايت ۇلىنىڭ 75 جىلدىعى كەڭ كولەمدە اتالىپ ءوتتى. اۋەلى اقىن رۋحىنا ارنالعان «بوستاندىق جىرىنىڭ بوزجورعاسى» اتتى رەسپۋبليكالىق جىر ءمۇشايراسى قورىتىندىلانىپ, سالتاناتتى ءىس-شاراعا ۇلاستى. كەشىندە ە.راحماديەۆ اتىنداعى مەملەكەتتىك اكادەميالىق فيلارمونيا زالىندا «داريعا داۋرەن» اتتى ەسكە الۋ كونتسەرتىنە دە حالىق كوپ جينالدى.
اقىنعا ارنالعان جىر ءمۇشايراسىنىڭ باس جۇلدەسىن قوس اقىن تەڭدەي ءبولىستى. ونىڭ ءبىرى مەملەكەتتىك سىيلىقتىڭ لاۋرەاتى, اقىن سەرىك اقسۇڭقار ۇلى بولسا, ەندى ءبىرى بەلگىلى اقىن مۇرات شايماران جىر دوداسىنىڭ قورىتىندى كەشىندە ولەڭدەرىن وقىدى. استانا قالاسىنىڭ مادەنيەت باسقارماسى قولداۋىمەن وتكەن سالتاناتتى شارادا نەسىپبەك ايت ۇلىنىڭ 75 جىلدىعىن ۇيىمداستىرۋشى, قازىلار القاسىنىڭ توراعاسى, اقىن داۋلەتكەرەي كاپ ۇلى جانە مەملەكەتتىك سىيلىقتىڭ لاۋرەاتى عالىم جايلىباي ءسوز سويلەپ, اقىن شىعارماشىلىعى حاقىندا تولعامدى پىكىر ءبىلدىردى. ەلىمىزدىڭ تۇكپىر-تۇكپىرىنەن 100-دەن استام اقىن قاتىسقان جىر ءمۇشايراسىنىڭ ءى ورنىن اقىندار ۇلاربەك نۇرعالىم ۇلى مەن ناۋرىزبەك سارشا يەلەندى.
كەشكىسىن ە.راحماديەۆ اتىنداعى مەملەكەتتىك اكادەميالىق فيلارمونيا زالىنداعى «داريعا داۋرەن» اتتى كونتسەرتتە اقىننىڭ ولەڭدەرىنە جازىلعان اندەردى ەلىمىزگە بەلگىلى انشىلەر شىرقادى. قازاق تاۋەلسىزدىگى مەن ەلدىگىن قاتار جىرلاعان ن.ايت ۇلىنىڭ انگە اينالعان سوزدەرى ۇلت رۋحانياتىنىڭ بايلىعى دەسە دە ارتىق ەمەس. كەش بارىسىندا اقىن ءومىرى مەن شىعارماسىنان سىر شەرتىلىپ, «اققۋدىڭ كوز جاسىنداي» اندەر اۋەلەگەن سايىن زال سىلتىدەي تىندى. اق پاراقتار اراسىندا تەاتر ارتىستەرى اۆتوردىڭ جالىندى جىرلارىنا قانات ءبىتىردى. سەكەن تۇرىسبەكتەي كۇيشى ءىنىسى دومبىرانىڭ قوس ىشەگى ارقىلى اقىنعا دەگەن ساعىنىشىن كۇي عىپ توكتى. رامازان ستامعازى, ايگۇل قوسانوۆا, ايگۇل ەلشىباەۆا, ەرلان رىسقالي, باعىلان ءبابىجان, كلارا تولەنباەۆا, ساۋلەجان تاعزيا, ايگەرىم نارتۇيە, پەريزات تۇراروۆا, وزگەرىس شەرىكباي, ت.ب انشىلەر اقىن ولەڭىن اسپەتتەگەن ءان بايراعىن جوعارى كوتەردى. اراسىندا شايىردىڭ ەفيردە قالعان بەينەسى مەن ساڭقىلداعان داۋىسى ەكراننان ەلمەن قاۋىشىپ وتىرعانداي اسەر قالدىردى. كەش اۆتوردىڭ قازاق ەستراداسىنداعى شوقتىقتى تۋىندىلارىنىڭ بىرىنە اينالعان «قازاقتاي ەل قايدا؟» انىمەن اياقتالدى.