فورۋمنىڭ سالتاناتتى اشىلۋ ءراسىمى مىرجاقىپ دۋلات ۇلى اتىنداعى قوستاناي ينجەنەرلىك-ەكونوميكالىق ۋنيۆەرسيتەتىندە ءوتتى. جيىندا ەلىمىزدىڭ ءار وڭىرىنەن كەلگەن بەلسەندى جاستار ەتنوسارالىق كەلىسىم مەن بىرلىكتى نىعايتۋ, قازاقستان حالقى اسسامبلەياسىنىڭ قۇندىلىقتارىن ءبىلىم بەرۋ جۇيەسىندە ىلگەرىلەتۋ ماسەلەسىن تالقىلايتىن بولادى, دەپ حابارلايدى Egemen.kz.
فورۋم اياسىندا «اسسامبلەيا جاستارى» رقب توراعاسىنىڭ ورىنباسارى, ستۋدەنتتەر اسسامبلەياسىنىڭ توراعاسى الەكساندر ۋرماشوۆ جاستارعا «ىشكى كوشباسشىلىق» تاقىرىبى بويىنشا شەبەرلىك ساعاتىن وتكىزەدى.
«بۇل فورۋم – ەلىمىزدە تۇڭعىش ۇيىمداستىرىلىپ وتىرعان تاريحي ءىس-شارا. قوستاناي فورۋمى ەلىمىزدىڭ ستۋدەنت جاستارى ءۇشىن, ءبىز ءۇشىن دە اسا ماڭىزدى. ويتكەنى, جوعارى وقۋ ورىندارىندا ءبىلىم الىپ جاتقان جاستار – مەملەكەتتىڭ ەرتەڭى, ەلدىڭ بولاشاعى. بۇگىنگى تاڭدا ەرتەڭ ەل يگىلىگىنە قىزمەت ەتەتىن ءبىلىمدى, باسەكەگە قابىلەتتى, ويى وتكىر, سانالى ۇرپاق قالىپتاستىرۋ اسا ماڭىزدى. فورۋمعا پرورەكتورلار, جوعارى وقۋ ورىندارىنىڭ وكىلدەرى دە ارنايى كەلىپ وتىر. بۇل – ستۋدەنتتىك باستامالارعا جوعارى دەڭگەيدەگى قولداۋدىڭ بار ەكەنىن كورسەتەدى», دەيدى عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسىنىڭ ورىنباسارى اقەركە ابىلايحان.
فورۋمعا الپىسقا جۋىق ستۋدەنت قاتىسىپ جاتىر. ولار ەكى كۇن بويى ءوزارا تاجىريبە الماسىپ, بىلىكتى مامانداردىڭ ءدارىسىن تىڭدايدى. سونداي-اق, قالانىڭ مادەني ورىندارىن ارالاپ, كورىپ, مىرجاقىپ دۋلات ۇلىنىڭ 140 جىلدىعىنا وراي ساحنالانعان قويىلىمدى تاماشالايدى.
قوستاناي وبلىسى