قازاقستانعا قىستىڭ العاشقى ايازى كەلە جاتىر. اۋا رايىن بولجاۋشىلار 9 جەلتوقساندا ەلىمىزدىڭ سولتۇستىك, سولتۇستىك-باتىس جانە شىعىس وڭىرلەرىندە كۇن كۇرت سۋىتىپ, اۋا تەمپەراتۋراسى 30-35 گرادۋسقا دەيىن تومەندەيتىنىن حابارلادى, دەپ جازادى Egemen.kz.
«قازگيدرومەت» رمك-نىڭ حابارلاۋىنشا, 9 جەلتوقساندا سولتۇستىك-باتىس جانە سولتۇستىك وڭىرلەرگە سۋىق اۋا ماسسالارىمەن ۇشتاسقان سولتۇستىك انتيتسيكلون جىلدام ەنەدى.
- الدىمەن ەلىمىزدىڭ سولتۇستىك بولىگىندە, كەيىن بۇكىل قازاقستان اۋماعىندا جاۋىن-شاشىن توقتاپ, كۇن كۇرت سۋىتادى. تۇنگى ۋاقىتتا تەرمومەتر باعانى سولتۇستىك وڭىرلەردە مينۋس 22-30 گرادۋسقا دەيىن, شىعىستا مينۋس 27-35 گرادۋسقا دەيىن, ال وڭتۇستىك جانە وڭتۇستىك-شىعىستا مينۋس 10-20 گرادۋسقا دەيىن تومەندەيدى, - دەپ حابارلادى اۋا رايىن بولجاۋشىلار.
سۋىق اۋا اعىندارى ەڭ اۋەلى سولتۇستىك قازاقستان, اقمولا, قوستاناي, اقتوبە, پاۆلودار وبلىستارى اۋماعىنا ءوتىپ, ودان سوڭ قاراعاندى, جەزقازعان, اباي, شىعىس قازاقستان وڭىرلەرىنە, ەلدىڭ شىعىس-وڭتۇستىك, شىعىس ايماقتارىنا جىلجيدى.
سولتۇستىك وبلىستاردىڭ باسىم بولىگىندە بۇل كۇندەرى ايازبەن قوسا, جەلدىڭ ەكپىنى سەكۋندىنا 15-20 مەترگە دەيىن جەتەدى دەپ بولجانىپ وتىر.
ەلىمىزدىڭ توتەنشە جاعدايلار قىزمەتى اتالعان وڭىرلەردىڭ تۇرعىندارىنا ايازدى كۇندەرى ساق بولۋدى, الىس ساپارعا شىقپاۋدى ەسكەرتەدى.